Ads by Google Ads by Google

Toe amatalia galuega mo le Fale Fono fou


Fale Fono Fou [ata: SN]

Ua tulata ina toe va’aia ua amatalia galuega e toe fa’aauau ai le fausaga o le  fale fou o le Fono Faitulafono. Fa’ailoa e le afioga le Fofoga Fetalai o le Maota o Sui, Savali Talavou Ale, “Ua mae’a ona saunia le agaluega e vilia ai  pu tetele i le nofoaga sa mua’i fausia ai le fa’avae o le fale fono fou, ina ia siakia ai le anagata o le fa’avae lea, ae maise o le maopoopo o le eleele o le a fa’atuina ai le Maota Fono, peita’i e fa’ato’a taunu’u mai masini e vilia pu ma siakia nei mea uma i le vaiaso a sau. Ua mae’a fo’i ona ave’esea atoa le fausaga sa mua’i fa’atuina, e tapenapena ai mo le fausaga fou o le fa’avae, e tusa o aiaiga ua mana’omia e le FEMA.”

 

O lea ituaiga o fausaga e tatau ona fausia ai fa’avae o fale e fa’atutu i eleele e masani ona a’afia i lologa, tafega o vai ma e tulata fo’i i le apitagalu. O le ulua’i fa’avae na le pasia e le FEMA ua matua ave’esea uma ma ua avatu nei i le nofoaga a le Paramount Builders lea e fesaga’i ma le Veterans Memorial Stadium.

 

“Pe afai e to’ai taunuu mai le masini lea i le aso Faraile nei, o le a amata vave i le vaiaso fou ona faia loa galuega o le viliga o pu nei ma siakia fo’i le eleele o le a fa’atuina ai le fa’avae fou,” o se tala lea a Savali.

 

Ana le usita’ia e le tatou Malo le toe fausia o le fausaga fou lenei o le a amatalia, ua fa’ailoa mai e le FEMA o le a latou taofia uma le tele o fesoasoani tau tupe lea e  fa’auia mai e toe fa’aleleia ma fausia ai fale ma isi galuega uma i le atunu’u.

 

Ua le mafai ona maua mai se fa’amatalaga e tusa ai o le aofaiga o le tupe ua mae’a fa’aalu i le galuega ua toe soloia nei lona fa’avae, ma le toe aumaia ai o nei masini tetele ma toe vilia pu nei e siakia ai le eleele e fa’atu ai le maota fono o Amerika Samoa.

 

Peita’i, ia Oketopa 2019, na toe talosagaina ai e Kovana Lolo Moliga le tama’ita’i Faipule o Amerika Samoa i le Konekeresi, ina ia fesoasoani mai i le toe sailiga o le $20 miliona e fa’ame’a ai lenei galuega.

 

Ua ia fa’ailoa mai, ua i ai na’o le $15 miliona, ma e aoga lea mo le fausaga ia mae’a lelei ai le Potu fono a le Senate ma le Maota o Sui, ae misia atoa isi vaega uma o le Maota Fono e fa’atautaia ai isi galuega uma e aoga tele mo le Vaega o le Fono Faitulafono.

 

“Ona o le isi mana’oga fou lea o le FEMA ina ia toe vili pu tetele nei e sailia ai le palapala ma lona anagata o i ai, ua toe o’o ai le tau o lenei galuega i le $35miliona,” o se vaega lea o le tusi a le kovana.