Ads by Google Ads by Google

Toe aafia i isi solitulafono mamafa se alii o loo nofovaavaaia i le faaoolima


[ata: SN]
ausage@samoanews.com

Pago Pago, AMERIKA SAMOA

O se alii o loo nofovaavaaia mo le 5 tausaga ina ua faamaonia e le Faamasinoga Maualuga lana solitulafono o le faaoolima, ua toe aafia nei foi, i isi solitulafono mamafa, e aofia ai le talepe fale ma le gaoi ae maua ai ma fualaau faasaina ia te ia.

O le masina na tea nei na tula’i ai le susuga ia Valosaga Filipo i luma o le Fa’amasinoga Faaitumalo e tali I ni tagi se luau a faila e le malo faasaga ia te ia.

O le tagi muamua e faatatau lea i fualaau faasaina na maua i totonu o lana ta’avale, ina ua taofi e leoleo I le alu saosaoa I luga o le alatele.  Ma le tagi lona lua e fesootai ma se mataupu na tula’i mai i le lua tausaga talu ai, lea o lo o tu’uaia ai o ia i lona osofaia o se fale i Leone ae ave faagaoi ni isi o mea aoga sa i totonu.

I le tagi muamua a le malo, ua molia ai nei Filipo i lona umia faasolitulafono o vaega o le pauta faasaina o le aisa; faapea ai ma le moliaga o le umia faasolitulafono o vaega o le pauta o le aisa ma le fa’amoemoe e faatau atu i isi tagata; o vaega ia o solitulafono mamafa e mafai ona faasala ai se tasi i le Toese mai le 5 e oo atu i le 10 tausaga, po o le salatupe e o’o atu i le $20,000; faapea ai ma le moliaga o le ave ta’avale ‘ona.  O se solitulafono e mafai ona faasala ai se tasi i le Toese mo le umi e o’o atu i le tasi le tausaga, pe faasala foi I se salatupe e o’o atu i le $1,000, po o le faasala fo’i i faasalaga uma e lua.

I le tagi lona lua a le malo faasaga ia Filipo, ua molia ai o ia i le moliaga o le talepe fale i le tulaga muamua ma le moliaga o le gaoi, o le vaega C lea o solitulafono mamafa, lea e mafai ai ona faasala se tasi i le Toese mo le umi e oo atu i le 7 tausaga, pe faasala i le salatupe e o’o atu i le $5,000, pe faasala foi i faasalaga uma e lua.

E $15,000 le vaega tupe lea ua fa’atulaga e le Fa’amasinoga e totogi ona faatoa mafai lea ona tatala Filipo i tua mai le Toese i Tafuna, e faatali ai taualumaga o lana mataupu.

Afai ae mafai ona tatala o ia i tua, ua poloaina o ia e le Fa’amasinoga ina ia aua nei ona toe tagofia le ava malosi po o fualaau faasaina.  E le mafai fo’i ona ia toe solia se tulafono a le malo, a ia avea o ia ma tagatanu’u e tausisi i tulafono i taimi uma. E le mafai ona toe taumafai e faafesootai molimau a le malo, e le mafai fo’i ona toe alu i le fale lea na ia osofaia i Leone.

E le i mana’o Filipo e fa’ataunuu lana ulua’i iloiloga lea na fuafua e faia i luma o le Faamasinoga Faaitumalo, e iloilo ai e le Fa’amasinoga mau a le malo, pe lava ma totoe mau e lagolago ai le tagi faasaga ia te ia, ae ua ia manatu e tuu sa’o atu loa lana mataupu i luma o le Fa’amasinoga Maualuga e fa’ataunuu ai sona faamasinoga autu.

O le masina fou lea ua faatulaga e toe tulai ai le ua molia i luma o le Faamasinoga Maualuga mo le isi ana iloiloga.

TAGI ALE MALO

O le afiafi o le aso 19 o Aokuso o le tausaga nei na taofi ai e Leoleo se pikiapu lanu mumu i luga o le alatele i Avau, ona o le saoasaoa faapea ai ma le sese o le laisene sa faapipi’i i le pito i tua o le ta’avale.

Na aga’i atu Leoleo ma iloa ai, e toalua tagata o loo i totonu o le ta’avale, o le ali’i o lo o ia faafoeina le ta’avale faapea ai ma le tama’ita’i o lo o nofo i le nofoa o le pasese. Na fesiligia le ave ta’avale i lona igoa ma faailoa mai ai, o ia o Valoaga Filipo, le ua molia i lenei mataupu.

Ina ua fesiligia Filipo i lona laisene ave ta’avale, na tali le ua molia, o lo o galo i le fale lana ato tupe o lo o i ai uma ona ID e aofia ai le laisene ma le ID a le malo. Na siaki e Leoleo faamaumauga o le ta’avale i le Ofisa o Taavale Afi i Tafuna ma faamaonia ai, o le ta’avale o lo o lesitala i le igoa o Onosa’i Filipo, na mae’a fo’i le aoga o le laisene o le ta’avale i le tausaga na te’a nei. 

O le laisene ave ta’avale a Filipo na mae’a lona aoga i le 2 tausaga talu ai, lona uiga, e le gata e le tatau ona fealua’i le ta’avale i luga o le alatele, ae le tatau fo’i ona faafoe e Filipo se ta’avale ona o le tulaga faaletonu i lona laisene ave ta’avale. 

Talu ai tulaga faaletonu e pei ona taua, na faailoa ai loa e Leoleo ia Filipo, o le a taofia lana ta’avale i lalo o le vaaiga a Leoleo, ae o le a auina atu fo’i o ia ma lana pasese i le Ofisa o Leoleo i Tafuna mo nisi suesuega faaopoopo. Na malie le ua molia i le fautuaga a Leoleo, ma auina atu ai loa o ia ma lana uo tamaitai i le Ofisa o Leoleo i Tafuna, faatasi ai ma lana ta’avale.

A o le i auina atu le ta’avale i Tafuna, na muamua faia se suega faapitoa ina ia mautinoa e le o i ai ni aupega poo ni fualaau faasaina i totonu o le ta’avale. Na saili e Leoleo le ta’avale maua ai se paipa tioata o lo o i ai vaega o le pauta faasaina o le aisa. Sa toe saili le isi itu o le ta’avale ma maua ai i le nofoa i tua se tamai ato o loo i ai pepa iila e lua o lo o i ai vaega o le pauta paepae o le aisa, faapea ai ma isi tamai pepa iila e masani ona fa’aaoga e utu ai le aisa ma faatau atu i isi tagata.

E leai ni fualaau faasaina poo ni aupega matautia na maua ia Filipo poo lana uo tamaitai i le taimi na sailia ai i laua e Leoleo.

Ina ua taunu’u i le Ofisa o Leoleo i Tafuna, e eseese potu na ave i ai Filipo ma lana uo tamaitai e fesiligia ai, ona o le manatu o Leoleo e le tatau ona tu’u faatasi i laua i le taimi o le suesuega. 

Na faailoa e le uo tamaitai a Filipo i Leoleo e faapea, na alu atu lana uo (Filipo) ma piki mai o ia i lona fale ma le faamoemoe la te tietie ma faasavili i le afiafi. Na muamua la afe i le nofoaga o Le Filifili ma faatau mai ai e Filipo fualaau faasaina i le $200 sa ia te ia. O le faamatalaga a Filipo ia te ia, o fualaau faasaina e maua mai i le tupe lea na te toe faatauina atu i isi tagata ina maua ai sana tupe faasili.

A o la aga’i mai i luga o le alatele ma le faamoemoe e afe i se Fale’aiga e faatau ai se la mea’ai, ae faafuase’i ai loa ona taofi i laua e Leoleo i luga o le alatele i Faga’alu.

Na musu le ua molia e fai sana tala i Leoleo e tusa ai o fualaau faasaina sa maua ia te ia. Sa ia taua atili fo’i e fa’apea, pau lava lona faanaunauga o lo o i ai, ia avea o ia o se tagata manuia. E le i tali Filipo i fesili a Leoleo poo fea na aumai ai fualaau faasaina sa maua i lana ta’avale.

TAGI O LE TALEPE FALE MA LE GAOI

A o faagasolo le suesueina o le mataupu e faatatau i fualaau faasaina e pei ona aafia ai Filipo, na alia’e ai i faamaumauga a Leoleo le tusi saisai na sainia e le Faamasinoga i le 2019 e sailia ai Filipo, ona o tu’uaiga i lona osofaia lea o se fale i Malaeimi ae ave faagaoi le tele o meaaoga sa i ai. 

Na taua e le ulugali’i e ana le fale i Leoleo e faapea, o le po o le aso 12 o Setema 2018 na osofai ai e se tagata le fale o le aiga na aafia ma ave faagaoi ni isi o meatotino e aofia ai se masini faigaluega kamuta e alu ui le uila. 

O se molimau na te iloa lelei Filipo ma ana uo, na ia faailoa i Leoleo, o Filipo ma le isi ana uo na osofaia le fale o le aiga na aafia i Leone ae ave faagaoi le tele o mea aoga sa i ai. Sa taua atili e le molimau i Leoleo e fa’apea,o Filipo lava na ia faamatala atu ia te ia le osofaiga sa alu i le fale ma gaoia mai ai ofu, seevae ma ni mea faigaluega kamuta.

O ni isi o mea faigaluega na faatau e Filipo e maua mai ai pia mo ia ma ana uo, e pei ona taua e le molimau i lana faamatalaga i Leoleo.

Ina ua  fesiligia e Leoleo ia Filipo e tusa ai o lenei mataupu, sa ia matua teena malosi ai lona aafia i le osofaiga sa faia i se fale i Ottoville.

NOFOVAAVAAIA

O le tausaga e 2017 na tausala ai e le Faamasinoga Maualuga le susuga a Filipo i le moliaga mamafa o le faaoolima i le tulaga lua, ma nofovaavaaia ai loa le ua molia mo le 5 tausaga. O le tausaga fou faatoa mae’a ai le nofovaavaaia a le ua molia.

O nisi o tuutuuga o lana nofovaavaaia e aofia ai le aua nei ona toe solia se tulafono pe tagofia le ‘ava malosi poo fualaau faasaina.

Talu ai tuuaiga fou faasaga ia Filipo, ua faila ai e le Ofisa Nofovaavaaia se talosaga i luma o le Fa’amasinoga Maualuga e faaleaoga ai le nofovaavaaia a le ua molia, ona o lea ua atagia mai i le tagi fou faasaga ia te ia, lona le usitaia o poloaiga a le Fa’amasinoga.

O le vaiaso fou lea ua faatulaga e finauina ai le mataupu faasaga i le nofovaavaaia a Filipo i luma o le Fa’amasinoga.