Ads by Google Ads by Google

To’alua ni ali’i ua molia i le umia faasolitulafono o fualaau fa’asaina

ausage@samoanews.com

Mai le to’atolu o ali’i na pu’e fa’apagota e Leoleo i le vaiaso na te’a nei ma molia i lo latou faia o ni gaioiga e save’u ai le nonofo filemu o tagata lautele, o le to’alua o i latou nei ua molia nei e le malo i le umia fa’asolitulafono o vaega o fualaau fa’asaina.

 

O le vaiaso na te’a nei na tutula’i uma ai i latou nei i luma o le Fa’amasinoga Faaitumalo mo a latou ulua’i iloiloga.

 

O i latou e to’atolu e aofia ai Apelu Mata’u, Kirisimasi Toia ma Feiloaiga Tufuga.

 

O lo o tu’uaia uma i latou nei e to’atolu i moliaga mama ta’i lua e aofia ai le faaoolima i le tulaga tolu, atoa ai ma le fa’atupu vevesi i nofoaga lautele.

 

I le taimi o le latou ulua’i iloiloga i luma o le afioga i le ali’i Fa’amasino ia Elvis P. Patea, na faia ai loa le faaiuga e tatala Tufuga i tua e aunoa ma se tupe e totogi, e faatali ai le isi ana iloiloga lea ua fa’atulaga mo le aso 28 o Oketopa 2019, ae o Mata’u ma Toia, na fa’atonu e le ali’i Fa’amasino ina ia toe oo atu i luma o le Faamasinoga i le taeao e sosoo ai mo le isi a laua iloiloga faapitoa.

 

O le taeao o le aso Tofi na sosoo ai na toe tutula’i ai loa Mata’u ma Toia i luma o le Fa’amasinoga mo le la iloiloga faapitoa. O le taimi fo’i lea na tauaao atu ai loa e le malo kopi o le latou tagi fa’asaga ia te i laua, i lo la umia fa’asolitulafono o fualaau fa’asaina.

 

Ua molia nei Mata’u i le moliaga mamafa e tasi o lona umia fa’asolitulafono o vaega o le pauta fa’asaina o le aisa; ae o Toia ua molia i lona umia fa’asolitulafono o le pauta fa’asaina o le aisa, faapea ai ma le moliaga o lona umia fa’asolitulafono o vaega o le laau fa’asaina o le mariuana.

 

E ta’i $5,000 lea ua fa’atulaga e le Fa’amasinoga e tatala ai i laua i tua.

 

O le aso Faraile o le vaiaso nei lea ua fa’atulaga e faia ai le ulua’i iloiloga o lenei mataupu.

 

O lo o taua a le malo i le latou tagi e fa’apea, i le po o le aso 6 o Oketopa, 2019, na talosagaina ai e se Tina mai Ottoville se fesoasoani a Leoleo, e tusa ai o le mataupu i lona nephew ma lana uo na fasi e ni ali’i se to’atolu sa faia sa latou inugapia i luma o le fale o se tasi o aiga o le nu’u.

 

O i latou e to’atolu e pei ona taua e le Tina lea i Leoleo, o i latou ia na pu’e fa’apagota ma ua molia e le malo i lenei mataupu.

 

Na taua e le Tina i Leoleo e fa’apea, ina ua taunu’u atu lona nephew e 24 tausaga le matua fa’atasi ai ma lana uo, sa ia vaaia ai ni manu’a i o la foliga. Ina ua ia fesiligia le mafuaaga, sa la faamatala atu ia te ia, na fasi laua e ni ali’i o lo o faia sa latou inugaupa i luma o le fale o se tasi o aiga o le nu’u.

 

Na taua e se tasi o ali’i na a’afia i Leoleo ina ua fesiligia i laua, o le fa’alavelave na tula’i mai i le taimi na la aga’i atu ai i le Faleoloa e fa’atau ni a laua meaai.

 

A o la aga’i atu i luga o le alatele, sa la vaaia se ta’avale pikiapu lanu efuefu o lo o paka i tafatafa o le auala i luma o le fale o se tasi o aiga o le nu’u, ma ni ali’i se to’atolu o lo o faia ai sa latou inugapia.

 

Na valaau mai se tasi o i latou e to’atolu i le au ali’i e to’alua na a’afia pe i ai se tasi o i laua e i ai sana sikaleti se’i ula ma latou. Na tali le ali’i e 24 tausaga le matua, e leai se isi o i laua e ulaula, e le maua fo’i se sikaleti ia te i laua.

 

O le taimi lea na valaau mai ai loa ma le ali’i o Tufuga, “e sili pe a lua o ese manu e le i fasia oulua”.

 

Na taua e le malo i le latou tagi e fa’apea, o le tala la lea na mafua ai loa le vevesi, ina ua savali mai Tufuga ma una’i le tua’au o le ali’i e 24 tausaga le matua, sosoo ai loa ma lona tu’iina o ia, o le taimi fo’i lea na tuli oso mai ai loa ma Toia ma Mata’u ma fesoasoani ia Tufuga i le fasiga o le ali’i e 24 tausaga le matua.

 

Na oso le uo a le ali’i e 24 tausaga le matua ma taumafai e fa’asao lana uo, peita’i na fasi fa’atasi atu ai ma ia e i latou ua molia nei.

 

E silia i le itula o taumafai Leoleo e saili i latou nei i le po lea ae ua le maua, peita’i a o fa’agasolo pea sailiga a Leoleo, na molimauina ai loa e Leoleo le pikiapu lanu efuefu o lo o masalomia sa fa’aaoga i le taimi o le inugapia, o lo o paka i luma o se tasi o Faleoloa i Fagaima.

 

Ina ua aga’i atu Leoleo e siaki le pikiapu lea, na latou faamaonia ai, o foliga tonu lava ia ma laei o i latou sa faamatala e molimau na fa’atinoina le solitulafono.

 

Na vave gaioiga a Leoleo ma taofia ai loa i latou nei i lalo o le latou vaavaaiga, e sauni atu mo le auina atu i le Ofisa o Leoleo mo suesuega.

 

A o le i auina atu i latou nei, na muamua siaki e Leoleo o latou tino ina ia mautinoa e leai ni a’upega poo nisi mea e ono aafia ai le saogalemu o Leoleo.

 

Ina ua saili e Leoleo le tino o Mata’u, sa maua i ai ni taga pepe iila se 2 o loo i ai vaega o le pauta paepae o le aisa. Ae ina ua saili le tino o le alii o Toia, sa maua i ai se paipa tioata e ula ai le aisa o loo tumu i le pauta o le aisa, ma se sikaleti mariuana ua uma ona taai, o loo i totonu ose tama’i ato lanu uliuli sa fusi i le manava a Toia.

 

Ina ua fesiligia e Leoleo ia Mata’u poo fea na ia aumaia ai pepa iila o lo o i ai vaega o le aisa, na taua ai e le ua molia, sa ia fa’atauina mai i sana uo i Vaitogi.

 

Ae na taua e Toia i Leoleo e fa’apea, o fualaau fa’asaina sa maua ia te ia, na fa’atau mai i ana uo ave taxi mai Tafuna.

 

Na faia e Leoleo se suega i vaega o fualaau faasaina sa maua ia i laua nei, ma faamaonia ai, o vaega ia o le pauta oona o le aisa faapea ai ma le laau fa’asaina o le mariuana.

 

E pei ona taua i fa’amaumauga a le Fa’amasinoga, sa i ai solitulafono na ta’usala ai Mata’u ma Toia i tausaga ua mavae.

 

I le 2011, na faasala ai Mata’u i le toese i Tafuna mo le 28 masina, o se tasi lea o tuutuuga o lana nofovaavaaia e 7 tausaga, ina ua faamaonia le moliaga o le gaoi. Ae o le susuga a Toia, o le tausaga e 2012 na faasala ai o ia i le toese mo le umi e 20 masina, o se tasi lea o tuutuuga o lana nofovaavaaia, ina ua faamaonia moliaga o le umia faasolitulafono o vaega o le laau fa’asaina o le mariuana.