Pago Pago - AMERIKA SAMOA

O le aso Faraile o le vaiaso ua mavae, sa fa’apaleina ai ni alii ma tamaitai se to’a 30, a le atunu’u ina ua fa’ai’uina ma le manuia mai a latou taumafaiga i le Aoga a Leoleo.

E to’a 23 i latou sa fa’au’uina o ni sui malu o le malo i le Ofisa a Leoleo, e to’atasi mai i le Ofisa o Sailiga ma Laveai ma le to’aono (6) sa fa’au’uina mo le Ofisa a le Homeland Security.  

O le susuga ia Ualesi Mua (ASDHS) sa ausia le tulaga muamua po o le ‘valedictorian’ o lenei vasega fa’au’u ae o Youlast Fe’a, se tasi o sui malu o le malo, sa ausia le tulaga o le ‘Salutatorian’.

O lenei fa’au’uga sa faataunu’uina i le fale tele a le DYWA i Pago Pago ma o le manulauti o le aso o le ‘Service Before Self”.  

I lana saunoaga faapitoa mo le vasega faau’u lona 29 a le A’oga Fa’aleoleo, na ta’ua ai e le afioga i le Kovana Lemanu P.S. Mauga, ua avea nei i latou ma tausimea aua le puipuiga o le saogalemu o le mamalu lautele.

I le sauniga amata sa saunoa ai le sui Komesina a leoleo, le susuga ia Vaipuna Fo’ifua Fo’ifua Jr., ae o le talosaga amata sa faaleoina e le susuga i le Faafeagaiga ia Tusi Seanoa mai i le Ekalesia Faapotopotoga Kerisiano a Samoa i Petesa Uta.  Ma sa ia u’una’ia ai le vasega fa’au’u ina ia tu’u atu lo latou faatuatua i le Atua, saili Lana taitaiga ma lona atamai e fa’atinoina ai o latou tiute.

Sa saunoa foi le afioga i le kovana ma ia fa’amanatu atu i le vasega fa’au’u le taua ma le lu’itauina o a latou tiute fou.  Ae e ao ona o latou talitonu, ua mafua ona o latou tauaveina lenei lu’itau, ona o lo latou alofa ma la latou tu’uto.

Sa ia faamamafaina foi le taua o le faamaoni ma le tutusa o tagata uma, i le faatinoga o o latou tiute fou.

Na ia faaleoina lona agaga fa’afetai ia i latou uma ona o la latou tuuto, ma faamautu le taua o la latou galulue punoua’i ma la latou taulaga ola, aua le fa’amautuina o le tulafono ma le saogalemu o tagata o Amerika Samoa.

Sa tolaulauina e le Komesina o Leoleo, le afioga Lefiti Atiulagi F. Pese ia suafa o le vasega fa’au’u lea ua faamaeaina le silia ma le 20 vaiaso o aoaoga ma toleniga.

O le afioga i le alii faamasino ia Sala Mamea Jr. sa na ia fa’atinoina le fa’atautoga o le ‘au fa’au’u.

O suafa o le vasega fa’au’u mo le Ofisa o Leoleo, e aofia ai; 

Anoa’i, Fa’aolataga; Asafo, Paice; Crichton, Malu; Esera, Filomena; Faaiu, Adronichus; Fe’a, Youlast**; Konelio, Henry; Koonwaiyou, Roberthenry; Leota, Agnes; Lepou, Congress; Lilio, Eteuati; Luafutu, Vena*; Maae, Nathaniel; Malauulu Leilulu; Malele, Fualaloata; Naea, Petaia Jr.; O’Brien, Michael; Simanu, Andrew; Tasi, Tavae; Tovio, Cedric; Tuivaiti, Lauoi; Tupuola, John; ma Tusipa, Po’oainafaiaoe

O le ofisa o Sailiga ma Laveai, o le susuga ia Andrew Hunkin.

Ae mo le ofisa o le Homeland Security; 

 Asiata, Herenee; Fano, Albert; Faumuina, Robert; Mua, Ualesi***; Vaimauga, Fotualii; ma, Voight, Bradley