Apia - SAMOA

Ua te’ena e le Taitai o le Itu Agai, le afioga Tuilaepa Sailele Malielegaoi, ia tu’ua’iga ua faia faasaga ia te ia, e le afioga i le Palemia o Samoa, le susuga i le La’aulialemalietoa Leuatea Polataivao Fosi Schmidt, tauala atu i lana loia, le susuga ia Meleisea Faimalotumua Mathew Limisio.

O le aso 13 o Aukuso, 2026, na molia ai e leoleo ia le afioga Tuilaepa, i le faia o faamatalaga taufa’aleaga ma le faia o uiga fa’asaua, e ala i le fa’aaogaina o feso’ota’iga fa’atekonolosi.

O le tu’ua’iga o le faia o sauaga e ala i le fa’aaogaina o tekonolosi, e mafai ona nofosala ai se tagata, i le falepuipui, i le lima tausaga.  Ae o le moliaga o le faia o faamatalaga taufa’aleaga, e mafai ona nofosala ai se tagata i le falepuipui, i le tolu masina.

I le faamasinoga, lea sa faia i le amataga o lenei vaiaso, sa fa’ailoa atu ai e le afioga i le Faamasino Sinia o Faamasinoga Fa’aleitumalo, le susuga ia Talasa Atoa, i loia a itu e lua, ia le iloiloina o nei moliaga, faatasi ai ma nisi o moliaga fa’aopoopo, e fa’asaga ia Tuilaepa, mai i le itu tagi. 

Sa ioeina e le loia a le itu tete’e, ia le saunoaga a le faamasino.  Ma sa ia faamanino e faapea, o nei mataupu, e a’afia ai le tagata e tasi ma na afua mai nei tu’ua’iga, i soligatulafono e tasi.

Na fa’aalia foi e le loia a le itu tete’e, ia le fesoasoani  o lea tulaga, i le iloiloina o mataupu uma i le taimi e tasi, e le fa’aumiumia ai lenei mataupu, ma tu’uina atu ai le taimi i le latou itu, ina ia fofoina le mataupu, i le taimi e tasi.

O lea na tolopoina ai loa e le afioga i le faamasino, ia le mataupu, mo Mati 1-3, 2027, ma tu’uina atu ai le avanoa i le loia a la te itu tete’e, e faila ai sa latou talosaga, ina ia mafai ona iloiloina uma mataupu, i le taimi e tasi.

O nei moliaga, na afua mai i seisi tagi, na fa’aulu e le afioga i le Palemia, i le masalomia o Tuilaepa, i lona fa’aleoina o ni faamatalaga, i se polokalama i luga o le ‘ea, ia Aukuso 6.

Ua toe faatonuina e le afioga i le faamasino, ia Tuilaepa, ina ia taofi lona toe faia o nisi faamatalaga e faasaga i le afioga i le Palemia.

Sa ta’ua e le afioga i le faamasino, o lenei fa’atonuga ua faia, ina ia taofia ai le toe iai o nisi mataupu e tutupu mai, ma nisi moliaga fa’aopoopo e toe fa’aulu atu, a’o tapenapena le faamasinoga o loma.

Sa tali mai ia le loia a le itu tete’e e faapea, e ui ina o lo’o malamalama le o lo’o molia, i le faatonuga mo le alo’ese mai i le faia o faamatalaga, e faatatau i le Palemia, ae peitai, o le tiute a le taitai o le Itu Agai, lea o lo’o umia e Tuilaepa, o le saunoa e tusa ai ma mataupu e a’afia ai le mamalu lautele.

Na fa’aleoina foi e le itu tete’e, ia ni atugaluga e tusa ai ma nisi o ripoti a le faamasinoga, o lo’o manaomia ona faaliliuina, faapea ma kopi o moliaga, lea ua mae’a ona faatonuina le itu a le malo, e fa’ao’oina atu, peitai, e leai se ripoti ua fa’ao’oina atu.

Saunoa loia a le itu tete’e, ua a’afia a latou tapenapenaga, ona o le tuai atu o nei ripoti ma le iai o nisi faatonuga a le faamasinoga, e le o usita’ia e le itu a le malo.

Na talifuaitau le itu a le malo, le susuga i le loia ia Meleisea Faimalomatumua, e ala i lona fa’amaonia le fa’ao’oina atu o ripoti ma fa’amaumauga, o lo’o manaomia e le itu.  Matagi,  sa fa’aleoina foi e le susuga i le loia, ia le iai o sa latou fuafuaga, mo le fa’aulufaleina o seisi tagi, e faasaga ia Tuilaepa, mai i le Minisita o A’oa’oga ma Aganu’u, le susuga ia Aiono Alec Ekeroma, e fa’aopoopo i isi tagi, ua iai nei.

Sa le auai le afioga Tuilaepa, i le faamasinoga, ona o lo’o i Niu Sila mo ana talavou.

Na toe fa’amanatu atu e le afioga i le faamasino, i loia a Tuilaepa, ina ia fa’amautu le auai mai o le afioga a le Taitai o le Itu Agai, pe a toe amata iloiloga o lana mataupu, ia Mati o le tausaga fou.