Ua fa’aalia e le Sui Fofoga Fetalai ia Fetui Fetu Jr le tele o ni fa’asea mai ni isi o le mamalu lautele o le atunu’u ua taunu’u atu i lona Ofisa, fa’asaga lea i le tulaga o lo o i ai le auaunaga a le Matagaluega o Leoleo i le taimi nei, atoa ai ma le tele o fa’afitauli o lo o alia’e mai ai.

O ni isi o mataupu na taua e Fetui ua fesiligia ai o ia e ni isi o le atunu’u, o le mafua’aga e ala ai ona umi se taimi o fa’atalitali se fa’aiuga i su’esu’ega a le Ofisa o Leoleo fa’asaga i ni isi o mataupu, atoa ai ma le mafua’aga e ala ai ona molia isi tagata ae le molia isi tagata i le taimi e mae’a ai su’esu’ega.

“Ua le masino mataupu eseese ua fesiligia ai a’u e le atunu’u fa’asaga i le auaunaga a le Ofisa o Leoleo, ma ua tatau ai ona silasila toto’a a outou afioga i se gaioiga e tatau ona faia ina ia tali atu ai i finagalo o le atunu’u,” o le saunoaga lea a Fetui i luma o le maota i le vaiaso nei.

“O le mea moni le mamalu o le fono, o lo o lelei pea lava le auaunaga a le Ofisa o Leoleo, ae o mataupu o lo o fesiligia e le atunu’u, o le tele lea o fa’afitauli i ni isi o vaega o loo aafia ai Leoleo, atoa ai ma le mafua’aga e ala ai ona vave ona molia isi tagata ae tuai ona molia isi tagata, e ui ua i ai mau e ono lagolagoina ai se solitulafono e masalomia sa faia,” o le saunoaga lea Fetui.

E le i fa’ailoa e Fetui poo a mataupu o lo o fa’avae ai fesili a le atunu’u fa’asaga i suesuega o lo o tuai ona fa’ai’uina a le Ofisa o Leoleo.

Saunoa atili le sui fofoga fetalai e fa’apea, e tatau ona vave fa’atulaga se iloiloga a le maota o sui ma le Ofisa o Leoleo, ina ia mafai ai ona fesiligia mataupu e pei ona tula’i mai.

Na tula’i le afioga i le alii faipule ia Lavea Fatulegae’e Palepoi Mauga ma ia fesiligia le mataupu e pei ona maliu ai se teineititi aoga i le Taelega i Tafuna i le masina o Me na te’a nei.

Saunoa Lavea e fa’apea, o le itu e ofo ai i ripoti e pei ona fa’asalalau e tusa ai o lenei mataupu, sa i ai tagata faigaluega i le taimi na tula’i mai ai le fa’alavelave. E le i manino i le saunoaga a Lavea poo ai tagata faigaluega sa aga’i i ai lana saunoaga, poo faiaoga a le Aoga Tulaga Muamua a Pava’ia’i lea sa i ai fa’atasi ma fanau aoga, poo tagata faigaluega e galulue i le Taelega a le Pala Lagoon.

Ua talosagaina nei le fa’ataunu’uina o se iloiloga e tusa ai o lenei mataupu, peita’i e le i fa’amautuina mai le taimi ma le aso e fa’ataunu’uina ai.

O le tama’ita’i na maliu i lenei mataupu e 14 ona tausaga mai le Vasega 8 a le aoga a Pava’ia’i, lea na malemo i le taimi o le tafaoga a le aoga ao lumana’i ai le aso o le fa’auuga.

O le mae’a ai o se suesuega sa fa’atautaia e le Vaega o Leoleo Suesue mai le Ofisa o Leoleo e uiga i lenei mataupu, na faia ai loa le faaiuga, o le fa’alavelave na tula’i mai ina ua malemo le teineititi aoga na a’afia, ma mafua ai loa ona maliu o ia.

O lea faaiuga sa faia ina ua mae’a ona fesiligia le ripoti a le Foma’i sa faia le suesuega, atoa ai ma fa’amatalaga mai ni isi o faiaoga ma fanau aoga sa i ai i le taimi o le fa’alavelave.