VAEGA 5

E toe fa'atalofa atu i a tatou pa'aga i so'o se tulimanu o le kelope o lo'o maua mai ai lenei auaunaga, aemaise i nai o tatou tama ma tina matutua i Amerika Samoa.  E fa'atalofa atu i le faaopoopoga fou o le tatou Fagogo i lenei tausaga fou 2025.  E tatou te tau fai si'i faatasi le viiga ma le mua i lo tatou Tapa'au Sili i le Lagi, ona o Lana pule faasoifua ma Lana tausiga alofa ia i tatou taitoatasi, ua mafai ai ona o tatou toe fesilafa'i ma le manuia i lenei taeao fou, i lenei tausaga fou, i luga o lenei nusipepa.

Ia ae se'ese'e mai loa i ou se'etaga malu, ae o le a taumafai atu le tatou Fagogo fou - O TEINE E TO’ATOLU MA LE TAMA NA LEILOA.
*********************************************

Sa gata mai le tatou Fagogo i le vaiaso ua mavae, ina ua alu le afafine matua o le tamaloa gaosi falaoamata, e taumafai sona laki i le Tupua o lo’o tupu i totonu o le fale a le alii mau’oa o le nu’u, lea o lo’o tau saili si ona atalii, na leiloa fa’afuase’i, ina ua atoa le 12 o ona tausaga.

Ma o le Tupua a le alii mau’oa, o lo’o i totonu o se tasi o potu o lona maota.  Ma o lea potu, e o’o loa i le ta o le sefulu lua i le tu lua o po ma ao, amata loa ona lagonaina ai le pa’o mai o se tagata, o fealua’i ai i totonu o le potu.

Ae ua fiu le tamaloa mau’oa e saili se tasi e mafai ona nofo i totonu o le potu, i le po atoa, e saili po o le a le uiga o nei pa’o e fa’alogoina i totonu o le potu.

Ae o lea ua sau le afafine matua a le tamaloa gaosi falaoamata, e taumafai pe mafai ona ia mateina le tupua i totonu o le potu.

Ma ina ua ta tonu lava le 12 i lea po, ae faalogoina loa e le tamaitai se tasi o foliga mai o savalivali solo i totonu o le potu, ae o le taimi lea, ua amata ona gatete le potu ma fa’alogoina ai foi se leo o se tagata, e pei  o lo’o oi i le tiga.

Ua oso le fefe o le tamaitai matua lenei, ma ia tamo’e mai i leisi tulimanu o le potu, agai i leisi tulimanu, ae leai seisi o ona iloa atu.  Ae ua atili ai ona leotele ia le savalivali ma le oi a le tagata.

Na matua’i fa’ate’ia le teineititi ina ua tu se alii i ona luma ma faapea atu, “O ai e ana nei mea’ai?”

Manatua foi, e na’o le pau lava lea o le mea na tapa e le teineititi ina ua fesiligia e le alii mau’oa, po o le a se mea e na te mana’omia. Ae tali le teineititi, ua lava na’o se mea’ai, ona o ia ua fia ‘ai.

Ua faapea atu le teine, i le alii lea ua tu i ona luma, “O la’u meaai.”

Ua va’aaia e le teine foliga faanoanoa o le alii, ae ua toe fesili mai le alii, “O ai lea ua teu matagofie ai faapea lenei laulau ‘ai?”

Ua toe tali atu foi le teine matua, “Mo a’u.”

Ua va’aia e le teine matua le amata ona maligi loimata o le alii.  Ae ua toe fesili mai foi, “Ae o le afi, o ai ua mafua ai ona faia lenei afi?”

Ua toe tali atu foi le teine matua, “Na tafu mo a’u.”

Ona tepa mai lea o le alii i le teine ma le maligi o ona loimata, ma sisi’i ona lima, ona mou atu lea.

[E FAIA PEA]