Ads by Google Ads by Google

Taualoa le Tautua & Sao Tagata Matutua i Amerika Samoa


Le susuga James Taylor mai le ASTCA, ua taulimaina i ai lona fa'ailoga na saunia e le malo o Amerika Samoa, ona o lana tautua ua atoa le 64 tausaga ae o lo'o fa'aauau pea lava. [ata: Leua Aiono Frost]

O le Tama sili ona matua ua fa'amauina i faila a le TAOA o lo'o alaala pea ma soifua i Amerika Samoa o le susuga le Fa'afeagaiga Malolo Manumalo Ta'ai Lemana mai Futiga. Ua taua'aoina lona fa'ailoga e le afioga Pulu Ae Ae Jr o le Ofisa fa'alotoifale o le afioga le Faipule o. Amerika Samoa i le Konekeresi Aumua Amata Coleman-Radewagen. [ata: Leua Aiono Frost]

O le sao o le Faigamalo ma le Ofisa o Tagata Matutua (TAOA) e toe fa'afo'i ai le fa'afetai i le tautua matavela, ae maise o le sao na fa'atino e Tama ma Tina matutua o le atunu'u o lo'o soifua pea, sa fa'aalia lea i le sauniga i le Malae o Suigaula a le Atuvasa i Utulei i le taeao o le aso Faraile na te'a nei.

 

O le polokalama fa'asolo sa fofogaina e le Sui Fa'atonu o le TAOA, Kuresa Paopao, ina ua to'ai taunu'u le latou savaliga fa'amalositino na amata mai le Fale Laumei ma agai atu i Utulei i lea lava taeao.

 

O le afioga le Sui Kovana Lemanu Peleti Mauga saunoa i le sao ma le tautua a tagata matutua uma.

 

"Ona o le taeao lenei, o lo'o taualoa ai le sao o tagata matutua uma i atunu'u o le lalolagi, lea sa fa'amaite e le Peresetene o Amerika, Donald Reagan i le tausaga 1988, o lona uiga o le lona 31 ai lenei o taeao fa'apenei ua fa'amanatuina ai le sao o tagata matutua i le lalolagi atoa, ae maise Amerika ma ona teritori. Ua ia te a'u le ava ma le fa'aaloalo tele, e avea ai a'u ma sui o le faigamalo a Amerika Samoa, e avatu ai le fa'afetai ia te outou matou matua, ona o lo outou sao, o la outou tautua matavela, o le tautua tuavae, o la outou fautua ma lo outou onosa'i ia i matou, a'o matou tula'i e avatu se tautua mo outou i lenei vaitau, i so'o se ala ua mafai ai."

 

"O le auro ma ma'ataua outou ia i matou, i so'o se mea, i so'o se taimi. O le tele o mea matou e oia ai, e matou te sulufa'i ia te outou mo se ta'iala ma le tu'ualalo. A leai, o fea ea matou te maua ai le to'omaga, a'o le Atua? Ua fai outou ma matou maluapapa i le tele o taimi, e o'o mai ai fo'i le malosi, pe a outou fautua mai i mea e lelei ai. Fa'afetai mo lo outou sao lea, aua e fesili lava muli mai ia mua mai, o upu na e le avea lo latou sa'o ma le moni i taimi uma o lenei soifuaga. Fa'afetai."

 

"O le a sa matou mea ua fai? O mea a nei sa fai mai le amataga, ua na'o le fa'aauau lava. Ae tou te le fa'ameo, e le talitiga mai i se taumafaiga, fa'afetai onosa'i fa'afetai lou tou titi faitama i faiva o taumafai ai nei. O outou matou toe tepa lava i ai, pe maua ai so matou manuia, pe a o'o ona oge i matou i fa'amanuiaga. Fa'afetai i la outou tatalo ma la outou fa'amagalo i o matou aleu. E muli mai lava se fa'amagaloga mai le Tama i le Lagi, ae muamua ona matou pa'ia se fa'amagaloga mai ia te outou matou matua, pe afai e le o tonu se tautalaga, ni mea sa manatu e tu'uina atu mo outou, ae ua le gafatia e lenei faigamalo.”

 

Sa soso’o loa ma fa’ailoga fa’apitoa. Muamua le fa'ailoga na saunia e le faipule o Amerika Samoa i le Konekeresi, Aumua Amata, lea na tapena mo le Tama poo le Tina sili ona matua ua fa'amauina e le TAOA. O ia lea o le susuga le Fa'afeagaiga Malolo Manumalo, Ta'ai Lemana mai Futiga. O ia o se fa'afeagaiga ua loa lana tautua i le Ekalesia Metotisi i Futiga. O lana ma'a fa'ailo ai lona matua ua atoa lelei le 99 tausaga o lona soifua, ma lana teutusi $500.

 

Fa'ailoga lona lua na tapena e le Kalapu a le Liona ma sa taua'aoina i le Tagata Matua ua iloga lana tautua i le atunu'u, ma sa maua e le afioga i le To'afiaoali'i Alo Dr. Paul Stevenson. Peita'i e le'i o iinei le tama matua, ma ua taua'aoina ai lana Ma'a fa'ailo ma Teutusi. O ia foi o le sui o le Liona. O lea fa'ailoga sa taua'aoina e le Peresetene o le Lions Club of Pago Pago, Chris King.

 

O le fa'afiafiaga a le Falelima i Sisifo sa soso'o ai, ae tapena mai isi fa'ailoga e lua o lo'o totoe. Na ta'ita'ia lea e le latou fa'aluma, ae o le taualuga sa sausaunoa ai le Tama Matua o lo'o alaala i le Falelima i Sisifo ma e auai fo'i i le Polokalama a le TAOA, le tama matua o Filia Alai'a.

 

O fa'ailoga na soso'o ai na tapena e le American Samoa Rotary Club. O le fa'ailoga lea i tagata pito i matutua ua auai pea e faigaluega i le Polokalama a le TAOA. E to'alua i la'ua ua ta'i atoa le 83 tausaga le matutua, ae o lo'o faigaluega pea lava.

 

O i laua nei o Nunuvale Fosi mai le afio'aga o Fagaitua, ma le tama o Filia Alai'a. O la'ua fa'ailoga fo'i e i ai ma teutusi o fa'ailoga tupe. O le faletua o le afioga le Sui Kovana, Ella Lemanu P Mauga sa ia taua'aoina nei fa'ailoga.

 

O le fa'ailoga mulimuli na tapena i ai le Malo. E le'i faigofie fo'i ona sailia le sui mo lea fa'ailoga, e tusa ai ma talatala a le tofa Fiu Johnny Saelua. Peita'i ua filifilia le tama na amata mai lana tautua i le 21 tausaga o lona soifua, se'ia o'o mai lava i lenei tausaga.

 

Ua atoa le 64 lenei o tausaga ae o lo'o faigaluega pea lava. Ua atoa fo'i le 85 ai lenei o tausaga o lona soifua. O ia lea o James Taylor mai le afio'aga o Futiga, o lo’o galue pea i le Ofisa o Feso’otaiga a le malo, lea o lo’o ua fa’aigoa i le taimi nei o le American Samoa TeleCommunications Authority (ASTCA), ae o le igoa sa i ai muamua o se ofisa o le malo, o le Office of Communications.  Na tula'i mai lana susuga lea, e le o i ai lava se afaina i lana savali, ma ua iloga ai, e le'i taitai lava lona soifua tautua, ae maise o lona silafia fo'i i lana matata tau'ave i le ASTCA.

 

Ina ua mae'a sa faia loa le taualuga o mea uma, o le aiga fiafia. I fa'afiafiaga sa lalafo ai le mamalu o e uma na auai, sa aotelega mo le siva taualuga a le falelima i sisifo le $375 ae aotelega mo le taualuga a sasa'e le $360 ma sa taua'aoina uma lava i le taupulega a tama ma tina matutua le latou seleni, e fa'amaopoopo ai se latou fo'i mea e fa'aaogaina ai, pe tufatufa fo'i.

 

O le aiga fiafia lea, sa tutula'i uma tagata faigaluega e afua mai lana afioga le Sui Kovana ma le faletua Lemanu Peleti Mauga & Ella Mauga, seia o'o uma i sui mamalu o le Matagaluega o Tagata Matutua i lana pulega, ina ia latou tautuina mea taumafa saunia lelei mo le mamalu o matua uma i le malae o Siugaula a le Atuvasa i Utulei.