I le fonotaga a le Komiti Fa'afoe o le DoH Tobacco Diabetes Coalition a Amerika Samoa sa faia i le aoauli o le aso Faraile i le Paradise Pizza i Pago Pago, na latou talanoaina ai a mataupu taua lava sa fa'atino mai le amataga o le tausaga 2019 se'ia o'o mai ia Iulai, ae maise o le fa'amoemoe ia ausia uma latou sini fa'atutu mai i a latou fonotaga o le tausaga ua tuana'i.

I le lipoti na fofogaina e le ta'ita'i o Polokalama fa'atino a le Koalisi lea, Farrah Lesa, sa ia fa'ailoa ai lona agaga fiafia ma le fa'afetai, aua ua ausia uma latou 'au'au na fa'atula'ia e ao ina ausia i le amataga o lenei tausaga.

Ona sa aveavaiaso malolo e ono ina ia faia ana talavai i lea fo'i vaitau, sa ia fa'afetaia ai le taitaifono ma le vasega o ana tagata faigaluega i le latou Ofisa galulue i Faga'alu, aua e le'i tolopoina ai fa'amoemoe na fa'atulaga, peita'i na fa'aauau ma ua leai se mea e le'i 'ausia.

“Fa'afetai le galulue, e le o se galuega ua fa'atula'ia na'o a'u e tatau ona fa'atinoa, ae ua tula'i mai le aufaigaluega uma, ma fa'atautaia mea uma na fa'atulaga, o le aoga fo'i lea o le taumafai fa'atasi i le fa'amoemoe e tasi, e le pa'u tasi ai le avega, ae tau'ave fa'atasi. Lea ua mae'a le taimi fa'atulaga, ae ua mae'a fo'i ona fa'ataunu'u mea uma na tatau ona faia. O le galuega sili, ina ua mafai fefa'asoa'i ma le mamalu lautele, o i latou e ao ina silafia nei fe'au taua uma lava,” o se tala lea a Lesa.

O le fonotaga a le Komiti Fa'afoe, sa ta'ita'ia e le ta'ita'ifono Fr Vaiula Iulio. Sa auai fo'i le susuga le Failautusi Clarence Crichton, fa'apea sui o le Komiti Fa'afoe e aofia ai DHSS, ASEPA, DOH ma  le Ofisa o le Ma'i Suka i le LBJ Medical Center, sui o le atunu’u lautele ma le sui o le Koalisi a le Manu'atele Mailo Oge Nua.

O nisi o mea tetele ua mafai ona fa'atula'ia a le Komiti Fa'afoe galulue ua mae'a ona faia fonotaga fa'apitoa mo Tausami Paleni lea na aofia fa'atasi mai ai sui o fale'aiga ta'itasi i totonu o le atunu'u. O i latou e gasolo i ai le mamalu lautele ina ia fa'atau mai mea taumafa ua mae'a saunia lelei.

O na fonotaga e tolu na faia, ina ia mautinoa, ua toe fa'asoa mai fale'aiga nei, i ala ua latou tapena ai, ina ia taumafai ai e suia a latou lisi o mea taumafa, i se lisi e fa'ailoa ai lo latou sapaia o le fa'amoemoe, ia laulauina mea'ai paleni mo le mamalu lautele i taimi uma.

Ua mae'a fo'i ona faia fonotaga ma a'oa'oga fa'apitoa tau le gasegase o le Ma'i Suka ma ona afuaga. E tatau ona timaia lelei tagata uma, ina ia le toe tausami i mea'ai e atili ai ona itiiti le avanoa e sao mai ai le maua i le ma'i suka. Ua mae'a faia aoaoga sa tapena i ai le Iunivesite o Stanford mai Hawaii, i le Manu'atele. Ua mae'a taua'aoina latou tusi pasi i le latou aoaoga na faia ma fa'atula'ia fo'i a latou Koalisi e tete'e i le Ulaula Tapa'a ma le Ma'i Suka ia fa'aititia lava.

E lua a latou Komiti Fa'afoe galulue ua mae'a tofia mo Ta'u, Faleasao ma Fitiuta, ae o le isi ua i Ofi ma Olosega. O i latou na ua suia mai Ma'ilo. Ua maea fo'i ona faia le fonotaga fa'apitoa a le Komiti Fa'afoe i Amerika Samoa ma sui mai PTA a a'oga maualuluga ma a'oga tulaga muamua fo'i i le teritori.

O lea fonotaga ua toe fa'ataua ma fa'amamafa ai le usita'ia o le avea ai o lotoa a a'oga uma lava ma Lotoa e le ulaula tapa'a e inumia ai le 'ava malosi po'o le pia. O lea tulafono ua i ai lea i so'o se a'oga a le Malo ua i lalo o le va'ava'aiga a le Matagaluega o A'oga.

Ua fa'ailoa ia i latou le tulafono ma ua latou iloa patino fo'i le tulafono ma suiga fou ua toe fa'aulu nei ina ia pasia ai. Ua le muta ai ona fa'asa mai nofoaga faitele, ae ua aofia ai ma lalo o faleie ma isi nofoaga e le puipuia, ua tatau ona ulaula se tasi e tusa o le 50 iata mai na nofoaga faitele.

O le pili lea fa'atasi ai ma ona suiga ua mae'a fa'auluina i ai, ua i luga nei o le laulau a le Kovana Sili  Lolo Moliga, mo lana saini e fa'amalosia ai. Peita'i ona o lea fa'ato'a to'ai i fanua lana afioga le Kovana, o lo ua i ai nei le fa'amoemoe e le o toe mamao ae fa'amae'a mai lea galuega tele ma e fetaui lelei ma le  fa'amoemoe i le Aso Fa'apitoa o le Ma'i Suka Novema 14, i setete ma teritori o Amerika.

O le fa'aiuga o le lipoti mae'ae'a na saunia i ai Lesa, sa ia fa'aalia ai, ua toe tatala mai nei le isi fa'atupega a le DOH Tobacco/Diabetes Coalition ina ua mae'a le fonotaga sa faia i San Francisco i le fa'aiuga o Iuni 2019 lea sa malaga atu i ai le to'afa o sui usufono.

Mo le aso fa'apitoa ia Novema 14, sa pasia ai se polokalama e ao ina fa'atautaia galuega tima'i mo le mamalu lautele e fa'atatau i le Ulaula Tapa'a ma le Ma'i Suka. Ua atofa sui e fa'atautaia folasaga mo lea fa'amoemoe i le Semina e amata mai ia Novema 13 se'ia o'o ia Novema 15, 2019, e faia i le Tradewinds Hotel.

Ua faatulaga se talotaloga e faia i le Malae i Utulei ia Novema 12, e amata lava i le taeao i le 6:00am mo itula e lua. O fofoga fetalai o le semina i le Tradewinds e aofia ai Loata Sipili o le Diabetes LBJ Med.Center, Sam Meleisea mo le fono faitulafono ma le tulafono pasia, Ianeta Ah Ping mo Me'ai Paleni e tausia lelei ai le soifua maloloina mai le LBJ, ma Dr. Emioni le Fa'atonu o le NCD a le DOH.

Ua fa'atulaga le aso fa'apitoa mo le vasega o Matua Matutua mai l TAOA, ina ia talanoaina fo'i le afaina o le Ma'i Suka ma ona o'oo'oga. Peita'i o le a fa'aopoopo i ai i nei folasaga, o se avanoa fa'aauro o le a saunoa fa'apitoa ai le ali'i foma'i o gasegase tau fatuga'o, lea ua fa'atulaga e galue i le falema'i fou o le Hope Dialysis i Ili’ili.

"Pe afai e oo atu i ai ae ua mae'a alaalata'i lea ali'i foma'i fa'apitoa i le tatou nei malo ma galue ai i le falema'i fou o gasegse fa'amama toto, o le a vala'aulia fa'apitoa fo'i o ia mo lana folasaga taua, aua e tatau ona matua iloa e i latou uma ua ma'i suka e o'oo'oga e to'ai taunu'u i ai le tagata mai suka pe afai ae fa'aauau ai pea ona le tausia lelei le soifua maloloina ma tausami i mea'ai paleni,” o se tala lea a le Taitaifono e tusa o se talosaga ina ia auai ma se a'oa'oga ma tautalaga fa'apitoa mai le susuga Dr Letarte, o le Hope Dialysis.

O le isi fonotaga a le Komiti Fa’afoe e faia ia Setema 20, e fa’ataoto le polokalama ia Novema.