E afua mai le vaiaso ua tuanai ua taofia ai ona toe malaga atu nisi o e fia faia talavai i Niu Sila ae totogia e le polokalama a le Medicaid. Ua fa’aalia mai e le tamaita’i Fa’atonu o le Medicaid, Sandra King Young, “Ua mafua lenei tulaga, ona o le aso e fa’amuta ai ona toe totogia e le Medicaid pili mo e faia talavai i Niu Sila o le aso 21 Novema, 2019. Peita’i ua leva ona fa’aulu le talosaga ma se soso’oga o lea fa’atupega, ae ua le toe maua mai se tali mai le Konekeresi a le Malo Tele, lea e ao ina latou pasia maia lea fa’atupega.”

Ua fa’aalia fo’i e King Young, “E leai se mea e tatau ona faia, a’o le taofia loa lava o le fa’aauau ona auina atu o nisi i NZ aua ua le o toe mamao le taimi e muta ai lea fa’atupega. O lona uiga o le vaega o totoe o le fa’atupega lenei a le Medicaid mo talavai o le a fa’aaoga mo talavai a i latou e faia i Amerika Samoa nei.”

O lenei muta’aga o le fa’atupega, ua maua uma ai fo’i ma isi teritori o Amerika e pei o Guam, CNMI ma Puerto Rico.

I le taimi nei, ua galulue maumaua’i le tatou Ofisa o le Medicaid iinei ma le Malo o Niu SIla ina ia amata fa’agasolo mai loa tatou gasegase o loo i NZ pea ina ia fa’amae’a lelei latou talavai ma o’o mai ia Tesema 25, 2019.

O i latou uma e le’i malaga lava i NZ i le taimi nei mo latou talavai, ia fa’autagia mai, ia toe fo’i ane i le tatou falema’i tele i Faga’alu e fa’atautaia ai latou talavai, semanu o maua le taimi e totogia ai pea e le Medicaid a’o le’i o’o mai Novema 21, 2019.

“O le isi vaega o nei sui e le’i maua lava se avanoa e malaga atu ai latou talavai i Niu Sila, ua le talia mai ona e le o maua i NZ nisi o latou falema’i e mafai ona fa’atautaia ai latou talavai o mana’omia. O le vaitau fo’i lea ua aga atu i ai i tatou, le vaitau o le Kerisimasi ma le Tausaga Fou; e tapunia atoa ai fo’i falema’i mo togafitiga amata i gasegase fou mai fafo mo le lua vaiaso atoatoa ona o nei aso malolo a lea malo.”

O lo ua fa’ailoa mai fo’i e King-Young, “E taofia lava le toe fa’aauau o le auina atu o tatou tagata e fia faia togafitiga i NZ se’ia vagana lava ua mae’a faia se fa’aiuga a le Konekeresi i lea fa’atupega pe maua mai, ma e ao ina pasia fa’atasi mai mo teritori uma lava o le Malo Tele.”

“Manatua mai, o lenei fo’i fa’atupega na toina mai mo le tatou atumotu fa’ateritori o Amerika e fua mai le afaina o i tatou i le afa tele o Gita i le tausaga 2018 ma sa toe fa’aauau mai ai lea fa’atupega 100%FMAP [86% mo AS ona o i latou e le o agava’a e malaga atu i NZ mo togafitiga] petia’i ua na’o sina vaitau lava na toina mai ai lea alamanuia, e afua mai ia Setema 30, 2019 se’ia muta ai nei ia Novema 21, 2019.” O se saunoaga maoti mai lea a King Young.

“Na fesoasoani fo’i le fa’atupega a le ACA mo lea fesoasoani, peita’i sa i ai le fa’amoemoe maualuga o le a vave maua mai se tali lelei a le Konekeresi mo se soso’oga o le fa’atupega a’o le’i mae’a le tinoitupe lea a le ACA, peita’i o lea lava la ua motusia nei lea alamanuia aua ua mae’a fo’i lea vaega tupe ACA.” O se isi lea ana fa’amalamalamaga o lea tautua.

“Ua le fa’atamala lava le matou Ofisa autu i le Medicaid i Amerika Samoa i le fa’amaumauga uma o mea e mana’omia ona fa’ao’o atu fa’atasi ma matou talosaga ina ia toe tatala mai se isi avanoa e soso’o ai lenei fesoasoani fa’aletupe e auina atu ai o tatou tagata nu’u mo talavai i NZ ina ia maua togafitiga taua o latou gasegase. Peita’i, lea ua o’o mai i le si’ui o lea fo’i tautua, e fa’afetaia ai le fa’atupega na maua, ua aoga mo le to’atele, peita’i ua le tatau ona fa’aauau pe afai o le a a’afia ai le va lelei ma le Malo o NZ, ina ne’i toe mana’omia fo’i e i tatou, a’o avanoa pea i le lumana’i.”