Ads by Google Ads by Google

Taofia i se vaitaimi le-tumau le auina atu i Samoa o fugala’au manogi


[ata: foa'i]

E le'i mamao atu i le fa'aiuga o le tausaga ua te'a 2018, na fa'asalalauina fa'alaua'itele ai le tulaga o le amatalia ona avea le Loi Mumu ma e u a'ati fo'i i le tatou atunu'u, ma ua avea nei ma se tasi o "Iniseti Fa'alafua" i Amerika Samoa.

 

Peitai ua fa'ailoa mai fa'alaua'itele e le Malo Tuto'atasi o Samoa, i le mamalu o e femalaga'i i le va o i tatou ma Apia, o le a taofia le tumau ai le toe fela'ua'i atu o Fugala'au Manogi o so'o se ituaiga i le malo tuto'atasi mai o tatou laufanua nei.

 

O le amataga o le masina lenei o Ianuari, sa fa'alauiloa aloa'ia ai e Samoa lea tulaga. O le Matagaluega o Fa'ato'aga ma le Matagaluega o Punaoa ma Alamanuia Fa'anatura a le malo Samoa sa la'ua va'ava'alua i le fa'amalosiga o lea fa'asalalauga mo le silafia e le mamalu fegasoloa'i o tatou malo na lua.

 

E tusa ai ma lea fa'asalalauga, ua fa'ailoa ai, ua mae'a fa'alauiloa fa'alaua'itele e Amerika Samoa, ua i ai lea ituaiga o Loi fa'alafua i o tatou laufanua nei, ma e ao ina puipuia le malo Tuto'atasi mai le a'afia atu i nei ituaiga o Loi, aua e tetele fa'ato'aga i lea fo'i malo, e matua afaina lava pe afai o le a o'o atu i ai le Loi lea i o latou laufanua.

 

"O nei ituaiga o loi e nini'i i latou ae matua ogaoga le afaina o meatoto, fua o fa'aeleeleaga i fuala'au 'aina mata ma fuala'au 'aina fo'i, ae maise fo'i o fuala'au suamalie, ma le soifua maloloina o tagata soifua, pe afai ae ola ai le loi i totonu o fale ma totonu o vai fa o tiapule, fa'i ma isi fua o meatoto uma. E vave fo'i lo latou fa'ateleina. O nisi na o mea e faigata ai ona tineia lea ituaiga o loi mai so'os e laufanua ua o'o ma mau ai."

 

Ua fa'ailoa i tagata ina ia nofouta pe a fesiligia e ali'i ma tama'ita'i o Ofisa o Fa'ato'aga o lo'o siakia fa'amomoli ma uta e la'u atu i Samoa, ina ia mautinoa o lava fo'i le onosa'i pea uumi laina a'o fa'agasolo tiutega o mea uma, ae maise lava i atigipusa ma isi oloa fa'apena e ono o'o atu ai lenei loi i Samoa.

 

"I le taimi nei, ua fa'asa ai ni pemita e la'u atu ai fugala'au manogi mo ni teu ma pale o maliu ma isi lava ala e afua ai ona mana'omia mai ni fugala'au e auina atu i Samoa. Ua aofia ai fo'i ma ni la'au toto e fia oka mai i Amerika Samoa ua taofia uma lava. E aofia ai ma Hawaii, Tahiti, Guam, Wallis and Futuna, Papua Niu Kini , Vanuatu ma le Atu Solomona i lea lava fa'asa le tumau."

 

Ma ua toe fa'atulaga ai le fanaina fo'i o va'alele i lo latou tulaueleele atu i so'o se malae va'alele lava i Samoa ina ia mautinoa o lo'o mama fo'i le va'alele fa'apea ma le pasese ma latou uta ua le o aofia atu ai se loi lea.

 

Ua sainia fo'i lea fa'asalalauga faalaua'itele e ali'i Minisita o Fa'ato'aga ma Puna'oa o le atunu'u, e mautinoa ai, o lo'o fa'amaonia lava le galuega fa'atino e puipuia ai Samoa mai le Loi fa'alafua lea.