Pago Pago - AMERIKA SAMOA

ASIASI MAI SUI O LE ACCJC E SU’ESU’E TULAGA O LE KOLISI A AMERIKA SAMOA

E tolu aso na asia ai e le sui o le ACCJC (Accrediting Commision for Community and Junior Colleges), o le tamaitai o Melynie Schiel, ia le Kolisi Tu’ufaatasi a Amerika Samoa (ASCC), ina ia fa’amautuina pe o tausisi pea le kolisi i tulaga fa’ata’atia e mafai ai ona fa’aauauina lana auauina, i le aoaoina o fanau aoga a le teritori, i tulaga e agava’a ai mo fesoasoani tau tupe faapea ma konakarate a le malo feterale.

O Schiel o le sui Peresetene a le ACCJC ma ua ia taliaina nei se valaauga e galulue so’otau’au ai ma le ASCC ma o le amataga o lenei masina sa mafai ona ia faimalaga mai ai, e asia le kolisi a le teritori mo aso e tolu.

Sa mauaina e Schiel, i lana asiasiga, se avanoa e faamasani atu ai i le tele o polokalama po o vasega o lo’o faapea ona mataituina e le ASCC, e le gata i lea, o se avanoa foi e feiloai atu ai i taitai o le kolisi.

I lona to’ai taunu’u mai, sa faapea ona faataunu’uina ai se ‘ava o feiloaiga ma fa’auluuluga o le kolisi ma faapea ona fa’afeaoina solo o ia i totonu o le laumua, ina ia mafai ona asiasi atu ai i vaega uma o le aoga.

E le gata i lea, sa mafai ona fa’ataunu’uina ai e taitai ma le aufaigaluega a le kolisi ia ni fa’aaliga po o ni vasega, e fa’alauiloa atu ai i le sui Peresetene o le ACCJC ia vaega uma ma mataupu uma o lo’o a’oa’oina i totonu o le aoga.

O Schiel, e lona fa iai sui Peresetene filifilia a le ACCJC, ma o se tasi ua loa ona galue i totonu o galuega faaleaoaoga.

I le mae’a ai o le asiasiga a Schiel, sa fa’aleoina ai e le peresetene o le Kolisi, ia Dr. Rosevonne Pato lona agaga fa’afetai i le laumua o le ASCC ma lana aufaigaluega uma, ona o le i’u manuia o le asiasiga a Schiel aemaise o le talimalo faatamalii sa o latou alo atu iai.

FINAGALO KOVANA FILIFILIA E GALULUE FAATASI MA LE FAIGAMALO

I sana tusi ua fa’ao’oina atu i le afioga i le Kovana Lemanu P.S. Mauga faapea le afioga i le Lutena Kovana, le tofa ia La’apui Talauega E.V. Ale, ua talosagaina ai e le Kovana filifilia, le afioga Pula Nikolao Pula, ia se avanoa e mafai ai ona o latou feiloai, e soalaupuleina ni mataupu e mafai ai ona fa’afaigofie ma sologa lelei, ia le suiga o faigamalo o loma nei.

Sa ta’ua e le afioga Pula i lana tusi, lona agaga fa’afetai ona o le agaga sa faaalia a’o alo atu le atunu’u i le palota na se’i mavae atu nei.  “E ta’alo tama ae o uso,” e pei ona sa ta’ua e Pula.

Sa ia fa’aalia atu foi ia Lemanu le le fa’agaloina o la latou tu’uto i la latou auaunaga mo le mamalu lautele ae le gata i lea, o la latou va’ai mamao.

Ma sa fa’ailoa atu e Pula lo la agaga fiafia ma le afioga Pulu, e latou te galulue faatasi aua suiga o le faigamalo o loma nei.

O le po o le aso Gafua na se’i mavae atu nei, sa tu’ua ai e le afioga Lemanu faapea foi le kovana filifilia ia Pula, ia le teritori.

MAE’A TAUVAGA FAASAIENISI A FANAU AOGA O LE TERITORI

E to’aono ni sui tauva mai i aoga uma a le teritori, ua filifilia e faimalaga atu i Honolulu, Hawaii, e avea ma sui o Amerika Samoa i le tauvaga fa’asaienisi (2025 Hawaii and Pacific Junior Science and Humanitites Symposium - JSHS).

O lea polokalama o lo’o tu’ufaatasia e le ‘Hawaii Academu of Science’ e mafai ai ona maua e fanau aoga ia le avanoa e fa’aali ai lo latou malamalama ma tomai, e tusa ai ma suesuega faasaienisi.

O lea polokalama o lo’o lagolagoina e Vaega’au a Amerika, e atina’eina ai su’esu’ega fa’asaienisi, tekonolosi, inisinia ma matematika (STEM), i luga o aoga maualuluga.

O le tauvaga a le teritori, sa faataunuuina ia Novema 22, 2024 i le fale tele a le DYWA i Tafuna ma e to’a 11 i latou sa mafai ona ausia le tulaga maualuga, mai i sui tauva e to’a 28.

O le na tulaga muamua, o Kim G. Garcia mai i le aoga maualuga a Fa’asao.

Lona lua ai Alana Joserose mai i le Pacific Horizons.  

Lona tolu o Renee Dunson mai i le aoga maualuga a Leone.

Tulaga fa o Amelie Chen mai i le Pacific Horizons.

O le tulaga lima sa maua e le alii o Daniel Lee mai i le Pacific Horizons.

1. Ma le lona ono, sa maua e Kathleen Sagapolutele mai i le aoga maualuga a Faasao Marist.
2. O le tulaga fitu, sa maua e Alshadai Siaosi mai i le aoga a Manumalo, ma le lona valu sa mauaina e Myron Faimalo mai i le aoga maualuga a Tafuna. 
3. O Tamara Aifesili sa ia mauaina le tulaga iva, mai i le aoga a Leone.  O le tulaga sefulu sa ausia e Falaga’i Fuiava mai i le Manumalo ma le lona sefulu ma le tasi, o Giang Hoang mai i le South Pacific Academy.