Pago Pago - AMERIKA SAMOA

FA’AMATU’U MAI SE VAEGATUPE E SILIA MA LE $10 MILIONA MO LE FAASAOINA O LE VAOMATUA - NAUMATI

Ua mauaina nei se avanoa e mafai ai ona fa’aolaola pea ia la’au o le vaomatua - Naumati, e ala i se foa’i tau tupe e silia ma le $10,000 miliona.

O lo’o iai se talitonuga, ua toe pau lava lenei o le ituaiga vaomatua o totoe i totonu o le Pasefika.

O lenei vaegatupe o le a faapea ona fesoasoani i le DMWR ma le Faigamalo a Amerika Samoa i le tjusiga o le 27 eka o vaomatua, ua faasaoina mo aoaoga, gaioiga faalenatura, ma le atina’eina o le tamaoaiga e ala i polokalama faaturisi e patino i le nofouta i tulaga o le siomaga, aemaise ai o le puipuiga o manu o lo’o nonofo ma ola i totonu o le togavao.

O se galuega ua silia ma le 40 tausaga, le taumafaiga ina ia fa’asaoina lenei vaomatua.

E le’i mamao atu foi se taumafaiga e u’unaia ia taitai o le ekalesia EFKAS i Kanana Fou, lea ua faatauina se vaega o lenei vaomatua tău fa’asao, mai i le aiga a Haleck - lea o lo’o i leisi itu ala o le laumua a Kanana Fou, ina ia mafai ona toe faatauina mai e le malo lea valga o le vaomatua.

Ae peitai, sa le’i faamanuiaina lea taumafaiga a le malo. 

FILIFILIA OFISA ENETIA E FEUTAGA’I MO VAEGATUPE FETERALE

E 15 Ofisa Enetia mai setete sees, faatasi ai ma le Ofisa Enetia a Amerika Samoa, ua filifilia mo feutagaiga mo se vaegatupe e $27.98 milliona mai i se polokalama a le Ofisa o Enetia a le Iunaite Setete, o le ‘EAT’ (Energy Auditor Training).

E pei ona fa’ailoa mai e le ofisa a le malo tele, o lenei tupe o le a mafai ona fa’aaogaina e fa’aopoopoina ai tagata faigaluega ma lagolagoina polokalama tau enetia.

Sa saunoa le Failautusi o le Enetia, ia Jennifer M. Granholm, ua silia ma le lua miliona tagata faigaluega a Amerika i totonu o galuega mo le faasaoina o le enetia, ae o lo’o fa’aauau pea ona manaomia nisi tagata faigaluega.

FAIMALAGA SE FAIAOGA MAI SAMOANA MA LE AUVA’A A LE ‘NAUTILUS’ E FAIA SUESUEGA I OGASAMI O PALAU

Ua filifilia nei se tasi o faiaoga mai i le aoga maualuga a Samoana, le tamaitai o Lottie Haleck, e faimalaga faatasi ma nisi o faiaoga e to’a 13 mai  I Teritori ma Setete eseese o Amerika, e latou te folau ma le auva’a a le Nautilus, e faia ni su’esu’ega i sami ma a’au o Palau.

Na fa’aalia e Haleck lona agaga fa’afetai e auai atu i lenei polokalama taua, ma o se ulua’i taimi lenei o le a ia faimalaga atu ai i Palau ma auai i nei ituaiga suesuega i le moana o Palau.

Sa amataina mai le faigamalaga i le aso 29 o le masina ua tuanai ma e fa’amae’aina i le aso 8 o le masina nei.