Pago Pago - AMERIKA SAMOA

PASIA UMA SUI TAUVA MO LE PALOTA LAUTELE IA NOVEMA 5

Ua ripotia mai e le Ofisa Palota le leai o nisi o tete’e i sui tauva uma e pei ona sa fa’alauiloa mai e lo latou ofisa ia Setema 3 ma ua pasia uma sui tauva mo le palota ia Novema 5.

O le vaiaso nei ua amataina ai palota le auai lotoifale (local absentee voting) mo i latou o le a faimalaga atu i fafo ia Novema 5, i le ofisa palota i Tafuna, e amata mai i le 8 i le taeao, se’ia o’o atu i le 4 i le afiafi.

O i latou ua agava’a mo palotaga le auai faalotoifale (local absentee voting), e aofia ai i latou o le a faimalaga atu i atunu’u i fafo mo talavai, tiute faalemiliteri, tulaga o galuega, konefesi po o tiute fai faapea ai ma i latou o le a faimalaga atu mo tafaoga.

O le a tapunia nei palota (local absentee) i le aso 4 o Novema, a’o le’i faataunu’uina le palota lautele ia Novema 5.

O le a tatalaina foi le ofisa palota i aso Toonai ma aso malolo, mai i le 8 i le taeao, ae tapunia i le 12 i le aoauli, aua ‘absentee voting’ ma i latou o fia lesitala mo palotaga.

O paga ua pasia mo le palota ia Novema 5, e aofia ai:

Kovana ma Lutena Kovana:

• Lemanu Palepoi Sialega Mauga ma Laapui Talauega Eleasalo V. Ale
• Pula Nikolao Pula ma Pulu Ae Ae Jr.
• Vaitautolu Iaulualo ma Mary Taufete’e

Sui Tauva mo le tofi Sui Faipule i le Konekeresi a le Iunaite Setete:

• Aumua Amata
• Fualaau Rosie Tago Lancaster
• Luisa Kuaea
• Meleane Suitonu Chapman

O lo’o toe tauva uma Faipule o le Maota o Sui.

FINAGALO LE FAATONUSILI DMWR INA IA TOE SUIA TULAFONO FAAULU MO LE NOAA

Ua fa’aulufaleina nei se finagalo fa’aalia a le Faatonusili o le Matagaluega o Alagamanuia o Sami ma Vaomatua (DMWR), le susuga ia Taotasi Archie Soliai, ina ia toe faia ni suiga i tulafono taufa’aofi NOAA-NMFS-2022-0082 e pei ona failaina ia Setema 12, 2022, e fa’amaoti ai aso ‘ese’ese e lua mo aso fagota faalimiti – 1,270 aso i tuagalu po o le moana, ae 558 i totonu o ogasami faasao (EEZ).

I sana tusi sa fa’ao’oina atu le sui taitai o le ‘National Marine Fisheries Services (NMFS)’, i le aso 2 o Setema 2024, sa fa’ailoa ai e Taotasi le a’afia o le tamaoaiga ma tagata o Amerika Samoa i le tulafono taufa’aofi, e ala lea i le limiti o aso fagota i tuagalu po o le moana, e va’a fagota a le teritori, lea e faamoemoe iai le tamaoaiga a le atunu’u.

Sa ta’ua ai foi e Taotasi le manaomia o nisi faamatalaga e tusa ai ma le tulaga i lenei tulafono taufa’aofi ma ni manatu fa’aalia e tusa ai ma lenei mataupu, aemaise ai ona o le tulafono a le WCPFC 20 – lea e patino i le fa’aiitiitia o taimi e fagota ai ‘Tropical Tunas’, i le va o le 1.5 masina i le 3 masina (Iulai-ogatotonu o Aukuso) i totonu o ogasami faasao (EEZ) ae 1-2 masina i tuagalu po o le moana.

Ma na fa’aalia foi e Taotasi le tele o le a’afiaga o Amerika Samoa i lea suiga, ona i taimi o faamamalu ai ia tapu, o taimi ia e agai atu ai va’a fagota a Amerika i sasa’e ma o le a faapea ona fa’aitiitia ai va’a e afea le teritori, ona o le a latalata atu i latou i kamupani i’a i Latina Amerika (e pei o Ecuador, Mexico, etc.)

Aemaise ai foi, e pei ona ta’ua e Taotasi, o tulaga i tau o suauu, tau o i’a, o le mamao o faigamalaga.  Fa’aalia e Taotasi, e mafai ona fesoasoani le faasoa mai o le ofisa autu i le teritori, e tusa ai ma la latou fuafuaga, ina ia mafai ona nofo sauni le teritori i ni suiga e ono tula’i mai, e a’afia ai le atunu’u.

FA’AGASOLO TUI PUIPUIA A FANAU I TOTONU O A’OGA

O le aso 16 o Setema, ua faamoemoe le Ofisa o le Soifua Maloloina lea o lo’o mataituina tui puipuia a fanau, ina ia amata ai a latou asiasiga i totonu o a’oga ese’ese a le malo, ina ia mafai ona faia tui puipuia a fanau aoga o lo’o manaomia ona faia.

Sa fa’ailoa mai e le tamaitai o lo’o fa’auluulu iai lenei polokalama a le Ofisa o le Soifua Maloloina, ia Yolanda Masunu, o fanau ia e le o atoatoa a latou tui, o le a fa’ao’o mai i a latou falemai tua (community health centers).  Ma ua ia fautuaina matua ina ia fa’amaonia le fa’ataunu’uina uma o tui puipuia a fanau, ina ia aua ai ne’i tuli mai latou i le fale.

Na toe faamanatu mai ai foi e Masunu le tatau ona faia uma tui puipuia a fanau iti, ina ia mafai ai ona taliaina i totonu o ‘Daycares’.  O le a fa’aaluina e le polokalama mo tui puipuia ia aso e lua, i le vaiaso, e asia ai ‘Daycares’ e faamautuina le mae’a o tui puipuia a fanau iti.

AVANOA SIKOLASIPI MO FANAU AOGA 

I lalo o se polokalame ua faatupeina e le Ofisa o Aoga a le Iunaite Setete ma mataituina e le Iunitesite a Hawaii i Manoa, ua tatalaina mai ai nei e le ofisa telefoni a le malo (ASTCA) ma le ‘OceaniaCDN’ (Oceania Community Development Network) ia ni avanoa e mafai ai ona galulue ma fa’alauteleina ai lo latou malamalama, aemaise ai o le ausia o ni sikolasipi mo a latou aoaoga i le lumanai.

O le mamanu o lenei polokalama, ina ia mafai ona fa’ailoa ma faafaileleina fanau aoga Samoa, o le atu Pasefika faapea ma Filipaina, e aofia ai fanau a’oga e iai mana’oga faapitoa.

E 18 aso o le a faataunu’uina ai lenei polokalama, e ta’i lua vaiaso ma faia, i aso Toonai uma, lea na amataina i lenei masina, ma le faamoemoe e faamae’aina ia Iulai 2025.  E valu itula o le a fa’aaluina e asiasi atu ai i nofoaga ‘ese’ese o faia ai galuega, fa’ata’ita’i le faia o galuega faapea ai ma le fa’aaluina o le 40 itula e galue ai i le e tau mafanafana, e aunoa ma se totogi.

O lenei polokalama, e leai sona totogi ma e mafai ona toe maua nisi faamatalaga i luga o le oceaniacdn.org.