Pago Pago - AMERIKA SAMOA

FA’AAGAGA $6 MILIONA MO LE MEDICAID

I le latou iloiloga i le aso Faraile o le vaiaso ua tuanai, Setema 6, 2024, na soalaupuleina ai e le Komiti o Paketi ma Tupe Faasoasoa a le Senate, le fa’aagaga mai o se vaegatupe e $6 miliona, mo le Medicaid, ina ia aua ai ne’i tu’ua’ia le Fono, pe afai ae le pasia (line-item veto) e le kovana ia lea vaegatupe.

Sa saunoa le sui Taitaifono o le Komiti, le afioga i le Senatoa ia Magalei Logovii, i le fa’aagaga mai o lenei vaegatupe mo le Medicaid, ua fa’ailoa mai ai e le Fono, e tatau ona ona fa’amatu’u mai loa lenei vaegatupe.

Sa fautuaina foi e Magalei ia le fa’aagaga o le $1 miliona mo le umusaga o le Fale Fono fou, lea ua faamoemoe e faia i le tausaga fou, aua e pei ona sa saunoa Magalei, e leai se vaegatupe o fa’amatu’u mai mo lea faamoemoega taua.

O le suiga lona tolu, na aofia ai le $45,000 mo le paketi a le Ofisa o Mataupu tau Samoa, ina ia faaopoopo ai le ta’i $15,000 i totogi a Kovana Fa’aitumalo, ma si’i ai o latou i le ta’i $75,000 i le tausaga tupe fou.

Sa fa’aleo e le Peresetene o le Senate, le afioga i le Senatoa ia Tuaolo Manaia Fruean, le fa’ao’oina atu o nei suiga i le Maota o Sui, i sa latou fonotaga na faamoemoe e faia i le aso na soso’o ai.

I le aso Tofi o le vaiaso ua mavae, sa atoa le 10 minute, o faatalitali sui o le maota maualuga, i le auai atu o afioga i Faipule mo la latou iloiloga, ae peitai, e le’i auai atu nisi, o lea na toe tolopoina mai ai lea iloiloga, i le aso Faraile na soso’o ai.

O le $6 miliona mo le Medicaid, o lo’o aofia i totonu o le paketi mo Polokalama Faapitoa ma sa fa’aalia e Magalei, e leai ni pili mo tupe fa’asoasoa ua pasiaina e mafai ai ona maua se vaega o tupe aoina fou a le malo.

FA’AMANUIAINA LE OFISA A LE ‘CRIMINAL JUSTICE’ I SE VAEGATUPE E LATA I LE $300,00

Ua fa’alauiloa mai e le afioga i le sui Faipule a Amerika Samoa, i le Konekeresi i Uasigitone, le afioga Uifa’atali Aumua Amata, ia le faamanuiaina o le ofisa a le CJPA (Criminal Justice Planning Agency) a Amerika Samoa ma ona lala, ia se vaegatupe e $299,145 mai i le Malo Feterale.

Sa faaleoina e Uifa’atali le agaga fa’afetai i le Faatonusili ia Mariana Timu-Faiai ma lana aufaigaluega, e tusa ai ma la latou galuega mae’ae’a ua mafai ai ona fa’amanuiaina Amerika Samoa i lenei vaegatupe, e fesoasoani i latou auaunaga tautua.

Na ta’ua foi e Uifa’atali, o nei tupe feterale, o le a faapea ona fesoasoani i polokalama mo i latou ua a’afia i soligatulafono ma fesoasoani ia i latou ina ia mafai ona fa’afoisia le maloloina o le tino ma le mafaufau.

O lenei vaegatupe o lo’o fa’amatu’u mai i tupe mo le VOCA (Victims of Crime Act), aua se fesoasoani tau tupe mo i latou e a’afia i so’o se ituaiga fa’alavelave tau solitulafono (crimes), ma e mafai ona fesoasoani ai i le totogia o pili falemai, pili mo faufautua (counseling), o pili mo maliu faapea ai le a’afiaga o galuega.

FUAFUA LE SIITAGA O LAFOGA ULUFALE MO NIU SILA

Ua ripotia mai e le vaega fa’asalalau a le RNZ Pasefika, le iai os e fuafuaga a le malo o Niu Sila, mo se siitaga o lafoga totogi mo tagata ulufale atu i Niu Sila, mai i le $35NZ ($21.61USD), i le $100NZ – pe a ma le $60USD.

O lenei lafoga e ta’ua o le IVL (International Visitor Conservation and Tourism Levy) sa fa’aulufaleina e le matagaluega o Leipa i le 2019, ma o tupe aoina o le a fa’aaogaina mo auaunaga lautele faapea mataaga mo tagata asiasi atu i le atunu’u.

O i latou o le a le auai i le totogia o lenei lafoga, e aofia ai tagatanu’u ma sitiseni a Ausetalia, ma nisi o motu o le Pasefika.  O le a le auai ai foi ma tagata faigaluega ia o lo’o malaga atu galuega faavaitaimi (RSE) faapea tagata e umi VISA faalemalo (diplomatic), vaega’au, fomai ma tausimai ma humanitarian.

Ae o i nisi o le a fa’amalosia ai lenei lafoga, e aofia ai tagata malaga mai i motu o Polenisia Falani, Niu Kaletonia, Wallis ma Futuna, Guam ma le atu Mariana.

Sa faamanino mai e Matt Doocey, le Minisita o Turisi i Niu Sila, ina ua fesiligia le mafuaaga o le a’afia o nisi, ae le a’afia nisi i lenei lafoga, sa ia ta’ua le le aofia o lenei mataupu (po o ai e totogi a’o ai e le totogi lafoga), i sa latou iloiloga lata mai nei.

Sa ta’ua e Doocey, o le lisi lava lea mai i le malo tuai.