Pago Pago - AMERIKA SAMOA

VA’AIA SE PA’U TEISI I TAU O TAUMAFA A LE TERITORI

Ua tolu nei masina soso’o, o va’aia e le vaega o lo’o mataituina tau o taumafa (Basic Food Index-BFI), le pa’u teisi o tau o taumafa a le teritori.

O oloa ua va’aia le aga’i teisi i lalo o latou tau, e aofia ai suka, muli pipi, ribs, apa inu, talo, fa’i, pisupo, vae moa, saimini (ramen) ma aisi kulimi.

O muli pipi sa pa’u i le $2.01 i le pauna, ae o le pork spare ribs na pa’u i le $1.88.  O le pisupo ua i lalo I le $5.50 ma le 10 pauna vae moa ua $18.15.

I isi masina na se’i mavae atu nei, sa tele ni taumafa na va’aia le si’itia o latou tau, e aofia ai fuamoa, sosisi, alaisa, pata, o apa tuna, o falaoa ma mayonnaise.

O le masina ua mavae na pa’u ai le tau o fuamoa, ae o lea ua toe aga’i i luga i le $2.93.  

O taumafa o lo’o tumau pea le tutusa o latou tau, e aofia ai vai taumafa ma le susu.

Ae ua fa’aalia mai le fa’aauau pea ona pa’u o tau o mea taumafa i lenei tausaga.

SAUNI SUI E SILIA MA LE 20 A AMERIKA SAMOA MO LE ‘DEMOCRATIC CONVENTION 2024’

Ua molimauina le to’atele o nisi o Amerika Samoa ua fa’aalia lo latou lagolagoina o le sui tava o Kamala Harris, lea o lo’o avea nei ma sui peresetene o Amerika, mo le tofi Peresetene i le palota ia Novema 2024.

O totino o le teritori ua fa’apea ona fa’aalia lo latou lagolagoina o Harris mo le Peresetene o Amerika ia Novema, e aofia ai Alex Briski, Nathaniel Savali, Tiana Trepanier, Faamasino Gaoia, Siimoa Galoia, Samalaulu Galeai, Patick Ti’a Reid, Petti Matila, Andrew Berquist, Sandra King-Young, Mikaele Etuale (alternate) ma Kimberly Lutu-Fuiava (alternate).

O Renee Dunson o le a avea ma sui o le ‘delegation page’ faapea ma le vaega a le autalavou.

E silia ma le to’a 20 sui mai Amerika Samoa o le a faapea ona auai atu i le fonotele a le itu Temokalasi lea o le a faataunuuina ia Aukuso 19-22 i le setete o Chicago.