Ads by Google Ads by Google

TALA I LE VAIFANUA


[ata: foa'i]

Pago Pago - AMERIKA SAMOA

ALOA’IA FANAU TALAVOU I ‘AU TENISI

Na aloaia i se faatasiga na faataunu’uina i le afiafi o le aso Toonai, Aperila 20, 2024 ia fanau talavou o lo’o i le Au Tenisi Laiti a Amerika Samoa, lea na toa’i taliu mai i se taamilosaga tenisi na faia i Tahiti ia Aperila 8-13, 2024.

E pei ona sa fa’alauiloa e le Failautusi a le ASNOC (American Samoa National Olympic Committee), sa taliu mai nei fanau ma le manuia i la latou taumafaiga i Tahiti, ma  ni pine auro se lua (2), o se pine siliva e tasi (1) ma le pine apamemea e tasi (1).  Ma sa o latou maua le tulaga tolu, mai i atunu’u e ono sa tauva.

O Tahiti na tulaga silia, ona soso’o ai lea ma Samoa i le tulaga lua, ae tulaga tolu ai Amerika Samoa.  O isi atumotu na tauva na aofia ai le atu Kuki, Norfolk ma Tonga.

Sa fa’aalia e Vaiala le maoa’e o le taumafaiga a nei fanau talavou i ta’aloga faavaomalo ma o le a avea lea tulaga ma fa’amalosi’au ma u’unaiga mo i latou, ina ia mafai ona fa’aauau ai pea ona fa’aleleia la latou taleni.

E to’a 13  fanau talavou sa mafai ona malaga atu i Tahiti, ma sa vaevaeina i latou ni vaega se tolu, e aofia ai i latou e i lalo ifo o le 12 tausaga, (U12), o le vaega e i lalo ifo o le 14 tausaga (U14) faapea ma le 16 tausaga (U16).

U12 Alii — Herman Thomsen, Tydeus Asalele, Jedi Leasau.

U12 Tamaitai — Joella Ioane, Aitulagi Godinet, Pale Leasau.

U14 Alii — Aifili Tamasoalii, Toa Godinet, Roland West.

U14 Tamaitai — Joelei Ioane, Alexandria Amor.

U16 Tamaiti — Florita and Tala Tupa’i.

I le ta’aloga a Thomsen ma Asalele, sa maua e i la’ua ia le tulaga lua, ina ua pa’u ia Tahiti i le sailiga siamupani.

I le ta’aloga a tamaitai U12, na tulaga tolu ai Amerika Samoa.

I ta’aloga a tamaitai taitoatasi U14, na manumalo ai le tamaitai o Joelei Ioane i le la ta’aloga ma le tamaitai o Maryallyson Va’ai mai Samoa.

Sa tulaga lua le alii o Aifili Tamasoalii i ta’aloga a alii U14 taitoatasi, i lana ta’aloga ma le alii mai i Tahiti.  O lea alii o lo’o toleni i Falani.

I le ta’aloga a tamaitai ta’itoalua (Doubles) U14, na siamupani ai Joelei ma Alexandria Amoa i le latou sailiga siamupani ma Tahiti.

Sa faapea foi ona faamanuiaina ia ‘au U12 lea na muamua mae’a a latou ta’aloga ma toe fa’asaga atu ai i se ta’amilosaga e ta’ua o le “Dragon Club Tournament”, lea na fetaui ai ma ‘au tenisi a Tahiti.

Na fa’aalia e le Peresetene o le Asosi Tenisi a Amerika Samoa (ASTA), le faletua ia Florence Wasko le le’i mafai ona auina sa latou ‘au talavou i ta’aloga o le Pasefika lea sa faia i le atu Solomona i le tausaga ua mavae, ona o le toatele o fanau talavou ia o loo’o ta’a’alo, e tele ina malaga atu i atunu’u i fafo pe a mae’a a’oga.  Ae o lo’o iai so latou faamoemoega, o le a mafai ona fofoina lea faafitauli, e ala lea i toleniga o le tele o fanau talavou ma maitau atunu’u o lo’o malaga atu ai i latou i atunu’u i fafo, ina ia mafai ona feso’ota’i i taimi e tu’ufa’atasia ai se ‘au mo ta’aloga i le lumana’i.

O lo’o ua sauni atu nei le aSTA mo Taaloga o le Pasefika ia Iulai 4-11, lea e faia i Fiti.

FAAPALEINA LE TAUSALA FOU A LE SOSAIETE A FAAFAFINE A AMERIKA SAMOA

O le po o le aso Faraile, Aperila 26, 2024, sa faamanatuina ai e le Sosaiete a Faafafine a Amerika Samoa (S.O.F.I.A.S) ia le 40 tausaga talu ona amataina a latou tauvaga tausala, ae o le 45 ai lea o tausaga, talu ona faavaeina lenei sosaiete i totonu o Amerika Samoa.

E to’afa ni tausala sa faapea ona tausinio mo le pale o le Tausala a le SOFIA 2024, na aofia ai Amelia Meke Lafaele, Ennayah Havea Topui, Janet Tanuvasa Aina, Neesha Barbie Misa, Uni Vyola Tanielu, ma Wendy MIsiluki.

O se po sa faatumulia i fa’aaliga la’ei matagofie aemaise o taleni maoa’e, na mafai ona faafiafiaina ai le mamalu o le ‘au valaaulia sa faatumulia ai le Fale Laumei i Utulei.

Ma i le faaiuga o lenei tauvaga faapitoa, sa faapea ona faapaleina ai ia le tausaga ia Uni Daniels, o le Tausala a le SOFIAS 2024-2025.

MALAGA MAI FA’ILI FUAVA’A A AMERIKA MO LE FAAMANATUINA O LE ‘JAZZ DAY’

O le vaiaso ua mavae, na taunu’u ai i laufanua o le malo tutoatasi o Samoa ia le fa’ili a Fuavaa a Amerika (U.S. Pacific Fleet Band) aua le faamanatuina o le “Jazz Day” lea e faamanatuina nei i Samoa (Aso Lua, Aperila 30).

Ma o le aso a taeao, Aperila 30, o le a faapea foi ona aloaia ai e Amerika Samoa lenei lava aso taua fa’alemusika ma ua faamoeoe o le a faapea foi ona auai mai ai lenei fa’ili lauiloa.  

Ua fa’ailoa mai e le faalapotopotoga a le SJAF (Samoana Jazz Arts Festival), o le a taunu’u mai le fa’ili i le taeao a taeao ae fa’ato’a toe malaga ese atu i le aso Tofi, Me 2, 2024.

E le gata ina o le a fa’afiafia lenei fa’ili i totonu o Amerika Samoa ae o le a faapea foi ona auai atu i nisi o polokalama eseese, e pei o fa’afiafiaga faatasi ma faiaoga ma fanau aoga o le Musika.  O le a o latou fa’afiafia faapitoa foi mo totino o vaega’au ma fitafita tuai, i totonu o le teritori ma o lenei fa’afuafuaga, o lo’o faamoemoe e faataunu’uina i le Paka Liona.

O le manulauti po o le faamoemoega o lenei polokalama i lenei tausaga, o le faatauaina lea o feutagaiga faaleatunu’u faapea ma le galulue faatasi i le faafaileleina o le galulue faatasi e ala i musika.

FA’AU’UINA TAUSIMA’I E TO’A 23 MAI I LE KOLISI A AMERIKA SAMOA

O le aoauli o le aso Lulu, Aperila 24, 2024 sa faatumulia ai le potu fono tele a le Ofisa o le Soifua maloloina i le ‘Georgina Building’ i uo ma aiga a i latou ua faapea ona faaiuina ma le manuia a latou aoaoga faatausima’i i le Kolisi a Amerika Samoa (American Samoa Community College).

E to’aluasefulu ma le tolu (23) i latou ua fa’au’uina mai i a’oga faa Tausi Ma’I ma ua o latou saunia nei e galulue i lalo o le vaavaaiga a Tausi Ma’i Pasi, i totonu o le LBJ po o le Ofisa o le Soifua Maloloina.

Mo i latou ua faamoemoe e ausia leisi la’asaga i totonu o le polokalama Tausi Ma’i, e mafai ona fa’aauauina a latou aoaoga i totonu o le ASCC mo a latou tusi pasi LPN/LVN.