Ads by Google Ads by Google

TALA I VAIFANUA


[ata: foa'i]

Pago Pago - AMERIKA SAMOA

ASO MALOLO MO LE TU’UGA FAUTASI

I se fa’aaliga fa’alauaitele mai i le Ofisa o le Kovana i le aso ananafi, na fa’alauiloa mai ai le avea o le aso Lua, Aperila 23, 2024, ma aso malolo, o se vaega o aso malolo mo le Sisiga Fu’a a le teritori.

E tusa ai ma le fa’aaliga na sainia e le afioga i le kovana Lemanu P. S. Mauga, o lenei aso malolo, e tu’uina ai le avanoa i tagata faigaluega o le malo o Amerika Samoa ina ia auai faatasi ma aiga ma tagatanu’u, e tapuaia le tu’uga fautasi, o se vaega o aso malolo o le Sisiga Fu’a a Amerika Samoa.

Se’ia vagana ai tagata faigaluega a le malo o lo’o gafa ma tautua mana’omia, o le a faapea ona malolo uma tagata faigaluega a le malo, mai o latou tiute, i le aso.

Ua faamaonia mai foi, e ala i se fa’aaliga mai i ofisa o aoga, le leai o ni aoga mo le aso.

E le gata i lea, i se fa’aaliga mai i le ofisa a le TAOA, ua fa’alauiloa mai ai le leai o ni taumafa e tufatufaina mo tama ma tina matutua o le atunu’u.

Ia manuia le Fa’agatama i le Tai i Sa uma o le atunu’u.

SAINIA E LE KOVANA PILI TAUFA’AOFI

Ua mae’a nei ona sainia e le afioga i le Kovana Lemanu P. S. Mauga, ia pili taufa’aofi e lua ia sa fa’auluina i le Maota Fono, mo le toe iloiloina i le Tauaofiaga Faapitoa lea sa tapunia ia Aperila 4, 2024, ina ua mae’a ona pasia e le Senate ma le Maota o Sui.

O le pili muamua, e mo le fa’asoasoaina o le $36 miliona, o tupe totoe mai le Tausaga Tupe 2023, e faatupeina ai poloketi eseese a le malo.  Ma o se pili sa tele ai ni fa’asea mai i afioga i Senatoa ma le mamalu lautele, ina ua le mulimulita’i le faigamalo i ala o le tulafono, lea sa tatau ai ona  fa’ao’oina muamua atu  lenei vaegatupe i le Maota Fono e fa’asoasoaina mai, ae e le’i fa’aaogaina.

Ina ua ulua’i faauluina lenei pili i le amataga o le tausaga, sa faapea ona te’ena e le Senate, ma i’u ai ina faaulufaleina sa latou iugafono ia Fepuari 6, 2024, i le Ofisa o le Loia Sili, ina ia faauluina se talosaga i le faamasinoga, mo le filifilia o se Loia Tutoatasi, e na te su’esu’eina le fa’aaogaina faalesolitulafono o nei tupe, lea ua solia ai le tulafono lautele #37-12.

O le masina ua mavae, na filifilia ai e le Faamasinoga Maualuga ia le alii loia o Aaron Warren mai i le ofisa loia a Mooney Wieland ma Warren, e avea ma loia tutoatasi, e su’esu’eina solitulafono i le tulafono o paketi, ina ua fa’aaogaina e le faigamalo ia le $36 miliona, e aunoa ma le pasiaina mai e le Fono Faitulafono.

I lana saunoaga i le tatalaina aloaia o le Tauaofiaga Faapitoa Lona Lua a le Maota Fono, sa fa’aalia ai e le Peresetene o le Senate, le afioga Tuaolo Manaia Fruean, le taliaina e le Senate o le talosaga a le kovana, ina ia pasia le pili mo le  $36 miliona, aua o lea ua o’o atu i luma o le Faamasinoga Maualuga le talosaga a le Loia Sili, mo se Loia Tutoatasi e su’esu’eina lenei mataupu.

I le Maga 1 o le pili, o lo’o ua ‘oto’otoina ai le fa’asoasoaina o le tupe:

1. Ofisa o le Kovana mo galuega i Tutuila ma Aunu’u - $21,550,000

2. Ofisa o le Kovana mo galuega i Manu’a - $10,450,000

3. Medicaid e fa’afetaui ai tupe maua mai fafo mo le Medicaid - $2,500,00

4. Ofisa o le Kovana mo iuga a le su’etusi i le fa’aaogaina o Tupe o Koviti19 - $1,500,000

O le pili taufa’aofi lona lua ua sainia foi e le kovana, e fa’asoasoaina ai le $700,000 o tupe maua mai tausaga faaletupe 2022 mo le tausaga faaletupe 2024.

O lenei vaegatupe o le a faatupeina ai le auai atu o Amerika Samoa i le Fa’aaliga o Tu ma Aganu’u a le Pasefika 2024 faapea ma le ‘Samoan Heritage Festival 2024”, lea ua faakalenaina mo Iuni o le tausaga nei, i Hawaii.

Ae peitai, e le o auiliiliina mai i le pili lona lua, i aofaiga ma’oti ua fa’asoasoaina mo polokalama eseese nei e lua.

Sa fa’aalia e le afioga i le kovana, lona agaga fa’afetai i taitai faapea sui faitulafono o Maota e lua, mo le pasiana o nei pili ma sona faamoemoega o le a mafai ona fa’aauau pea ona o latou galulue faatasi e tali mana’oga o le atunu’u.

OFISA KOVANA:  FA’AGASOLO PEA TAUMAFAIGA MO LE AVEA O AMERIKA MA TOTINO O LE ‘PIF’

I se fa’aaliga fa’alauaitele mai i le Ofisa a le Kovana, ua faapea ona te’ena ai se lipoti a le PacNews lea sa lomia i totonu o le Samoa News, i le vaiaso ua mavae, o lo’o ta’ua ai le fa’atui’ese o le malo feterale, i le avea o Amerika Samoa ma se totino o le Faapotopotoga a motu o le Pasefika (Pacific Islands Forum-PIF).

E pei ona ta’ua i le fa’aaliga fa’alauaitele a le ofisa a le kovana, o lo’o ta’ua ai le taunu’u mai i taitai o le malo o Amerika Samoa ia se faamaoniga mai i taitai o le malo feterale, le le moni o le lipoti e pei ona lomia e le vaega fa’asalalau mai Guam.

Sa ta’ua foi e le afioga i le lutena kovana, le tofa ia La’apui Talauega E. V. Ale, se imeli mai i le ofisa a le malo feterale, le faafoliga mai i le lipoti mai i Guam, e le o lagolagoina e le malo feterale taumafaiga a le teritori ina ia avea ma totino a le PIF, ma o se tulaga le moni lea tulaga.

Sa ta’ua foi e La’apui le mauaina e le afioga i le kovana Lemanu P. S. Mauga o se tusi fa’amalosi’au mai i le sui Failautusi o le malo tele, Daniel Kritenbrink, i le amataga o le tausaga, o lo’o fa’ailoa mai ai le mana’o o le malo feterale, e lagolago taumafaiga a le teritori i totonu o le PIF.

Ma talu mai lava lea tusi, ua fa’afia ona fono le ofisa a le kovana ma taitai o le malo feterale, e le gata i luga o upega tafa’ilagi, ae faapea foi i le laumau i Uasigitone.

Ua ta’ua i le imeli a le malo feterale i taitai o le teritori, ia le talanoa mai o le tusitala ia se tulafono ua leva, o se tulafono sa pasia ae e le i faia le faaiuga a le malo tele, e lagolagoina le avea o teritori ma sui vaai i totonu o le PIF, ma e le o gatasi ma le tulaga faalemalo o iai nei.

O le tausaga e 2011 sa taulimaina ai e Amerika Samoa ia ‘observer’ i totonu o le PIF.

Saunoa le afioga i le lutena kovana, o lo o iai nisi vaega e manaomia ona toe faaleleia atili ma le malo feterale, ae o lenei imeli e fa’amautuina ai lo latou lagolagoina o le auai o Amerika Samoa i totonu o le PIF.

Ma e ui ina o le faaiuga o lenei mataupu e taoto i luga o taitai o le PIF, ae o lo’o fa’aauau pea ona feutagai Amerika Samoa ma ona uso ma tuafafine o le Pasefika, i lenei vaitaimi a’o fa’aauau pea faagasologa o le talosaga.  

O lo’o sauni atu foi taitai o le malo mo leisi fonotaga o loma nei ia Aukuso, i Tonga.