FOTUTUPU LE AFIOGA - FANENE FETAIAILELAMALEMASINA EDDA KAVA WYBERSKI

Na fotutupu le afioga le Tei o le Ma'oputasi le Mauga Savalivali - Fanene Fetaiailelamalemasina Edda Kava Wyberski i lona itumalo ma le afio'aga i le maota  Gagamoe, Pago Pago i le taeo ananafi.

O le sauniga sa fa'atautaia i lona lava maota i Pago Pago ma ta'ita'ia e le susuga le Faife'au Baha'i i Pago Pago Amerika Samoa i le afiafi o le aso Lulu, na fa'apa'iaina ai lana nofo i luma fo'i o le afio'aga ma lona aiga. O lona o'o i le itumalo ma le fa'apa'iaga o le fa'anofonofo i le Itumalo na toto'o i ai a'ao o le afioga le Ma'oputasi, Mauga Tasiaeafe Asuega, le afioga le Aloali'i Afoe Moega Lutu ma le afioga le Ma'opu Fano M. Shimasaki.

I nei fo'i sauniga e lua, sa auai mai le susuga To'oa Malietoa ma le afioga Fa'amausili mai le motu i Tumua. Sa auai fo’i Sione Kava, o le So'oupu tofia a le Malo o Tonga i le va tu'itu'i nonofo ma le Malo o Amerika Samoa, lea na tomua ai fo'i fa'aaloaloga mai lea malo ma latou fo'i agaifanua a'o le'i alo ava le itumalo.

"Ona o pelega tau toto, ma ua maua'a ai fo'i se eleele e nonofo ma ola ai o matou nei tagata malaga mai Tonga, fa'afetai i le afioga le Ma'oputasi Mauga, ma le afio'aga atoa o Pago Pago, ona o le agalelei ma le alofa, lea fo'i e manatua pule ae le manatua fa'alaeo,” o se saunoaga manino lea a le susuga Sione Kava e fa'ailo le so'otaga tausoga o lo'o afua ai solivale le usualele a le itumalo ma le fa'anofonofo.

KAMUPANI FAUSIA TANE VAI UNA: TANK GUY

Ua fa'alauiloa e se kamupani fou i le Tafuna Industrial Park, le fausia Tane Vai Una mo le mamalu o le atunu'u.

I le latou taumafaiga, ua fa'alauiloa ai e le ali'i faipisinisi Tane Vai, Auga Farrell Craig, "O se tasi lea o filifiliga tatau e ao ina faia e aiga ta'itasi, aua o lo ua fausia fale lelei e ato apa e aoga i ai le aoina mai i le suavai mai timuga, ma fa'auia i tane vai nei e fa'aaoga mo le suavai taumafa a le aiga lava latou. O le a fa'asao mai ai fo'i le tupe mai le totogia o pili maualuluga o le suavai fa'alemasina."

"O lo'o taumafai lava ona gaosia mai a matou tane vai tetele nei mo aiga iinei lava, ma o le a taugofie ai mo tagata uma. O le faigata o le aumaia i fafo o tane vai una, ona e tele fo'i le totogi o pusa oloa tetele e la'uina mai ai, ona taugata lea i tagata po'o aiga ta'itasi o lo'o i ai le mana'omia."

"O le tatou soifuaga lava ia, e masani ona lutia i tatou i afa, ma afaina ai le suavai. Ua tatou tofo fo'i i le Galulolo tele, e sao ai fo'i le suasami i le tele o fa'atanoa o le suavai mama taumafa, peita'i o le suavai lava latou o le timuga, e matua lelei mo le tausiga o le soifua maloloina, pau o le mea ia lelei tapunia mai le namu e fa'apunafanau ai, ma e lelei ai la ituaiga tane vai nei ua tapena e le matou fo'i tautua."

I le taimi nei, ua fa'asalalauina fa'apitoa mai se latou tau fa'apitoa mo Tane Vai ua latou gaosia iinei, mo le aso Lotu a Tamaiti. Ua tima'i mai i latou, "Ia fa'asao le suavai ma fa'asao fo'i le tele o le tupe fa'aalu ona o le totogi o le suavai mai mita vai, ae fa'aaoga le suavai manino e fa'atali mai timuga, e ese fo'i lona mama."

Ua fa'ailoa mai le tetele o tane o lo ua gaosia ma fa'atau atu, ma e mafai fo'i ona e fesiligia se fesoasoani a le Kamupani Fau Tane Vai lenei a le Tank Guy Pago Pago Inc., i le tulaga e fa'atu ai lau tane vai ma se fesoasoani fo'i e togitogi ai lau pili atoa.

O lenei fo'i se fesoasoani tele i le aiga, pe a o'o ina lutia i tatou i le vaitau o afa e masani ai le atunu'u lea e amata mai ia Novema se'ia Aperila. O le mautu lelei o sau sapalai o le suavai manino mai timuga, o le a le fesouaina ai lou mafaufau pe a o'o i ni taimi tuga fa'apea i le atunu'u, ae palapala ai pe motusia fo'i le sapalai o le suavai mama mo le fofoga taumafa o lou aiga, ma le gaosiga fo'i o mea tausami ma isi uma mea e mana'omia ai le suavai.

Afai e mana'omia se isi fa'afesili e mafai ona vala'ai i le 699-2645 po'o le telefoni fe'avea'i 252-0118.

FEILOA'I AUMUA & LE SUI UNA'IA MATAUPU AMERIKA SAMOA I UOSIGITONE

O le susuga Mufi Hannemann, lea sa avea ma Pulenu'u o Honolulu i ni tausaga ua mavae, sa feiloai ma le sui o Amerika Samoa i le Konekeresi, Aumua Amata, i le vaiaso lenei i Uosinitone.

"O lea ua ma'ua feiloa'i fiafia ma Hannemann, o se alo o Amerika Samoa i Hawaii, e lelei fo'i le taumafai fa'atasi e una'ia pili mo i tatou i le laumua ma le Konekeresi, ae tatau ona ma'ua iloa lelei po'o fea o i ai le taumafaiga e lelei ai se sao mo le tatou atunu'u, i taimi uma,” o se tala lea a Aumua.

O Mufi Hannemann o le uso la'ititi o Gus Hannemann, o se isi fo'i sa iloga lana tautua mo le tatou Malo e feso'ota'i ai i so'o se mea ma le Setete o Hawaii. Ua atoa le 64 tausaga o le soifua o Mufi ma sa taumafai o ia e avea ma Sui i le Konekeresi a le Setete o Hawaii ae le'i malo lava, peita'i na taumafai mo le tofi Pulenu'u o Honolulu ma pale ai.

LE PASIA E LE FEMA: FAUSAGA O LE FAAVAE O LE FALEFONO FOU

O le fausaga o le fa'avae o le Falefono fou lea ua toe tula'i i le nofoaga tuai sa tu ai lea Maota muamua, ua fa'ailoa mai e le o pasia e le FEMA, ma ua tauau ai ina taofia atoa e le FEMA a latou fa'atupega mo lea galuega a le tatou Malo.

O le fausaga ua fa'apemita ona fausia le fa'avae, ae sa tatau ona fa'aputu aga'i i luga, ona agava'a lea mo le ituaiga eleele lea ua fa'atuina ai le falefono fou, eleele e lofia gofie i lologa.

O le susuga Robert Fenton o le sui mai le Ofisa tutotonu a le FEMA, sa ia fa'ailoa maia i sana tusitusiga ia Aukuso 20, 2018 i le kovana, "O le fausaga o le fa'avae o le Falefono Fou ua fausia, ua le usita'ia ai le aiaiga o tulafono tau fausaga a Amerika Samoa lava ia i eleele e a'afia gofie i lologa, ma ua fa'apea fo'i ona taofia ai ma le fa'atupega mo so'o se galuega toe fa'aleleia o mea uma na maumau ona o fa'alavelave fa'afuase'i na a'afia ai lo outou atunuu."

Ua ia fa'ailoa mai fo'i, "Ua iloga mai ua iloa lelei lava e Amerika Samoa o lo'o latou fausia lea falefou i luga o le eleele e a'afia gofie i Lologa VE."

Na fa'ailoa mai e le FEMA, na mua'i fa'ailoa atu e le Malo o Amerika Samoa o le ituaiga fausaga lea o lo'o fausia aga'i i ai le falefou lenei, ae o lea ua faia suiga ma ua iloga mai ua fausia i le ituaiga fa'avae e fa'aperomita, o se mea e le tatau ona faia.