Ads by Google Ads by Google

TALA I VAIFANUA


O le tamaitai o Tasi Pereira ua ia mauaina le fa’ailoga mo le vasega 12 mai le a’oga a Samoana ua ia fiafia fa’atasi fo’I ma ona matua ona o lea fa’aeaga mai le Tauvaga Tusigatala a le DOE. [ata: Leua Aiono Frost]

Le tamaitai o Aleynah Grey ma ona matua ua ia mauaina le fa’aioga mo le vasega 11 mai le Samoana High ma ua fiafia fa’atasi ma ona matua I lea fo’I fa’eaga ua ia ausia mai le Tauvaga Tusigatala 2021. [ata: Leua Aiono Frost]

Pago Pago, AMERIKA SAMOA

 

MANUMALO LE ALII O MARTIN PERESETENE – TAUVAGA TUSIATA MALOFIE

 

O le ali’i talavou mai le a’oga maualuga a Leone, Martini Peresetene ua ia mauaina le fa’ailoga muamua I le tauvaga tusiata a le Malofie Cngressional Art, lea sa fa’atautaia i le aso Faraile ua te’a i le DDW Restaurant i Utulei i le itula e 10:00 i le taeao.

 

Na tauva i lea tauvaga tusiata nisi o le aoga mai Aoga Maualuluga a Samoana, Tafuma, Fagaitua, Manumalo Academy, Nuuuli VocTech, Pacific Horizon ma Leone ma ua lautogia ai nei le galuega na fa’afao i ai a’ao o le ali’i talavou i lana ata sa fa’aulu mo lea fa’amoemoe maualuga, Martini Peresetene.

 

O le tusiga ata lenei o se tasi o poloketi aoga tele mo le fanau a’oga maualuluga o lo’o fa’atautaia mai lea e le Ofisa o le tatou Faipule i le Konekeresi Uifaatali Aumua Amata. O le ata foi e manumalo o le a fa’atautauina lea i le Ofisa o le Konekeresi i le Laumua o le Iunaite Setete o Amerika mo le tausaga atoa.

 

Na toe maua fo’i le tulaga lua e le tamaitai talavou mai le a’oga maualuga i Leone o Annamarie Luteru. O le tulaga tolu ua mauaina lea e Marie Kim mai Samoana High. O le Ofisa o le tatou Faipule ua latou va’ava’alua ma le Ofisa o A’oga a le tatou malo, ina ia fa’atautaia lea fo’i polokalama matagofie e fa’alauiloa ai le taleni Tusiata a le fanau a’oga maualuluga, una’ia atili ai lea taleni mo fanau, ma o le fa’alauiloaga sili ona maualuga o le a fa’aoo atu ai nei galuega lautogia, aua e fa’atautau lea i le Maota o le Konekeresi a le malo tele i le Laumua i Uosigitone DC.

 

O le sui o le matagaluega o A’oga e filifilia le ata manumalo, tulaga lua ma le tulaga tolu i tausaga ta’itasi. Ua fa’ailoa mai o le fa’amasinoga mo lea poloketi sa faia lea ia Apetila 09, 2021, ma ua i’u ane ai le fa’afitiga o aleaga, ua malo le ata sa galue ai le ali’i talavou o Martini Peresetene.

 

“Faamalo atu i le vasega o fanau uma sa tauva ma galulue malosi ina ia taulia lana galuega fa’atino i lea tauvaga. O le mea sili sa taumafai i ai fanau uma sa tauva, e sili lea i le manumalo. Ua iloga fo’i o outou manatunatuga aua ua fa’aalia mai lea i a outou galuega sa fa’aulu mo le fa’amoemoe lenei. Malo le galue malo fo’i le tauva fa’atausala. E le uma ai avanoa. Fa’amalo ia Martin Peresetene, lea ua pale mai i le manumalo,” o se tala mai lea a le tatou faipule Uiafaatali Aumua Amata e tusa o le fa’aiuga o le tauvaga tusiata a le Malofie Congressiona Art i lenei tausaga.

 

“O lo’u i ai I le Laumua ma le maota o le Konekeresi, e fa’afiafiaina au i taimi uma ou te galue ai, pe a tau la’u va’ai i ata nei, matagofie ma o galuega a alo o lo’u nuu pele lea e tatau ona ou va’ai toto’a i mea uma e ala atu ai fa’amanuiaga so’otaga ma le Malo tele. O a outou ata e fa’amanatu mai ai pea o’u faiva ina ia ou matua galue e fai, aua le fa’avaivai i mea tiga ae ia fa’aauau ona ola finau mo so tatou leleiga. E lu’ia ai lo’u tagata ia ou galue ma le fa’amaoni e tautua o’u tagatanuu o fa’atalitali mai. O se fa’amalosi lea mo a’u i aso uma,” o le tala lea a Uifa’atali e tusa o nei ata i lana va’ai i aso ta’itasi i le Laumua.

 

Ua ou fiafia tele e va’aia ua atili ona fa’ateleina i latou ua fa’aulu latou ata mo lenei tauvaga. Fa’afetai tele i matua mo le una’iga malosi o fanau, fa’afetai i faia’oga o lo’o tima’ia le fanau e fa’aulu sau ata mo lea tauvaga, fa’afetai i le Matagaluega o A’oga mo so’u avanoa matou te va’ava’alua ai mo lenei fa’amoemoe aoga mo le fanau ma le latou olaga taumafai i taleni eseese ua agava’a ai i latou mai le Atua o manuia. Faafetai i le fanau uma sa tauva, aua o lou faia o se galuega, ua e manumalo lava fo’i aua ua e fa’alogo ma usita’i e fai. Fa’afetai mo isi kamupani ma i latou sa latou foa’i mo le saunia o fa’ailoga mo lenei poloketi aoga. Tau ina ia tele nisi avanoa i le lumana’i mo le fanau e fa’aalia ai latou taleni i ala fa’apenei,” o le toe upu lea a Uifaatali.

 

Na tofusia uma i latou na tauva i le tusiga ata lenei ma le tusi pasi mai le Sui i le Konekeresi ona o le taumafaiga sa alofaiva i ai. Ua fa’afetaia fo’i e ia le mamalu o e na fa’amasinoina lenei tauvaga tusi ata; Whiney Chen, Ammon Fepuleai ma Diana Pelini.

 

FA’ATALIA PEA LE TUFATUFA MAI STIMULUS $1,400

 

Ua lipotia mai o lo ua fa’amae’ae’a lelei nei le fa’atulagaga o le a taua’ao mai ai le Stimulu fou, lea ua mae’a pasia mai fo’i e le IRS, ma ua iloga mai e ono fa’auia mai i le mamalu lautele i le amataga o le masina fou, Me 2021, pe a tuai lava.

 

O le siaki lona tolu lenei o le stimulus e $1,400 mo le tagata toatasi e agava’a pe afai e faila na o ia le lafoga. 

 

O le fonotaga a le kovana ma lana kapineta i le aso Tofi ua te’a, na saunoa ai le lutena kovana, Talauega Eleasalo Ale ma tima’ia mai ai le mamalu o fa’atonu o le Kapeneta, ina ia fautuaina lelei o latou tagata faigaluega ia teu nei tupe tele i teugatupe teu mau, e alu tausaga ma tausaga ae fa’ato’a fua mai ua fa’ateleina atili lea vaega tupe tele o le a maua fua mai le Malo tele.

 

Lea la ua toe o se aga o tatou mauaina nei fa’amanuiaga, ia fai fa’alelei le fua fa’atatau o lou aiga, ona fa’ato’a fa’aaoga ai lea o le siaki. Mo le aiga e to’a 10 e maua le  $14,000. Mo le aiga e to’alima e maua le $7,000.

 

I le taimi nei o lea ua feutaga’i le Ofisa o le Tupe a le tatou Malo ma faletupe e lua ua i ai nei i le teritori, ina ia mautu lelei lea sootaga mo le tautuaina o le mamalu lautele i taimi e maua ai siaki stimulus.

 

Ua fa’ailoa mai fo’i, o le a i ai se taimi e tuuina mo le toe siakia uma lava o sui o le a agava’a mo nei siaki Stimulus, ae le’i oo ina tufatufaina atu siaki i pusa meli.

 

Ua fa’ailoa atu i faletupe ina ia lava ma totoe le seleni i o latou lma mo lea fa’amoemoe, Ia le tele se taimi e alu mo le tautuaina o le tagata e to’atasi, o lo’o tala ma teu a latou tinoitupe nei.

 

O lo ua feutaga’i fo’i ma le falemeli i le vaitau tonu e ao ina fa’aleleia atli ai fo’i le latou tautua aua o le a tele le siaki e tatau ona tuu sa’o i pusameli ua tusia a tagata taiito’atasi. Sa maua lava nai nisi tagata ua tuu sese a latou siaki i pusa meli a isi.

 

“Ua fautuaina o tatou tagatanuu uma o le a agava’a i lenei fa’amanuiaga, va’ai toto’a ia fa’asoa lelei lau seleni o le a maua, o se faamanuiaga e le aumaua lenei ua tatou i ai i nei tausaga, ia fa’asoa i le teumau o le seleni e alu aso ae sau aso e talia lava lou maelega i le fa’asoa lelei.”

 

“Aua nei o tatou nonofo ai ma galuega ona ua lava le seleni e tausi aiga aiga ma totogia ai pili mo sina taimi e le tumau, o le galuega lava ia e tali mai I se taimi umi a’o maua pea le malosi o le tino e galue ai ma faia tiute i galuega. Fa’amaoni ma ia va’ai toto’a i le lumana’i o lou aiga, e le na’o sina vaitaimi ae o le olaga atoa,” o se tima’i lea a Talauega.