Ads by Google Ads by Google

TALA I VAIFANUA


[ata: foa'i]

Pago Pago, AMERIKA SAMOA

 

FA’ATULAGA  PILI TOTOGIA - TAGATA MALAGA MO LE NOFOVA’AVA’AIA

 

Mai le Aso Lua na te’a nei ua fa’amanino atili mai ai e le Ofisa o le Medicaid i le mamalu o e fia malaga mai i malaga e toe fa’afo’ia mai ai o tatou tagatanuu mai fafo i le atunuu, lea ua fa’ailoa atu ai le $500. mo le tagata malaga e to’atasi.

 

O le aumalaga o lo’o sauni e malaga atu i fafo mai le tatou atunuu ia Mati 10, 2021 ua le aofia i lea pili totogi. Ua fa’ailoa mai e totogia lava na’o lau $662.mo lea malaga ia Mati 10, 2021.

 

Peita’i o i latou uma sa malaga mai le malaga fa’ato’a mae’a nei, Fepuari 01, 2021 ua fa’ailoa atu ina ia totogia latou pasese i le Ofisa o Tupe a le tatou Malo. O i latou nei e ao ina totogia le $500. 

 

Pe afai e le’i mae’a totogia e oo mai i le taimi nei:

 

• Fa’auia atu ia te oe se kopi o le pili e ao ina totogia i lau emeli sa tuuina mai.

Lolomi sau kopi o lea pili ma ia e o’o ane i le Revenue Office o le Ofisa o Tupe a le tatou Malo e faia ai lau peimeni.

Pe afai e mae’a totogia lau pili, e latou te taua’aooina ane ia te oe sau risiti, mautinoa ua e te sainia lau lisiti.

Fai sau kopi o lau lisiti ma le kopi o lau pili ua totogia ma fa’aoo ane i le Ofisa o le Medicaid pe na’o na emeli ane i le tuatusi o le Medicaid reptriation@medicaid.as.gov

 

Mo i latou o lo’o i fafo ma e mana’omia ona totogia le latou siea lenei o le fia malaga mai i le va’alele ia Mati 10, ua talosagaina e le Medicaid ina ia outou galulue fa’atasi ma outou aiga lea e nonofo i Amerika Samoa nei, e latou te fesoasoani e totogia lau $500.i lou malaga mai ai i le faigamalaga lona lua e toe fa’afo’ia mai ai tagata o le atunuu sa taofia i fafo ona o le fa’asa o le Covid-19.

 

Pe afai e le mafai ona e faia lea sootaga ma lou aiga i Amerika Samoa, o le a taua’aoina atu se pepa talosaga ia te oe i Honolulu e te sainia, ma e fa’ailoa atu ai e te faia lau peimeni pe afai o le a nofova’ava’aia i Amerika Samoa. Pe afai o le a e le sainia lena maliliega, e tauau la e toe te’ena oe mai le malaga mai i lea malaga a le va’alele Mati 10.

 

O i latou uma sa pasia mai e le LBJ e malaga i le polokalama o le Medical Referral, e totogia latou saoga na e le LBJ Medical Center poo le Medicaid:

 

(1) Gasegase e fa’ato’ai ma pasia mai e malaga e le LBJ -.O gasegase uma ua aofia i lea polokalama ona ua fa’atulaga mai e le LBJ ao le’i oo ia Mati 26, 2020, e tatau ona toe fa’afeso’otai nei e outou le falema’i, Ofisa o Gasegase Siitia i Falema’i i fafo mo togafitiga, ma talosagaina latou pepa fa’amaonia ia fa’atumuina ma fa’ao’o ane i le Ofisa o le Medicaid.

 

(2) I latou ua fa’atulaga e le Medicaid mo le Malaga – O gasegase uma na e totogia lava latou ia peimeni e le polokalama a le Medicaid. Emeli ane i le omr@medicaid.as.gov  po’o le  repatriation@medicaid.as.gov  ina fa’ailoa pe fa’amanatu ane ia i latou na o lea e te malaga i le va’alele lea.

 

O outou uma fo’i nei e ao ina fa’auia uma ane outou pepa fa’atumu ma isi uma aiaiga o a outou avanoa e malaga ai, fa’atasi ma aso ua fa’atulaga mo outou talavai i a outou foma’i o le a va’aia i fafo mo le silafia ma le fa’amaoniga o outou avanoa e malaga ai e le Ofisa o le Medicaid.

 

Pe afai o le a le mautu uma ane nei mea uma i le Ofisa o le Medicaid, ua mautinoa la e oe le ua malaga, e le toe maua sou avanoa e te toe taliu mai ai i le polokalama pe a mae’a au talavai o mo’omia. E i ai nisi fa’afesili, vala’au i numera 699-4778 ma le 699-4779 mo le Ofisa o le Medicaid.

 

TOE FA’AFOI MAI PASESE SA TOTOGI I LE HAWAIIAN AIRLINES

 

Ua fa’alauiloa e le Kamupani Va’alele a le Hawaiian Air ua mafai nei ona toe fa’afo’ia mai e le latou Ofisa pasese sa totogia mo faigamalaga uma lava sa le taunuu ona o le fa’asa o femalaga’iga talu ai le Covid-19. O nei uma pasese ua mafai ona e oo ane i le Ofisa Autu o le Hawaiian Air i Honolulu po’o Amerika Samoa fo’i e toe fa’afo’i ane ia te oe.

 

O lo ua i ai le fa’atulagaga fa’apitoa ale Hawaiian Air, o le a mafai ona toe fa’afo’ia atu ai nei pasese mo le mamalu o le atunuu sa tatau ona malaga, ae ua le mafai ona o le fa’asa.

 

Ua mafai fo’i e le to’atele sa fa’aaogaina so’otaga fa’ainiteneti e totogia mai ai latou pasese ona toe talosaga latou pasese toe fa’afo’i atu i na lava sootaga, ae a le mafai ona oo ane lea i se ofisa va’alele a le Hawaiian Air i le setete poo le teritori o e alaala ai.

 

E mafai foi ona fa’aaogaina nei vaega o pasese e le’i fa’aaogaina e totogia ai lou saoga mo le ta’i $500. o le nofovaava’aia lea e tatau ona toe totogia e le tagata malaga. Mo i latou sa totogia K-Fares e malaga ai, e na’o le sui e ona le K-Fares e mafai ona toe talosagaina lou tupe lena e toe fa’afo’i atu ia te oe, le sui na fia malaga.

 

SE’EI FAIPULE O AMERIKA SAMOA - KOMITI A LE INSULAR AFFAIRS:

 

Ua fa’ailoa mai ua se’ei nei le afioga Uifaatali Amata Radewagen i nisi o Komiti taua tele aua latou te mataituina fesoasoani mo le tatou ma isi fo’i teritori o le malo tele. I le taimi nei ua lua komiti taua lava ua avea ai o ia ma “Sui Taitaifono” ae o komiti aoga tele fo’i ia i tatou. O le komiti o le Veterans Affairs ma le Komiti o le Insular Affairs.

 

Ua fa’ailoa mai na tofia o ia e le vaega a le Repapilikana ina ia avea ma sui ta’ita’ifono o le Insular Affairs o se tasi o Komiti atoa lava i totonu o le Komiti a le Natural Resources a le Konekeresi.

 

E i ai nisi o mataupu taua o lo o fa’aauau ona suesueina i le Natural Resources i le vaiaso nei, ae ua tauau e le toe avea o ia o se sui totino o le Komiti mo pisinisi laiti, o se tasi o Komiti sa Sui Taitaifono ai fo’i le tatou Faipule i le nofoaiga ua te’a atu.

 

Peita’i o lona tofiga ua i ai nei i le Komiti o le Insular Affairs ua avea lea ma se avanoa lelei tele mo ia, e na te mataituina ai nisi o mataupu e ogaoga tele i le atina’e o lo tatou nei malo, o lona fatu lea na mafua ai ona fia tautua, lea e aofia ai “faigafaiva, le ‘amu ma a’au ma isi lava mataupu ogaoga tau le Siomaga ma le Gataifale ma alamanuia e fa’aleleia ai le tamaoaiga tausi o Amerika Samoa ma isi teritori o Amerika i le Pasefika.”

 

Ona o lea fo’i ua fa’aopoopo atu i ai ma lona avea ma Sui Taitaifono i le Komiti a le Veterans Affairs, o lea la ua tula’i mai lenei vaitausga o se vaitau ua mafai ai ona mataituina ma talanoa le tatou faipule i le Konekeresi i mataupu ua tele ona mo’omia ai lona leo ma feutagai mo tatou tagata ma le tatou malo.

 

O nisi o komiti e pei o le Ways & Means ma le Enetia & Fefa’ataua’iga, e tele fo’i so latou sao i nisi o mataupu e talanoaina ai lafoga totogi ma le tupe fa’afetauia mo le Mediaid a le atunuu, o nisi o mea e aoga tele fo’i ia i tatou i Amerika Samoa.

 

O lona avea ai ma sui taitaifono i nei komiti e lua, o le a avea ma ala e mafai ai ona saunoa le tatou faipule, e tusa o mea o mana’omia ma aiaiga tamau o na mataupu ua leva fo’i ona nofo tapena i ai o ia mo le atunuu.

 

SAINIA KOVANA TUPE FA’ASOA TAUSAGA FA’ALETUPE 2021

 

Ua mae’a sainia nei e Kovana Lemanu P. Mauga lana ulua’i pili o le Tupe Fa’asoa 2021, ma ua fa’atulafonoina ai lona fa’aaogaina i lona aofaiga e $465.9miliona.

 

O le tupe fa’asoa lava lea o le 2021 na talosagaina e Kovana Lolo Moliga, peita’i na te’ena e le Fono Faitulafono lea aotelega, ma latou to’esea ai le $6miliona ae le’i talia ai e Kovana Lolo Moliga lena suiga, ma sa ia toe fa’afo’ia i le fono e toe iloilo. Na sainia e Kovana Lolo sana poloa’iga fa’amalosi ina ia fa’atupe ai le Malo a’o toe iloilo le fono faitulafono le paketi fa’asoa o lenei tausaga.

 

O le nofoaiga lona 37 lenei a le fono faitulafono ua latou toe iloiloina le paketi fa’asoa 2021, ma ua pasia ai e i latou e aunoa ma se suiga i le aotelega o le tupe fa’asoa.

 

Fa’afetaia e le kovana taitai o le Fono i le galulue fa’atasi ma le malo mo le pasiga o lea tupe fa’asoa aua le fa’agaoioiga o le Malo i ona vaega ta’itasi. Ona o le latou vave pasia mai o le tupe fa’asoa ua fa’amama avega i le tele tiute o le Malo e ao ina fa’atino mo tatou tagata lautele ma tuatua eseese a le Malo e ao ina fa’ataunuu.

 

“Fa’afetai aua ua iloga mai, o lo’o tatou tutu fa’atasi e fa’atino le auaunaga e tatau ona maua e o tatou tagata uma, ma ua faia fo’i la outou vaega e pei ona fa’atulaga ai e le fa’avae o le tatou Malo. O le agaga o le soofa’atasi o tautua, e tatau ona muamua i mea uma, ma ia fa’aauau ona faia mea tonu uma. Avatu ai le fa’afetai tele ma le agaga maulalo i le mamalu maualuga o maota e lua o le tatou fono faiatulafono,” o se vaega lea o le tusi a le kovana i taitai o le Fono.