Ads by Google Ads by Google

TALA I VAIFANUA


O le foa’i a Lealaifuaneva Peter E. Reid Jr. mo le aoga tulaga muamua a St Theresa i Malaeloa na taua’aoina lea e le tamaitai o le fanau a fanau a le afioga le Faipisinisi a’o le Senatoa fo’I o le fono faitulafono e silia ma le 20 tausaga o lona soifua, le tamaitai o Annaura Florence Reid-Gillet I le afioga Epikopo Peter Brown, le Pule Aoga o lea Laumua J. Victor Langkilde, ao maimoa ai fo’I le Pule Aoga o le Fatuoaiga Montessori o Maria Telesa, le  Peresetene o le  Lealaifuaneva Peter E. Reid Charitable Foundation, Olivia Cecilia Reid, ma le pule aoga o le  Marist St Francisi Elementary o Sister Palepa Aukusitino. O le agaga fa’afetai tele sa tuuina ai I sui mamalu o le Foundation. [ata: foai]

Pago Pago, AMERIKA SAMOA

 

FOA’I LEALAIFUANEVA PETER. E. REID FOUNDATION MO LE PULEAGA SAMOA PAGO PAGO

 

I le ulua’i vaiaso o le tausaga 2021, na mae’a toina atu ai e le Lealaifuaneva Peter E. Reid Foundation meaalofa tupe i nisi o vaega o le Ekalesia Katolko i le Pule’aga Samoa Pago Pago, fa’apea ma le Boys & Girls Club of American Samoa, {BGCAS}ma ua aotelega nei foa’i uma e maua ai le $89,200. O se foa’i ua iloga ona aoga tele mo le tupulaga talavou i le atunuu, ma ua faia fa’aletausaga fou e le Lealaifuaneva Peter E. Reid Foundation nei fo’i ma le agaga fiafia.

 

O le tamaitai Taitaifono o le Komiti Taiulu i Pisinisi uma a Lealaifuaneva Peter E Reid, fa’atasi ai ma le Charitable Foundation lenei, Olivia Cecilia Reid, sa ia fa’ao’o ane nei foa’i taua i le afioga Epikopo Peter Brown mo le Pule’aga Samoa Pago Pago, fa’apea fo’i ma le Pulega a le Boys & Girls Club i Amerika Samoa.

 

O le foa’I na taua’aoina mo le Hope House i Fatuoaiga e Olivia C. Reid e $21,000. O se vaega tupe ua mafai ona foa’ia e toe fa’aleleia atili ai le nofoaga i galuega lipea, ma fafo fo’i i le tino mai o le nofoaga. O se saunoaga fo’i a Larry Sanitoa le ta’ita’ifono o le Komiti Fa’afoe o le Hope House, sa ia fa’ailoa ai, “O lo’o taumfai nei ona fa’aleleia atoatoa le nofoaga lenei ina ia mafai ona pasia mai o le pau lea o le nofoaga o lea ituaiga tautua i le atunuu. E i ai vaega tupe e toina mai e le Malo pe afai e pasia lenei sailiiliga o le agava’a o le nofoaga mo le tautua o latou fa’atino e aofia ai ma tomai o i latou o galulue ai, ia talafeagai ma ituaiga tausiga e moomia mo tagata ma’i tumau o le tino ma le mafaufau, ma tagata matutua fo’i ua tausia fa’apitoa.”

 

O lea foa’i ua fa’aagaaga tonu i lea tuamafaiga ina ia sologa lelei le fa’atinoga o le tausiga o i latou ua nonofo i le Hope House.

 

O le meaalofa lona lua na taua’aoina fa’apitoa i le Puleaga Samoa Pago Pago, e fa’apitoa lea mo le A’oga Tulaga Muamua a St Theresa i Malaeloa. E $16,000. ua mana’omia lava mo ni kesi ma nofoa e fa’amau fa’atasi, ia fa’afaigofie mo le fanau aoga ona fa’aaogaina.

 

O le foa’i lea mai le Lealaifuaneva Peter E. Reid Jr Foundation, ua tali ai lea manaoga mo le 100 nofoa ma kesi e fa’amau fa’atasi.

 

O le foa’i lona tolu o lo ua fa’atutu lea mo Marist St Francis Elementary ma na taua’aoina aloa’ia ai le $8,100.

 

O le a fa’aaogaina lea e fausia ai se ala sima ma ia fa’amaluina ai fanau pe a feoai mai le Falea’oga fou ua mae’a tatala ma fa’aaoga e soso’o mai i le falea’oga tele, o lo’o i ai isi potu a’oga, e mautu ai le malutia o le fanau mai timuga ma le vevela o le la, ae o feoa’i i a latou vasega.

 

O le foa’i mulimuli na taua’aoina mo le Pule’aga Samoa Pago Pago, o le foa’i lea mo le Montessorii Fatuoaiga e $15,000. Ina ia fausia ai se pa uaea e siomia ai le nofoaga mo aoaoga a fanauiti o lo’o autova’a atu e amata aoaoga i lea nofoaga. O le foa’i lea e agaga i le saogalemu o le fanau ia mautu lelei pe a oo ina molita’i atu mo a’oa’oga i aso ta’itasi e faia ai aoga.

 

Mo nei foa’i uma na faia mo vaega eseese o le Pule’aga Samoa Pago Pago sa auai ane lava pule a’oga o nei a’oga ta’itasi fa’apea ma le Pule o Galuega a le Hope House ina ia latou fa’afetaia ma molimauina le a’ao foa’I o le Lealaifuaneva Peter E. Reid Foundation, lea o lo’o fa’aauau ai pea le tautua a lenei tama iloga i le atunuu, e afua mai i ana pisinisi sa fa’atutuina, o lana auaunaga i le Malo o Amerika Samoa o se tasi o Senatoa o le Maota Maualuga o le fono faitulafono, ae o lona agaga fo’i i tupulaga talavou i lona sao i ta’aloga ma fa’agatama e fiafia ma agaga i ai talavou, ae o lana tautua i le lautele e ala i auaunaga a ana pisinisi o lo ua fa’aauau iona faatautaia e lana fanau o soifua mai pea.

 

O le aotelega o le foa’i lava latou mo vaega eseese nei ole Pule’aga Samoa Pago Pago o le Ekalesia Katoliko Roma e $60,100 ma ua latou talisapaia lenei meaalofa tele ua foa’ia ae a le manatu i fanau a le atunuu ia mafai ona aoaoina lelei ma ia saogalemu i latou i nofoaga o a’oaoina ai, ia malutia fo’i mai timuga ma le vevela o le la ao feaoa’i i a latou vasega.

 

Mo lenei foa’i, sa amata fa’aaoao ai fo’i le tamaitai o Annaura Florence Reid-Gillet, e vaai i le galuega o lo’o fa’atino pea e le latou Fa’alapotopotoga o Foa’i e ala i le tautua a lona Tua’a Lealaifuaneva Peter E. Ried Jr. O ia lea sa taua’aoina foa’i mo a’oga a le fanau o lo’o fa’atautaia e le Pule’aga Samoa Pago Pago.

 

O le foa’I mulimuli sa fa’atino lea e le Fa’alapotopotoga o Foai Lealaifuaneva Peter E. Reid Jr. mo le Boys and Girls Club o Amerika Samoa i Tafuna. O le aotelega o lea foai e $29,100 lea fo’i ua mae’a lipotia atu i le lomiga o le aso Gafua na te’a nei o le Samoa News Le Lali.

 

Ua aotelega ai le foa’i atoa na faia I le uluai o vaiaso o le tausaga 2021 e lenei fa’alapotopotoga agalelei ma le lima foa’i, i le $89,200.

 

NISI TOFIGA KOVANA MO SUI FA’ATONU & SUI SOOUPU MA LE FONO 

 

O lo ua I ai nisi tofiga fou ua fa’aulu mai e Kovana Lemanu Peleti Mauga e avea ma fa’auluuluga o matagaluega ua fa’atulaga ai. O le susuga Misipati Salanoa ua tofia mai e avea ma Sui Fa’atonu o le Pulega o le Ofisa o le Enetia a le tatou Malo.[TEO] Ua fa’ailoa mai e ia, ua i ai lona talitonuga atoatoa o lo ua ia Misipati Salanoa le agava’a ma tomai e fa’atuatuaina ai e le faigamalo lana ta’ita’iga o lea Ofisa i lenei vaitau o le fesuia’iga o le faigamalo.

 

Ua fa’atonuina fo’I e ia le matagaluega ma fa’auluuluga uma o isi matagaluega, ina ia galulue fa’atasi ma Misipati Salanoa, ia fa’afaigofie galuega uma e feutgaia i le va o i latou ma lea matagaluega, ia aluga lelei ona fa’afoe galuega uma e tatau ona fa’atino mo le Malo o Amerika Samoa ma ona tagata lautele.

 

O isi tofiga ua tuuina mai o Sui So’oupu a le Faigamalo ma le Fono Faitulafono i ona maota e lua, Le Senate ma le Maota o Sui. Mo le Maota o Sui ua tuuina mai ai suafa o loo ua tuuina mai ai le tofa Fiu Saelua ma Gafatasi Afalava latou te soo tauau i so’o se taimi e mana’omia ai ona feso’ota’i atu ma le faigamalo, i mataupu e aoga mo le aga’i i luma o le faigamalo ma le galulue fa’atasi ai ma le fono faitulafono ina ia mautinoa o tautuaina tagata lautele, ma le malo fo’i ia aluga lelei mea uma.

 

Mo le Senate ua fa’atulagaina ai e Kovana Lemanu Peleti Mauga le to’atolu o sui iloga, le tofa le Tula Malosi Moananu Vaiala, Paogofie Fiaigoa ma Sialega Tuiga Jr.

 

O i latou fo’i nei e mafai ona faafeso’ota’ia le faigamalo i so’o se mea e finagalo i ai afioga mamalu i Senatoa ma le Peresetene o le Senate, Tofa Tuaolo Eddie Fruean, i soo se mea e finagalo e ao ina fa’ailoa mai, pe a tima’ia ai fo’i le faigamalo. E ao ina aofia i latou i so’o se taimi e tauaofia ai le Senate ma ona Komiti Taitasi i taimi uma.

 

E ese mai lea ua fa’alauiloa mai fo’i i sana poloaiga fa’alauaitele le aso malolo i le aso Gafua a sau nei, e fa’amamaluina e le malo tele lea aso malolo, ma ua fa’apea fo’i ona fa’amamaluina e le Malo Tele ma ua auau fa’atasi atu  tatou uma ina ia fa’amau fa’ailogaina lea aso na atofa fa’aletulafono mo Martin Luther King Jr, Ianuari 18, 2021.

 

Ua tapunia uma fo’i matagaluega o le Malo ma e le faigaluega uma fo’i le aufaigaluega a le malo se’i vagana ai i latou uma o lo’o ua aofia i e fa’atinoa galuega ta’imua mai i le puipuiga lautele o le atunuu, ae maise fo’i o le tausiga o le soifua maloloina o le atunuu. O le a totogia fo’i i latou i le totogi e talafeagai ma le faigaluega ai i aso ua malolo uma le isi to’atele o le aufaigaluega a le Malo.