Ads by Google Ads by Google

TALA I VAIFANUA


[ata: foa'i]

Pago Pago, AMERIKA SAMOA

 

SUIA LE ASO MALAGA A LE VA’ALELE  -  $911 TOTOGI O LE PASESE

 

Ua toe suia teisi le aso o le malaga ua foufou nei e alu i Hawaii mo i latou e si’ima’i ma e fia faia talavai i Hawaii ma isi setete uma o Amerika, ona o le fuafua patino lea i aso e mafai ai ona agava’a ali’iva’a a le Hawaiian Air e malaga mai mo lea malaga taua.

 

“Ina ia mafai ona faia tui lona lua o pailate a le Hawaiian Air, maua mai ma i’uga o latou tui suesue po’o a’afia i le Coronavirus, ona fa’ato’a mafai lea ona malaga mai e fa’afoea le va’alele mo lea malaga taua, o le ala lea o le toe tolopo teisi lava o le faigamalaga mo le aso e tasi,” o se tala le ale tamaitai fa’atonu o le Meficaid Office, Sandra King Young.

 

Ua fa’atulaga o lea malaga togipau o le a fa’ataunu’uina i le aso 13 o Ianuari, 2021 ae le o le as 12 o Ianuari, e pei ona taua muamua. 

 

Ua fa’ailoa mai e leai ni uta mo le aumalaga, o lea e leai fo’i se eseesega o le pasese ua fa’atulaga mai, e totogia lava le pasese mo le malaga atu e $911.

 

O le aso Gafua na te’a nei, Tesema 28, 2020 na amata ai ona gasolo atu le pasese o fia malaga e totogia le latou pasese I le Ofisa o le Tupe a le tatou Malo. E muamua ona pikia mai e i latou pepa fa’atumu mai le ofisa o le Medicaid i le Faletele o le ASTCA i Tafuna fa’atoa asia ai le Ofisa o le Tupe mo le totogia o lea pasese.

 

Tuuina mai le vaiaso atoa e tasi mo le totogia o pasese o i latou uma e fia malaga i lenei malaga mo Hawaii, a le gafatia ona tuuina lea o le avanoa mo nisi e fia malaga ma gafatia le pasese ua tuuina mai.

 

SAINIA PERESETENE TRUMP – STIMULUS TAI $600 FA’ATULAFONOINA

 

E ui ina naunau Peresetene Trump ia maua e tagata ta’itasi le $2,000 ona maua lea o le $4,000. mo aiga ta’itasi, ae ua pasia e le Konekeresi e na’o le $600  a le matua e to’atasi, $1,200. a le aiga e to’alua matua o i ai.

 

O le aotelega o le tinoitupe ua maea sainia nei e Peresetene Trump mo lea fa’amoemoe e $2.3 turiniliona ua fa’aagaaga mo stimulus mo aiga taitasi o le Iunaite Setete ma ona teritori.

 

O lona uiga e aumaia le ta’I $600. o siaki stimulus, PPP ma nogatupe e fesoasoani mo pisinisi laiti, tupe mo a’oga ma tautua eseese mo fanauiti, tupe mo le aufai faiva, ae maise fo’i o le fa’atupega mo le fa’atautaiga o tuiga o Tui Puipuia o le Coronavirus i so’o se setete ma teritori.

 

Ua fa’asalalau i lipoti mai Amerika, o le a amata ona maua le tinoitupe lea mo i latou e le o faigaluega ia Mati 14, 2021 ae amata ona taofia ona toe fa’atula’ia se tasi mai nofoaga ona ua le gafatia ona totogia latou lisi ia Ianuari 31, 2021.

 

Mo Teritori ua atofa mai ai le $614 miliona mo le polokalama e fagaina ai tagata lautele, ae ese ai le $300 miliona mo nei teritori uma e fa’atutu mo le polokalama a le au faifaiva.

 

Ua fa’atulaga ai ma le 3% o le siitaga o totogi mo e uma o lo’o tautua i vaega au ma ua sitia ai le tinoitupe e fa’atautaia ai le malo o Amerika Samoa i le isi $500,000, na sailia mai e le tatou faipule i le Konekeresi Uifaatali Aumua, ae ese ai le $3miliona e fa’aopoopo mai na talosagaina e le Vaega a le Initeria mo Amerika Samoa.

 

Ua toe fa’aopoopo mai ma le soso’oga o le lafoga lea e aoga tele i le auina atu o oloa fa’atau atu i fafo a le tatou Kamupani I’a, ua manuia lava taumafaiga a Amerika Samoa i lenei vaitau.

 

LEAI NI FA’ALELEI ELEELE MO FA’ATO’AGA I AMERIKA SAMOA

 

Ua molimauina e nisi o le aufaifa’ato’aga, ua matua leva na’ua ona taofia le toe fa’atauina mai o ni latou fetilaisa poo maniua po’o fa’alelei eleele mo latou fa’ato’aga iinei, ma o se mea ele faigofie ona toe amata fa’atauina mai e i latou ua fa’akonekarate e le Matagaluega o Fa’ato’aga, aua e umi se taimi e fa’atali ai oka nei.

 

Ina ua fa’afeso’ota’ia le Kamupani sa fa’akonekarate e le Matagaluega o Fa’ato’aga e sapalaia le vasega o faifa’ato’aga I nei oloa e taua tele mo fa’aeleeleaga ia fua lelei mai, sa fa’ailoa e lea Faioloa, “Na taofia mai le taimi na fa’amalosia ai le fa’asa mo le Coronavirus ia Mati 2020 ona toe faia se oka o le Fetilaisa.”

 

“Peita’i, na oso le Farmers CoOp ma latou okaina mai le fetilaisa i le taimi o le fa’asa, ma ua oo mai, e sese lea ituaiga na aumaia, o le ituaiga e le liusuavaia vave, ae ua avea ma mea ua maua ane ai e le ASEPA ua tafea atu nei toega o le fetilaisa i nofoaga o lo’o to’a i ai taetafega o timuga, ma ua mafua ai le fa’asa na soso’o mai, lea ua le toe fa’ataga ai lava ona faia se matou oka o fetilaisa i le atunuu,” o se toe tala lea a le ali’i faipisinisi sa ia okaina mai fetilaisa mo le 7 tausaga a’o lumana’i le Covid-19.

 

Na fesiligia le Kamupani o lo’o ia okaina mai ai le fetilaisa, aua e iloga mai e le o le fetilaisa lea sa mafua ai le a’afiaga o le Siomaga o le atunuu.

 

“O le matou oka o le Fetilaisa e oka sa’o lava i le Kamupani ua Laiseneina e sapalaia fo’i le setete o Hawaii le PEI Company, ma ua nofo sauni fo’i i latou e fa’aauau ona sapalaia mai le tatou matagaluega o fa’ato’aga, pe afai o le a toe atofa mai le konekarate lea i se taimi vave, ia mafai ona fesoasoani i le au faifa’ato’aga.”

 

Peita’i ina ua fa’afeso’ota’ia atu le matagaluega o fa’ato’aga a le tatou Malo, i le taimi nei, ua taofia pea lava ona faia se fa’aiuga i le tauofoga o lea Konekarate, aua ua sasi tele le ituaiga fetilaisa sa aumaia e le konekarate a le Farmers CoOp, ma ua taofia mea uma se’ia oo mai le pulega fou, poo ai fo’i se tasi e tofia mai mo le fa’auluuluga i le matou matagaluega, ae maise fo’i o le sui e tau’avea le tofiga CPO a le tatou Malo i le Ofisa o Oloa a le Malo, po’o le Procurement.”

 

I se molimau mai a se tasi o le aufaifa’ato’aga, sa ia ta’ua ai, “O mea lava nei e mafua ai ona matou toe tapa le aumaia i totonu o fetilaisa e le talafeagai ma tulafono, lea e fai mai ai, aua le ‘aumaia fa’alelei eleele mai Saina ma Samoa, e le o ni fetilaisa o fa’atulaga ma pasia mo i tatou, ae o fea a o i ai faifa’ato’aga e aumai ai latou oloa e fa’aleleia ai le eleele aua fa’ato’aga?”

 

Ua le maua se sui o le Laulauatofi a le Farmers CoOp mo se fa’amatalaga aloaia i lenei fa’afitauli na alia’I mai ma ua a’afia ai le aumaia o nisi fetilaisa i le atunuu i le latou konekarate ma le Matagaluega o Fa’ato’aga. Peita’I o le fa’afitauli ua alia’i mai i fa’alelei eleele, sa tatau ona mua’I aumaia le ituaiga fetilaisa e pasia lona fa’atauina mai ma pasia ai le latou talosaga e le CPO ma le Matagaluega o Fa’ato’aga, iloilo lona lelei ma ona a’afiaga i le Siomaga fa’ato’a suia ai le Kamupani e sapalaia le atunuu i nei oloa.

 

Ona o lenei ua fa’aolioli atu ina amatalia faiva o le faigamalo fou, o lo ua manatu le aufai fa’ato’aga, “Ia alofagia fo’i lenei itu tele o le tamaoaiga tausi o le atunuu, ia lelei ona tautuaina. Ua iloga mai ua tele na’ua alamanuia ua fa’auia fo’i i le au faifaiva, ae ua fa’atuutuu fo’i i matou i lenei vaitau o le Coronavirus. Peita’i, a le toe talia nei va’a oloa, o le fofoga taumafa o le atunuu atoa o le a tuu mai i lima o le aufaifaiva ma le aufai fa’ato’aga.”

 

Ua fa’ailoa e se tasi o ali’i e fa’atau ana fua o fa’aeleeleaga i le maketi, “O le mea ua i ai nei, ua le toe io lelei mai le talo, ua laiti ma ua nini’I aua sa fai o fa’alelei eleele e mafai ona toe fa’aleleia le palapala a’o le’i toe totoina ma’umaga i eleele sa toto ai muamua.Ua le toe agava’a fo’i a’u talo mo le auina atu i le SLP aua o lo ua mautinoa, ua nini’i tele, leai se isi o le au kuka e fia nofo i le aso atoa e vavalu talo mo se saka a le fanau a’oga. Ua na’o le aumai lava i le maketi, ae le tauva la a’u talo ma talo nei e aumaia mai Samoa. O lona uiga a le taugofie mamao atu nai le faleoloa, o le fua a a’u e le toe maua se tupe mo le aiga.”