Pago Pago, AMERIKA SAMOA

3,900 TUI PUIPUIA “PFIZER” O LE COVID SAUNIA MO TUIGA

Ua fa’ailoa e le matagaluega o le soifua maloloina, ua mae’a fa’atulaga nei le aofaiga e 3,900 o tui puipuia o le Covid-19 sa taunu’u i le aso To’anai, Tesema 19, 2020, i le va’alele o le cargo. 

E lua pusa o nei tui ma ua fa’amautu nei i le Potu Suesue o le falema’i i Tafuna ma o lo ua fa’asolo atu ai nei tuiga mai lea nofoaga.

“O le tasi pusa sa i ai le aotelega e 1950 tui na aofia ai, o le pusa lena sa le fesiligia ona o lo’o faitauina e lona fuatau le maulalo o le vevela o lo’o sa’o lelei talu mai ona aumaia, ma ua lelei atoatoa na tui, peita’i o le pusa lona lua sa i ai tui e 3,900 sa aumai ua masalomia lona aoga,” o se tala lea a le ali’i foma’i Dr Aifili John Tufa.

O lea la ua fa’aauau pea lava tuiga ona e le o fesiligia le pusa muamua.

E ese mai lea tima’iga, ua fa’ailoa mai fo’i le mae’a faia o le tui puipuia o Uifa’atali Aumua Amata i le Laumua, ma ua ia fa’amalosi‘au mai i lona atunuu pele, “Ia faia lou tui puipuia o le Covid-19, e le o i ai se fa’aletonu o ou fa’alogoina ona o le tui, o le mea fo’i e tatau ia i matou o ta’ita’i ona mua i malae i lea fo’i taumafaiga ia puipuimalu o tatou tagata ma ia tafimaina Amerika Samoa i le covid-19.” O sana saunoaga lea e fa’ailoa mai ai ua mae’a faia fo’i lona tui puipuia.

I le taimi nei ua atoa le to’a 138 o i latou ua mae’a tuia lenei tui puipuia o le Covid-19 I le uluai aso ua mae’a ai tuiga, ma e le’i mae’a lava le Tier #1 o i latou na e malaga i fafo, fa’atasi ai ma e ta’imua mai i galuega fa’aola ma puipuia o le atunuu mai fa’alavelave fa’afuase’i e lutia ai le atunuu.

Mai lea 138 tagata ua mae’a tuia, e to’a 60 i latou na tuia mai le falemai i Tafuna ae to’a 78 na tuia mai i le falema’i tele i Faga’alu ma o i latou fo’i nei e ao ina tui muamua ma le tui fa’alua e aoga ai le puipuigamalu a lea tui ia te oe, e ao ina ia faia lava i le Pfizer.

O le tui lona lua fo’i lea e ao ina fa’amae’a ua toe tolopo ai le malaga ese atu o le va’alele ma i latou ua mae’a fa’atulaga avanoa e malaga ai i le malaga togipau a le Hawaiian Air mo Honolulu.

KISO SKELTON – FA’AU’U CHAMINADE TOGI SILI ONA MAUALULUGA

Ose tasi o alo o le atunuu sa amata ma fa’aiu atu ana aoaoga maualuluga i Amerika Samoa, ua fa’au’u fo’i i ana aoaoaoga i le Chaminade University i Hawaii, ae ua fa’au’u ma togi sili ona maualuluga, e fa’aosofia ai lagona fiafia i matua ma aiga, ae fa’apea fo’i le tatou malo.

O le ausia ai e lea alo o le atunuu ma togi e fa’aigoaina o le Summa Cum Laude, lea e amata mai le GPA i le 3.95-4.0 o ituaiga togi ia e fili faapitoa mai ai le ua togi silia i le vasega fa’ai’uaso i taimi uma o fa’au’uga i so’o se Iunivesite ma Kolisi po’o vasega fa’au’u fo’i mai a’oga maualuluga ma a’oga tulaga muamua.

Fa’ailoa e Kiso Skelton, “O lou fa’anaunautaiga lea e i ai nei e fia fa’aauau lana a’oga ma faigaluega i le taimi e tasi, ina ia mafai ona fesoasoani mai i nai ona matua ae fa’aauau pea lava le sailiga mo faaloga maualuluga atu.

“Peita’i o la’u ta’utinoga, o lona fesoasoani sili o le a ia mauaina lea mai le Atua o le tautai mua lea o la’u taumafaiga i a’oa’oga. Ou te fa’afetai ai i le Tapa’au Sili i le lagi mo fa’amanuiaga e tele. O le alofa ma le agalelei o le Atua ua manuia ai mea uma. O le lagolagosua, talosaga molia, ma le tapua’iga mau a nai o’u matua pele ma lo’u aiga ua a’e ai ma le manuia faiva. O le tatalo ma galue o la’u au’upega lea i faiva o aoaoga.”

Sa fa’au’u o ia i le masina lenei ma lona tikeri, Bachelor of Arts in Historical & Political Sudies & minor in Psychology.

Na amata mai ana aoaoga I Matafao Elementary School i Faga’alu, mai le Level K5 se’ia oo i le Level 3, ona siitia lea e lona aiga e aoga i le Uifa’atali Peter Coleman Elementary i Pago Pago ma fa’au’u mai ai i le Level 8 i le tausaga 2013.

Na amata lea o ana a’oa’oga maualuluga i Tafuna High, Laumua o le Toa ma fa’au’u mai ai o se tasi o e na togisilia i le vasega fa’au’u o le tausaga e 2017.

I lona fa’au’uga sa ia ausia ai togi e ulufale ai I le Chaminade University ma e tolu tausaga o lana sailiga ae o lea ua mae’a mai ma lona fa’ailoga sa naunau i ai, Bachelor of Arts History/Political & minor Psychology.

O ia i le alo o Paepaeafoa Alex Skelton ma Patisepa Skelton, ma o lana Ekalesia e avea ma ona aiga fa’ale-agaga o le Ekalesia Katoliko Finagalo Pa’ia o Iesu – Fatuoaiga.

I lona soifua aoaoina ai i Chaminade University sa filifilia o ia e avea ma sui o fanau a’oga uma i le Iunivesite lea i le Komiti Fa’afoe a le Iunivesite, peita’i na toe filifilia o ia i se vaitaimi a’o a’oga ai pea o ia, e avea ma Sui peresetene o le Asosi a Fanau Aoga i Chaminade [CSGA].

I lona toe tausaga lona tolu i lana a’oga lea, sa filifilia ai o ia e avea ma Peresetene,o le Chaminade Student Government Association. Na filifiia fo’i o ia e avea ma totino o le GSGA – Komiti Laititi mo fa’aiuga fai a le Komiti Fa’afoe atoa.O lona taimi atoa i Chaminade sa ia tautua ai mo fanau a’o’oga i le Iunivesite ia lagona o latou leo i a’afiaga e feagai ma i latou ao a’o’oga. Na avea fo’i o ia ma sui oe Iunivesite i Chaminade e auai i le Hoopili Hou Leadership Conference.

Na avea Skelton ma sui o le fanau a’oga uma i Chaminade e auai i le Native Hawaiian Convention & Pacific Island Caucus. E tele fo’i fa’ailoga sa ia maua i Chaminade.

E i ai fo’i nisi o mea ua lalamua ai lenei alo o Amerika Samoa, ma e fa’ato’a fa’aa’e fo’i e le Chaminade University sona sui e taumafai mo le Harry S. Truman Scholarship ma ua avea ai o ia o se tasi muamua lea ua mauaina lea fa’ailoga.

Ua atoa le tolu tausaga o i ai o ia i le Deans List a le Chainade University. Sa avea foi ma totino o le National Honor Society talu mai lana vasega 10 i a’oga maualuluga i le teritori.

TAFEA SE TAMA TALAVOU I LE SAMI – LEALA

O le aso Lua, Tesema 22, 2020, o le aso mulimuli sa fa’atulafonoina e mafai ai ona sailia pea le tino po’o se tala mai i le tino o le Tama talavou sa fa’ase’e ma nisi o ana uo, ae tafea ai i le a’ave o le au i Leala, Vailoatai, i le aoauli o le aso Sa na te’a nei.

E tusa ai ma faamatalaga a nisi sa latou molimauina fa’ase’ega a i latou nei, sa latou fa’ailoa ai na va’aia e ana uo le tafea atu ese mai o le ua misia ao latou fa’ase’e.

Pe afai e mae’a le 72 itula o lo’o saili pea le tino o lenei sui, ona fa’ato’a mafai loa lea ona fa’alauiloa aloa’ia ua maliu o ia i le sami, ma ua le maua lona tino. O le sui o tafea nei i le sami o se tasi o faipisinisi lauiloa i le tatou malo.

Na fa’ato’a taofia fo’i le sailiga a leoleo maulu ma va’a o le Marine Patrol a le Matagaluega o Leoleo ile itula e 7:00 i le afiafi o le aso Gafua ma e fa’ato’a fa’aauau fo’i i le taeao ananafi se’ia atoa le 72 itula fa’atulagaina o sailiga i le tai.