Ads by Google Ads by Google

TALA I VAIFANUA


O nisi o tamaitai talavou ua avea ma nisi o le aufaigaluega a le Ofisa e gafa ma Aoaoga Fa’apitoa mo le Ma’i Suka I le Falema’i i Fagaalu. O lo latou sao i le mamalu o le atunuu, e latou mata’i le aluga o lou ma’i suka ma fautuaina oe i so’o se la’asaga ua i ai lou suka. [ata: Leua Aiono Frost]

O nisi o le aufaigaluega a le Fale’aiga i le LBJ Medical Center sa auai i le semina mo mea’ai paleni ia fa’aitiitia ai le maua o le to’atele i le ma’i suka, ma isi ala eseese e mafai ai ona soifua ma gafataulima lou ma’i suka. [ata: Leua Aiono Frost]

Pago Pago, AMERIKA SAMOA

 

FONOTAGA DOH TOBBCCO/DIABETES – SOIFUA & GAFATAULIMA MA’I SUKA

 

O le aso Tofi ma le aso Faraile o le vaiaso na te’a sa fa’atautaia ai semina a le DOH Tobaacco Diabetes Coalition i le Naumati Room o le Tradewinds Hotel i le aso Tofi ma le Goat Island conference Room o le Sadies by the Sea Hotel i le aso Faraile, ina ia fetufa’i le Komiti Fa’afoe , o a latou pa’aga o lo’o nafa ma le tele o fa’alauiloaga i uiga ma auga o le Ma’i Suka, auala e mafai ona puipui mai oe ina ne’i e oo atu i le ma’i suka, ae o i latou fo’i ua maua i le ma’i suka, auala e mafai ai ona e soifua pea ma lou Ma’i Suka.

 

O nei fetufa’iga sa tuu atoa i ai le taumafaiga tuufa’atasi a le Ofisa o le Ma’i Suka a le Falema’i LBJ Medical Center i Faga’alu, lea e fa’auluulu i le tamaitai o  Loata Sipili, ma lana aufaigaluega, ina ia tima’ia le atunuu o lo’o soifua a’e ua maua ile Ma’i Suka i ala e mafai ai ona fa’aumiumi pea le soifua, ina ua e iloa ona tausia lelei lou ma’i suka.

 

Sa i ai nisi sa latou oo ane e fefa’asoa’i mai o latou a’afiaga ona ua le tausia lelei e i latou, o latou ma’i suka. Sa aoga tele le fa’asoa lea aua o le to’atele sa latou tete’e ina ua fa’ailoa atu i ai, ua latalata ona maua i latou ile ma’i suka, ia taofia le so’ona taumafa i mea’ai e vave ai lava ona maua loa ile suka.

 

“O le te’ena o fautuaga lelei a foma’i. fa’apea nisi ua aotauina faapitoa i ala e mafai ai ona faailoa ma taofiofia ai lo’u ma’I suka ina ia fa’aumiumi pea le soifua, o le a mautinoa ai le vave o’o o le soifua i le stroke, ua fa’aleagaina le fatu, tele fuala’au e inumia i le aso, ma ua avea ai ma ala e vave oo ai i le fa’amama o le toto, o le la’asaga mulimuli lea e oo i ai le sui ua leva ona inu fuala’au mai ona o lona toto maualuga, suka ma le gugu, aua o ma’i lava e o fa’atasi,” o se tala lea a Loata Sipili.

 

Sa auai mai le tamaitai o Olita mai le Dialysis a le LBJ Medical Center, lea sa ia fa’amatala to’atuga ua va’ai i ai o ia, i togafitiga e toe fa’amama ai le toto, ona ua le toe mafai ona galue le fatuga’o e fa’amama le suavai i totonu o le tino atoa, ma ave’esea mai le lapisi.

 

“O le fa’amama o le toto o le la’asaga mulimuli lava lea ole toe taumafaiga ina ia fa’amama le toto mai le tele o le suavai ma lapisi o i ai a’o le’i fa’auia atu i le ate mo le fa’ao’o atu i totoga uma ma itutino ta’itasi o le tino atoa ina ia fagaina sela uma, maua le malosi o le tino atoa,” o se tautalaga lea Olita.

 

“Peita’i i aso ta’itasi o le galuega e mafuta ai ma i latou o gasolo atu e fa’amama o latou toto, e matua fiafia lava i latou ma fa’afetaia le togafitiga ua mautu, ua toe maua ai le soso’oga o le mafutaga ma e pele ia i latou i lenei olaga. E pepese mai lava i le amataga o le talavai se’ia oo ina mae’a, o pese lotu o pese ua loa e le faalogoina, o pese e faafiafia ai latou loto, o le ala lea e mafai ai ona soifua pea i latou ma togafitiga faifaipea e fa’atolu i le vaiaso ona fa’amama le toto.”

 

Sa aofia i le fa’atasiga le tamaitai ua va’aia faapitoa ‘aiga a gasegasei ua fa’ataotolia i le falema’i, ma ua aofia ai ma le Fale’aiga o le Falema’i i Faga’alu i lana pulega. O ia lea sa ia aumaia le paleni o mea tausami, ina ia taofia ai le agai atu o oe ina maua i le ma’i suka. O le taofia o le ulaula tapa’a ma le taumafa Iimea’ai paleni, leai se mea’ai suamalie, taofia ma le so’ona fa’amasima o mea’ai taumafa i taimi uma, e lelei atoatoa ai le tausiga o lou soifua maloloina.

 

Na i ai fo’i le aufaigaluega a le fale’aiga o le falema’i tele, ma sa latou ta’utino fo’i, o le so’ona taumafa lava le ki o le fa’amamafa atili o le tino. Ua fa’ailoa e le tasi e le’i leva ona maua o ia i le ma’i suka, ae le’i tausia leleia e ia lona tino i mea’ai paleni, ua tele i le taumafa i a’ano o manu, ua leai se fiafia e taumafa i fuala’au ‘aina.

 

O tima’iga fa’amalosi’au a sui iloga o le komiti fa’afoe, ina ia taofia le ulaula, ‘ai mea’ai paleni, fa’amalositino mo le 40 minute i aso ta’itasi, lava le moe ma ia soifua fiafia, o le vaila’au lea o le soifua maloloina lelei, e le vave fo’i ona maua oe i le ma’i suka, ma’i fatu, totomaualuga, gugu ma le Kanesa.

 

O nei fonotaga sa tuu lea e faia ia Novema 2020 peita’i ona o le toe o’o mai o le Covid-19 i faitoto’a o Amerika Samoa ona o le auva’a a le Fesco Askold le va’a oloa, sa toe tolopoina ai e fa’ato’a fa’ataunuu mai ia Tesema 2020 ae ua mautinoa le saogalemu o le atunuu mai le Covid-19.

 

LE ISI MALAGA TOGIPAU MO GASEGASE  - IANUARI 8, 2021 MO HAWAII

 

Ua talia e Kovana Lolo Moliga le isi malaga lona tolu mo gasegase e ao ina togafitia i fafo e fa’ataunuu ia Ianuari 08, 2021 ma ua tuufa’atasia e le Medicaid, Falema’i LBJ Medical Center ma le Hawaiian Air.

 

Ua talia fo’i nisi e le o malaga mo ni togafitiga i fafo pe afai o le e fa’aoo atu suafa ina ia fa’atulaga ai lo latou malaga ese atu e fa’aatoa ai le pasese a lea lava malaga, ma e i ai fo’i pepa e ao ina fa’asolo ona pasia ona e fa’ato’a maua ai lou avanoa. Ua fa’asolo mai le lisi o i latou ua talia e talosaga:

 

Numera tasi: Gasegase ua mae’a fa’atulaga e le LBJ Med. Center e tatau ona malaga i fafo mo togafitiga.

 

Numera2: Vetereni poo fitafita tuai o lo’o gasegase ma e talia ma latou fesoasoani e malaga ma i latou ma ua mae’a fa’atulaga e le LBJ Med. Center ma le VA e malaga i fafo mo talavai.

 

Numera 3: Tagata ua fa’amaonia e nonofo mau i fafo ae o lo’o opea iinei ona o le fa’asa o le Covid-19. O i latou nei sa amata fa’amauina latou avanoa ma talosaga e fia malaga i fafo mai ia Oketopa.

 

Numera 4:O isi uma lava e fia talosaga o le a faia i ai le fa’aiuga, pe afai o le a i ai lava nisi nofoa o lo’o totoe nisi nofoa o lea malaga.

 

O le aso 18 o Tesema o le a siakia atoa ai e le Medicaid le lisi ua tuufa’atasia e le falema’i LBJ Medical Center o lo ua fa’atulaga e malaga ia Ianuari 08, 2021. Peita’i ole aso Gafua Tesema 21, o le a taua’aoina ai e le Medicaid le latou lisi ua mae’a siakia i le Kamupani va’alele a le Hawaiia Air mo le latou siakia o i latou o lo ua mafai ona malagai i lea faigamalaga.

 

Tesema 23 o le a fa’amautu atili ai uma le pasese a le aumalaga lea mai le lisi o Oketopa. O Tesema 30, o le a toe fa’amautu ai loa e le Hawaiian Air le latou lisi o pasese e mafai ona malaga.

 

Tesema 31 o le taua’ao mai ai e le Hawaiian Air le latou lisi o fua o uta e totogia mo i latou e malaga i le faigamalaga fa’apitoa lea ma o le a tatau ona fa’ao’o atu uma uta a le pasese ua fa’atulaga i le Ofisa Va’alele a le HAL i latou Ofisa Autu.A uma ona fua ona taua’aoina lea o lau lisiti ma e ao ina fa’ao’o i le Medicaid e fa’auia mai ai le totogia ai le peimeni i le Treasury.

 

O Ianuari 4 se’ia oo ia Ianuari 6, o sui uma nei ua faatulaga e malaga i fafo, o le a fa’atulaga i latou e totogia ai uma uta i le Ofisa o Tupe a le tatou Malo.

 

Mo nisi fa’afesili e tatau ona fa’autagia nei gaoioiga uma e ao ina fa’atino ma ia vala’au mai telefoni 699-4777 mo nisi fa’amatalaga.

 

MOU MALIE ATU ZAZU – TUMAU MAI PEA MATAGI & TIMUGA

 

Ua see malie ese atu le “afa o Zazu” mai le faaolioli e ono lamatia ai Amerika Samoa, ina ua mae’a lutia ai le malo o Tonga, i lona motu o Tongatapu i lona malosi e 120kilomita/hr le malolosi o matagi ma timuga e sau fa’atasi ai lava.

 

E tusa ma le 360 maila i saute sisifo o Pago Pago, sa oo mai i ai le malosi o lea afa, lea sa manatu e tauau e faliu mai ma aga’i mai ai i le atu Samoa, peita’i o lea fo’i ua fa’asaoina mai i tatou i le malosi o Zazu.

 

O le tamaitai va’ai tau Jane Allen, sa ia faailoa o le malosi o matagi o le tau o le monsoon lea e tumau nei ia Amerika Samoa e tusa ma le 20 i le 30 maila i le itula, ma e sau fa’atasi ai ma timuga ma si’isi’i ai le tai. A to fa’ata’uta’u mai matagi e oo lava lona malosi i le 35 maila i le itula. 

 

Ua fa’ailoa mai e le va’ai tau, e ono oo lava aso timuga nei i le aso Lulu ma le aso Tofi o lenei vaiaso, ma o le fa’asolosolo atu ina matua tetele lava timuga i le fa’aiuga o le vaiaso, ona o lea ua aga’i mai le tau o le monsoon i Tutuila nei, ae o loo i luga tonu o Savaii i le taimi nei.