Pago Pago, AMERIKA SAMOA

MOE LE PAILATE I LUGA O LE VA’ALELE – SE’IA TOE TUUVA’A ESE ATU:

O le Aso Faraile, Tesema 4, 2020, na toe tuu va’a ese atu ai le va’alele na tulaueleele mai, ae sa le fa’atagaina e le Kovana ona alu ese mai le pailate, ae sa nofova’ava’aia mo lea taimi atoa i le nofoaga fa’apitoa e nonofo ai nisi o mata’i i suesuega po’o maua i le covid i Tafuna.

“O le malaga lenei sa leva ona fuafua ma feutaga’i mai e Ausetalia e afea ai Amerika Samoa ina ia utu ai le va’alele ma malolo ai le pailate ona fa’ato’a toe tuu va’a ese atu lea mo Hawaii, ae lei oo mai le Covid-19, peita’i o lea ua fa’ato’a faia mai i lenei vaitau, ma ua le mafai fo’i ona taofia aua o lo ua mae’a alu ese mai le va’alele i Ausetalia.” O se fa’amatalaga lea a le Taitaifono o le Komiti Fa’afoe o le Covid-19, Iulogologo Pereira.

O le ituaiga va’alele lea o le Aztec Twin Otter ma o se va’alele o se tasi e ao ina molita’i i Hawaii ma ua fa’ailoa fo’I e le Kamupani fa’alotoifale sa fa’afeso’ota’ia feuiuia’iga o lenei malaga, ua mae’a pasia  mea uma mo lenei faigamalaga, ma ua mae’a pasia ma fa’atulaga ele Matagaluega o le Soifua Maloloina ina ia nofoia e le pailate ma lana soa pailate le nofoaga mo e nofova’ava’aia i Tafuna e tatatalia ai le toe fa’aauau o le la’ua faigamalaga i Honolulu.

Peita’I, ina ua logotala le afioga le Kovana Sili Lolo Moliga i lea malaga e na’o pailate lava, sa matua le mana’o o ia e tulaueleele le va’alele. Peita’i na toe tafa lona finagalo ina ia tulaueleele ae sa lava ne’i alu ese mai lenei pailate mai le va’alele I le taimi atoa na i ai iinei ina ia toe utu, ma sauni mo le fa’aauau atu o lana malaga i Honolulu.

Ua fa’ailoa manino lava e Iulogologo Pereira, “O a’u ua sasi i le feutaga’iga o lea malaga, ona ua leva ona feutaga’i mai lea malaga i le taimi a’o mafai lava ona o mai malaga ma afea i tatou iinei ina ia mafai ona utu, tapena ma toe tuuva’a ese atu. E le’i lelei fo’i ona fa’ailoa atu i le Kovana le mataupu ma ua alu ese mai le malaga mai Ausetalia, ae fa’ato’a logotala i ai le Kovana ma ia taofia ai ona tulaueleele, peita’I ua le lava se kesi o totoe mo le fa’aauau o le malaga i se isi malaeva’alele, aua o le ituaiga kesi fa’apitoa mo lea va’alele e maua lea na’o i tatou iinei.”

O le va’alele lea na tulaueleele mai i le itula e 9:30 i le po o le aso Tofi, ae na fa’ato’a tu’ua le tatou malae va’alele i le itula e 9:30 i le taeao o le aso Faraile na te’a. Na galulue fo’i leoleo o le malae va’alele ina ia mautinoa lava e le’i tu’ua e lenei pailate le va’alele, peita’i ua fa’ailoa mai e nisi o le au tiute sa i ai, e to’alua pailate sa malaga mai i lenei va’alele i le taimi na siakia atu ai e i latou.

Sa toe fa’ailoa mai e Iulogologo, “Pau lava le fa’afetai ona ua toe tafa le finagalo o Kovana Lolo Moliga ina ia fa’aafea I tatou e lenei malaga, tusa pe ua le mafai ona tautuaina lenei pailate ae ua fa’afetai ua mafai ona tulaueleele mai tautuaina lana va’a, a’o le’i toe fa’aauau le malaga.”

MALAGA FA’APITOA SAMOA AIRWAYS - MALAGA TOGIPAU A LE McCONNELL DOWELL

O le va’alele a le Samoa Airways o loo fa’aaogaina mo femalaga’iga i le va o Tafuna ma le Manu’atele, ua mae’a faia se malaga togipau mo Samoa i le aso Tofi o lo’o malaga ai nisi o le aufaigaluega a le McConnell Dowell e fia malaga atu mo Niu Sila i vaitau o le Kerisimasi ma le Tausaga Fou.

Ua fa’aalia manino foi e se tasi o le aufaigaluega a le Samoa Airways, “Ua mae’a fa’atulaga mai le malaga togipau lenei na’o le alu lava i Samoa o le vaalele lea e ave le pasese mo le McConnell Dowell ma toe fo’i mai, e leai fo’i se pasese e toe fo’i mai ma le malaga lea a le va’alele.”

Peita’i mai le fa’asalalauga fa’alaua’itele a le au tusitala ma le Komiti o le Covid -19 i Samoa faapea ma le latou NEOC, na fa’ailoa mai ai e le sui taitaifono Agafili Shem Leo, “O loo tatala lava e Samoa le feso’ota’iga tau femalaga’iga i le va o Amerika Samoa ma i tatou i Samoa nei, peita’i o Amerika Samoa lea ua latou taofia mai lea feso’ota’iga e ala i malaga a va’alele ma le malaga a va’a folau la’u uta e pei o le MV Lady Samoa.”

Ua fa’ailoa patino ai fo’i e Agafili Leo, “O le taimi nei o lo ua matou taliaina fo’i se tasi o talosaga mai Amerika Samoa ona o se aumalaga e fia malaga i le va’alele lea e tulaueleele mai i Faleolo mai Niu Sila ma e fia malaga ai nisi sa faigaluega i Amerika Samoa, e toe fo’i i o latou aiga.”

“Peita’i, o lo’o fa’aauau pea e Amerika Samoa le latou fa’asa ona femalaga’i atu nisi mai Samoa i Amerika Samoa, ae o lo ua oo fo’i i vaitau e masani ona gasolo mai ai tagata Samoa o lo’o faigaluega i Kamupani I’a i Pago Pago e asiasi mai i o latou aiga iinei. E ese mai lea afai e le tatalaina fo’i femalaga’iga, ae ua fa’asa fo’i le fela’ua’iga e ao ina faia e le MV Lady  Naomi, ma o le a faigata ai i le mamalu o nai fanau ma aiga ona momoli mai ni fa’amomoli mo latou aiga.” O se toe tala lea a Agafili Leo e tusa o lea tulaga.

AUINA ATU TEUTEUGA LA’AU KERISIMASI MO UOSIGITONE

O teuteuga o le La’au Kerisimasi tele i le Laumua o Amerika, lea sa filifilia fa’apitoa ai nisi o fanau a’oga i Lupelele latou te saunia faapitoa nei teuteu la’au kerisimasi.

O nisi o ata ua tusi ma valia i nei teuteu la’au Kerisimasi ua aofia ai le ata o le Taupou o lo’o paluina le ava, o se ali’I faifaiva I luga o lona paopao, ma se ata o se Tanoa.

O isi teuteu e aofia ai le ata o fugala’au Samoa, o le aute Samoa ma isi mea e masani ona feso’ota’i ma Samoa ma agaifanua, ma o le la’au Kerisimasi tele I Amerika o se isi lea fa’alauiloaga o le tatou aganuu ma tatou measina.

Mai aoga e tulaga muamua i totonu o le Iunaite Setete o Amerika, ua filifilia ai le 12 o A’oga Tulaga Muamua ina ia latou tapenaina teuteu mo lea la’au kerisimasi tele.

O lo ua fa’atulaga fo’i le isi 56 la’au Kerisimasi e laiti atu nai lo le La’au Kerisimasi tele, ma ua fa’aaogaina fo’i nei uma teuteuga uma e faasolo atu i na la’au laiti ua fa’atutu fa’atasi i lea paka i le Laumua. O laau kerisimasi laiti nei ua avea ma se fa’amanatu o setete ta’itasi ma teritori o le Itumalo o Columbia.

O le polokalama lenei ina ia filifili ai nisi o a’oga e tapenaina ni teuteu mo le la’au Kerisimasi tele lea, o le vaega a le National Park Services ma le USDOE fa’apea ma le National Park Foundation.

O le matagaluega o a’oga a le malo tele o i latou lea e nafa ma le sailia o aoga e faia lea faiva, e filifilia ai e i latou o nisi o a’oga maualuluga, poo aoga tulaga muamua e latou te saunia teuteu mo nei la’au kerisimasi.

 fa’agae’etia o le tamaitai pule aoga o Lupelele Elementary Julie Fa’auliuli Meleisea, ma o le filifilia foi o latou fanau aoga mo lenei faiva, “O se fa’aeaga sili ona fa’afiafiaina ai i matou le pulega, le vasega o faia’oga ma le fanau a’oga i le latou Laumua. Ua fa’afiafiaina i matou uma aua ua matou iloa o matou galuega o le a fa’alauiloa atu i le la’au kerisimasi tele i le Laumua.”

“Ina ua matou mautinoa o le a maimoaina e le anoanoa’i o tagata e gasolo atu i le laumua, e oo i le to’atele o tagata lauiloa o le Malo Tele, o se fa’aeaga ua matua fa’asilisilia lea i o matou uma.” O se toe tala fiafia lea a Meleisea.

O le fanau a’oga ua avea ma sui e saunia nei teuteu la’au Kerisimasi mai Lupelele e aofia ai: Andrew Alingacion, Faafetai Sapakuka, Anjini Chand, Esperanza Talataina, Dante Lausen, Jeremiah Falute, Samuela Sorby, Siaumau Fiu, Jasmine Lafaele, Nuufoulotopa Leuta, Sopoilagi Tei, Tasjsha Ames.

 O le sootaga o lo’o maua ai lenei fa’amaumauga o le tuatusi i laina feso’ota’i a le initeneti https://thenationaltree.org

FAATASI LE KOMITI FA’AFOE O LE TOBACCO/DIABETES – FA’ATINO LATOU GALUEGA MO SUESUEGA:

O le aso Faraile na te’a nei sa fa’atasia atoa ai le Komiti Fa’afoe o le DOH Tobacco/Diabetes Coalition ma sui iloga o latou pa’aga ina ia tuufa’atasia o latou tomai e fa’aliliu ai fa’asamoa le latou suesuega e fa’atumu mai e le fanau a’oga tulaga muamua, ma o le a fa’atautaia lea suesuega e le Matagaluega o A’oga a le tatou Malo.

O fesili uma sa taumafai ona fa’asamoaina, e fa’atutu lea aga’i i faafesili tau le tagofia o sikaleti po’o le ulaula tapa’a.

O le faiva ua faia fa’atasia nei e le Komiti Fa’afoe sa vaevaeina ai i latou na auai, le komiti fa’afoe fa’apea ma sui mai le ASEPA, Sui mai le Matagaluega o A’oga vaega a le Curriculum ma sui iloga fo’i mai le Matagaluega o le Soifua Maloloina ma le Diabetes.

Mai le itula e 6:00 i le teao se’ia oo i le itula e 1:30 i le aoauli, sa fa’atautaia ai lo latou faiva, ma sa mae’a lelei fesili fa’atulaga e 60 mo lea suesuega aoga. I le taimi fo’i na atofaina mo lea faiva, sa latou fa’atinoa le galuega ma fa’amae’a lelei, a’o le’i nofo sauni atu i latou mo le vaiaso nei lea e faia ai latou semina mo le fa’alauiloaga o ituaiga o mea’ai ma ala fo’i e tatau ona, mafai ai e le tagata o lo’o maua i le ma’i suka ona ola ma gafataulima lona ma’i suka.

O lo ua fa’atulaga fo’i e le Komiti Fa’afoe o le DOH Tobacco/Diabetes le aso Tofi ma le aso Faraile ina ia fa’atautaia ai nei semina i ala e mafai ai ona e alofia le tulaga o le maua i le ma’i suka.

O le aso Tofi e faia ai i le Tradewinds ae o le aso Faraile e fa’atautaia ai lea lava semina mo le isi itu o le atunuu i le fale’aiga o le Sadies. O le tamaitai o le a fa’afoeina nei semina o le tamaitai o Jackie Tulafono ma o le a matagofie fo’I nei semina mo nisi e a’otauina e faato’atele ai le aufaigaluega e fa’asoa atu i le mamalu lautele ala e mafai ai ona e soifua ma gafataulima lou ma’i suka.