Ads by Google Ads by Google

TALA I VAIFANUA


[ata: foa'i]

Pago Pago, AMERIKA SAMOA

 

FOA’I MO MEATA’ALO MO FANAUITI A LE ROTARACT CLUB A LE ROTARY AMERIKA SAMOA

 

Ua amatalia ona fa’atula’ia solo pusa po’o kalone a le Rotaract Club a le Rotary i Amerika Samoa, ina ia foa’ia ai e nisi o tatou tagata lautele, so’o se mea ta’alo lava ua ia fnagalo e fa’ao’o atu i nisi o fanau o loo aumau i nofoaga o sala, o fanau fo’i o lo’o aumau ma o latou tina i nofoaga fa’apitoa e tausia ai i latou ona o sauaga o a’afia ai i totonu o latou aiga, ae maise o fanau o lo’o ua i ai i le falema’i mo togafitiga o gasegase i lenei vaitaimi fiafia o le tausaga.

 

Ua fa’apipi’ia solo lava fa’asalalauga fa’alaua’itele mo lenei fa’amoemoe i le tele o faleoloa tetele o le atunuu, ina ia silafia e le mamalu lautele lea fa’amoemoe, ma latou foa’i ai ma le agaga alofa mo nei fanau. O lo ua fa’atulaga le fa’amoemoe lenei e fa’ato’a tapunia lava ia Tesema 18, ona fa’ato’a fa’alauiloa lea o le aso e faia ai foa’i nei, ma mataituina ai e le atunuu le fa’ataunuuga o lea fa’amoemoe lelei mo fanau i le vaitau fiafia o le 2020.

 

O le tamaitai peresetene o le Rotaract Club Tiara Drabble, ua ia fa’ailoa mai, “Ua matou tausoaina lenei fa’amoemoe ma le Maliu Mai Beach Resort, ma o le a avea lea fo’i pisinisi ma nofoaga fa’apitoa e fa’atino ai le Koneseti a le Kerisimasi e tatau ona tu’ufa’atasia ai le aotelega o nei mea uma ua foa’ia ia Tesema 11, 2020.”

 

O le au fa’afiafia o lea afiafi a tamali’I o le aufa’afiafia a le Maliu Mai ma le Aufa’afiafia a le Kolisi Tuufa’atasi.”

 

FA’AUILOA E MANUMALO - SCIENCE SYMPOSIUM AOGA MAUALULUGA

 

O le aso Gafua na fa’ailoa ai le vasega o fanau talavou a’oga i a’oga maualuluga I le teritori ua manumalo i le tauvaga a le Sience Symposium 2020 i le tauvaga lona 33 ai lenei, ma ua fa’aigoaina o le STEAM.

 

O i latou ua fa’amanuiaina: Tulaga Muamua: Georgina Alofa o Manumalo Academy; Tulaga Lua: Tasi-Rosalia Pereira o Samoana; Tulaga tolu : Katherine Kim o Manumalo Academy; Tulaga fa : Kirsten De Lara o Manumalo Academy; Tulaga lima: Chloe JoanVillorente o Manumalo Academy. Tulaga Ono e tutusa - Angela Chen o Pacific Horizon School ma Kimberly Mendoza o Manumalo academy; Tulaga fitu: Julie Liang o Manumalo Academy; Tulaga valu: Michael Sun o South Pacific Academy; Tulaga iva: Lily Feng o South Pacific Academy; Tulaga sefulu: Jason Qi o Manumalo Academy.

 

Isi fa’ailoga sa tapena fo’i i ai le Komiti o le STEAM ma ana pa’aga: ulaga 11: Lolomaletaiotumua Faoliu o Nu’uuli Vocational Technical High School ma le Tulaga 12: Lorrina Melanie Lee o South Pacific Academy.

 

To’alima o isi galuega sa fa’aalia: Apollonia Sene Sevaaetasi o Leone High School; D’Angelo Yamson o Fa’asao Marist High School; Jaedyn Alefosio o Fagaitua High School; Liaina Cassens o Leone High School; ma Teuila Ulufale o South Pacific Academy.

 

O fa’ailoga togisilia e to’a 10 o le a fai ma sui o Amerika Samoa i le fa’aaliga o nei ituaiga o galuega i le Pacific Science Symposium mo le fa’amoemoe o le Science & Sustanability lea e faia fa’aletausaga a latou fa’aaliga i Hawaii, e fa’atautaia e le Hawaii Academy of Science ae fa’atupe e le vasega o Vaega Au uma a le Matagaluega o le Puipuiga o le Malo tele.

 

TESEMA O1, 2020 – ASO FA’APITOA FA’ALAUILOAGA & LE TINEIA O LE HIV/AIDS

 

O Tesema 01, 2020 o le isi lea aso ua fa’apito augafa i ai taumafaiga uma e fa’ailoa ai togafitiga, ala e mafua ai ona maua i lea fa’ama’i leaga tele, ma ala fo’i o lo ua faia e puipuia mai ai i tatou mai le pesia i le HIV/AIDS i aso uma o le soifua.

 

O lenei le aso fa’apitoa sa amata fa’atula’ia mai le tausaga e 1988 ina ia tatou toe manatua i latou uma ua gase i malolo ona o le fa’ama’i leaga ma le mata’utia. Ua fa’aaogaina tatau lea aso mo fa’asalalauga uma e fa’atutu ina ia tineia le AIDS mai le lalolagi ma atunuu uma o i ai, ae maise o tima’iga i ala e puipuia ai lou soifua maloloina, ia e le maua i lea fa’ama’i pipisi ma le mata’utia ona tiga.

 

Ua silisili ona fa’alauiloa patino ala ua mafai ai ona e maua i lea gasegase, pe pepesi mai ia te oe lea fa’ama’i. O le tausaga lenei ma lona auau ua fa’aulutalaina, “Matua Soloia le HIV/AIDS: Taga’i Toto’a i A’afiaga.”

 

I le teao o le aso Lua na fa’atasia ai nisi o sosaiete a Faafafine i Amerika Samoa [SOFIAS] ma nisi e to’atele o latou uo mamae, na fa’apotopoto i lumafale o le McDonalds i Tafuna ma faia le latou talotaloga, e faamanatu ma fa’alauailoa ai lenei fa’amoemoe lelei. Ua to’atele i latou na auai ma ua faailoa mai fo’i, e ao ina fa’afeso’ota’i e le mamalu lautele o e fia faia suega e fia iloa ai pe ua maua i le HIV/AIDS, vala’au i le numera 633-4606.