Ads by Google Ads by Google

Tala i Vaifanua: Fa’aauau Pea Ona Faimeaalofa Pid Inc. – Masaga Fa Tamaitai Sokimi


O se va’aiga i le ata mulimuli lava o le taimi na fa’ao’o atu ai le foa’i, na ofoina atu e le Pacific Independent Distributors Inc. mo le ulua’i masaga fa ua soifua a’e I Amerika ia Ianuari 2020 ma ua latou sapalaia Huggies Diapers ma Wipes mo le tausiga o lenei fanau mo le tausaga atoa o le latou olaga, faafetai mo le meaalofa ma le agaga o le foai i lea lava kamupani. [ata- foa’i]

Pago Pago, AMERIKA SAMOA — Ua mae’a nei ona taua’aoina atu le meaalofa masani a le kamupani a le Pacific Independent Distributors Inc. o pusa Diapers and Pusa Wipes poo solo fa’apitoa mo pepe, e fa’aaogaina mo le masina atoa o Novema, 2020. O se isi mea siili ona taua ua latou foa’ia fa’atasi ai ma lea meaalofa masani, o isi Oloa ua fa’aopoopo atu ona o le agaga o lenei vaitau o le tausaga, e fa’ataua ai le foa’i atu ma le agaga alofa.

 

O nei tamaitai o le masaga fa - Maureen, Meleisha, Moraiaha ma Miracle - ua atoa nei le latou 9 masina i le taimi o le foa’i mulimuli nei. Lea ua aofia ai le Pusa o Pepa Solo ituaiga o le Viva; 2 pusa o Pepa mo Faleta’ele ituaiga o le Desey, tasi le pusa atoa o Huggies Supply Clean Baby Wipes, tasi fo’i le pusa atoa o Kotex pads ma le 12 pusa o Kleenex pepa solo.

 

I le taimi nei, ua nofo sauni fo’i le aiga o Filomena ma Sokimi Sokimi e fa’aavanoa le latou taimi mo le atoaga o le tausaga o le masaga fa ia Ianuari 2021. Peita’i, o le fesoasoani fa’amaealofa a le Pacific Independent Distributors Inc. sa foa’i mai mo Ie masaga fa lenei le sapalai o Huggies Diapers ma Wipes mo le ulua’i  tausaga atoa o le latou olaga. Lea fo’i ua latou foa’i mai ma isi mea fa’aopoopo nei mo i latou, fa’amalo ma fa’afetai i le pulega ma le aufaigaluega a lea Kamupani Tau Fefa’ataua’iga o Oloa eseese i le teritori.

 

FA’ATULAGA NEIL’S ACE HOME CENTER FOA’I E $30,000  LATOU E A’AFIA  KANESA

 

Talu mai le tausaga e 2009 sa amata mai ai e le Neil’s Ace Home Center le latou galuega fesoasoani fa’apa’aga ma le American Samoa Community Cancer Coalition ina ia fa’aoo atu sina fesoasoani tupe e fa’aaoga mo tapenaga a i latou ua maua i lea gasegase fita ao feagai ai ma fa’aiuga faigata ma latou pelega i aiga.

 

O le sailiga lea ua fa’atulaga nei e $30,000 ia maua mai le a’ao foa’i o latou uma o ua gasolo mai e fa’atau i le latou faleoloa ma o le a lava le tinoitupe o le a aotelega i ai le foa’i a le atunuu, o le a fa’aluaina lea faitauga e le Neil’s Ace Home Center.

 

O lea la ua siitia ala e mafai ai ona foa’i le atunu’u ina ia ausia le foai e $15,000 ua tapena ai le PayPal e lesitala i ai nisi o le atunuu ma foai mai ai mo lea fa’amoemoe lelei.

 

Ua mafai fo’i ona foa’i atu soo se tasi i le Neil’s Ace Home Center i le tuatusi: http://www.neilshomecenter.com/contact.html i lau foa’i e ititi ai lava le $20. ma e te fa’atuatusia lava i le “Holiday Angels.”

 

Foa’i ma lou silafia lelei, o se meaalofa e fesoasoani tonu i nisi o lo ua i ai le mana’omia tupito mo latou to’atuga o le soifua maloloina lelei.O le tinoitupe atoa pe afai e ausia, o le a taua’aoina lea i le Amerika Samoa Community Cancer Coalition mo i latou ua mautinoa ua maua i lipoti a latou foma’i, i le Kanesa o so’o se ituaiga.

 

FETALIA’I KOVANA LOLO & LT MATHEW JOHNSON USAF 

 

Ua mae’a te’ena e Kovana Lolo Moliga le ulufale mai o va’alele e tolu a le Air Force a le Malo tele, ma momoe ai i le tatou malo ona o galuega toe fa’atutumu o le kesi ma siakia o latou va’alele e pei ona faia so’o i le 25 tausaga ua te’a. Ua fa’ailoa mai o lo ua sailia pea e le USAF se isi nofoaga lelei e mafaia ona tautuaina latou nei va’a ma le aumalaga e 31, a’o le’i toe tu’uva’a mo NZ ma fa’ato’a o atu ai i McMurdo, le nofoaga mo suesuega uma tau pole i saute o le lalolagi ma le polokalama Deep Freeze i le Vasa Anetatika a le Malo Tele.

 

O lo ua toe tali mai Lt Mathew Johnson ia Lolo, ma fa’ailoa, ua lava tapena le latou aumalaga mo suesuega uma e ao ina faia i Honolulu mo le 10 aso a’o le’i ulufale mai i Amerika Samoa, o se tamau fo’i ua fa’atulaga atu e le Matagaluega o le Soifua Maloloina a Amerika Samoa nei. Ua faia suega a le aumalaga ina ia mautinoa e leai se tasi o malaga mai e le’i mua’i faia nei suega ia mautinoa le mama mai le verusi o le Covid-19.

 

Peita’i o atugaluga o le Kovanaa ua fa’ailoa atu i le ta’ita’i o le aumalaga a le Air Force, “E le mafai e lo’u ta’ita’i ona fa’atagaina le ulufale mai ma momoe ai o le aumalaga lenei, ina ne’i ulufale mai le verusi mata’utia i le atunuu ma lutia ai ola o matou tagata, ae mautinoa lava e le’o lava tapena i matou e togafitia le to’atele o nisi e pesia ai i le Covid-19.O lea lagona o le atugalu ina ne’i a’afia le soifua o matou tagata, ua sili atu lea nai lo se lotonuu. Ua toe lava o Amerika Samoa, le teritori sili ona la’ititi o le Iunaite Setete o lo’o totoe e le’i ulufia e lenei fa’ama’i, ma ua maualuga fo’i le taumafaiga ma a’afiaga o mafutaga a o matou tagata ua fa’atigaina e le fa’asa ua faatulaga e i matou ina ia faatumau le mama o Amerika Samoa mai le Covid-19.”

 

“O lenei te’ena o le tulaueleele mai o le aumalaga taua, e matua leai lava se mea e tasi ua manatu mama ai Amerika Samoa i le taua o le galuega o lo’o fa’atino e le Iunaite Setete i le poloketi o le Deep Freeze i le Anetatika,” o se isi lea fa’amatalaga a Lolo.

 

“O le matou teritori fo’i, o se atunuu ua to’atele na’ua matua matutua ma fanauiti o nisi matua iloga ona tele le faitauga o nisi e vave a’afia i le covid-19 pe afai ae oo mai i o matou laufanua,” o le toe upu tusia lea o le tusi fa’amalamalama a le afioga le Kovana ia Johnson ma ua fa’amalulu atu ai loa, o le a tumau pea le fa’aiuga, e le mafai ona tulaueleele ma momoe iinei le 3 va’alele a le USAF ma toe momoe ai mo le po ona fa’aauau ai lea o le malaga i NZ ma aga’i atu ai i McMurdo.

 

TUFATUFAGA SAOGA MO LE MALAGA VASEGA PULEGA FA’APISINISI ASCC

 

Ona ua le fa’ataunuuina le malaga e matau, mita’i ma fa’aosofia lagona e fa’atatuaia ai se pisinisi a le vasega o fanau o lo’o sailia tusi pasi maualuluga tau  le Pulega o Pisinisi a le BAOA i le tatou Kolisi Tuufa’atasi i lenei tausaga, o lea ua filifili ai le pulega ma le vasega lea, ina ia fa’asoa le latou saoga ua mae’a sailia ma fa’amauina i le Kolisi, le vasega o matua ma se latou taimi fiafia fa’atasi ma latou matua ma le pulega o le ASCC.

 

Na fa’ataunuuina lea fa’amoemoe i le afiafi o le aso Gafua na te’a nei i le Kolisi lava. E to’alima le aofai o le fanau sa tausailia le pasia a’ia’i o lea kosi fa’apisinisi, Business Management & Marketing. O i latou e to’atolu o le a fa’au’u mai le fa’aiuga o le vaiaso a sau nei, peita’i o le to’alua o lea fa’amae’a la’ua aoa’oga ma fa’au’u mai le tausaga fou.

 

O lea sauniga sa fa’atasia ai Matua o le fanau lenei e to’alima, o le pulega a le Kolisia sa suia mai lea e le Pule o Kosi Eseese o loo tauavea e le fanau a’oga i le tatou Kolisi Tu’ufa’atasi Dr Lopeti, ma le Pule o le itu o Tupe a le Kolisi, ma le fa’atonu o Aoaoga Matata Eseese a le Kolisi Fred ma le sui fa’asalalau a le Kolisi Jim Kneubuhl.

 

O le fa’amoemoe na fa’asoa ai e le vasega lenei le latou tinoitupe sa sailia ma fa’aputu, ua taua’aoina i le sui o le Kolisi vaega o le tupe le siaki e $1,500. Ua fa’apena fo’i ona foa’i atu e i latou ni meaalofa tupe i o latou matua. “Ona o outou matua, o le matou toomaga i taimi uma lava e fia maua ai le fesoasoani, i le tele o matou oloa gaosia mo le fa’atauina atu i le matou laulau o mea’ai ina ia fa’atupe ai matou malaga tau sailia le atamai fa’apisinisi. Lea ua matou toe fa’asoa atu ia te outou, aua o outou o le tasi o mea e tolu ua matou fa’amuamua I le olaga pe afai ae manuia taumafaiga. Le Atua e fa’afetaia, matua e soso’o ai ae mulimuli ia te oe ma lau taumafaiga.”

 

O le to’alima o le fanau o loo aofia i lea vasega ua aofia ai le tamaitai o Merci Li; Vaitapu Mailata; Angelica Tuitasi, Devine Tautunuafatasi ma Reinnette Noa, ma o tamaitai uma lava i latou.

 

Na fa’ate’ia fo’i matua i lea foa’i ma sa fa’ailoa e se tasi o tama, Tautunuafatasi, ma ia faapea atu ai, “Ia te outou le fanau fa’afetai tele i le meaalofa ua outou taua’aoina. O se mea sili ua outou faia ona o lo’o outou a’o’oga, ae taumafai fo’i i fa’ailoga maualuluga o le sini sa’o lava lea o fa’anaunau i ai i matou o matua. Ae ua outou faliu e faia mai lea ua talia ma le fa’afetai, Fa’afetai fo’i i le fa’auluuluga o tou aoaoga Dr Fa’atoafe mo le fautuaina, aoaoina ma le fa’ailoa atu i fanau ala o pisinisi, ina ia tapena ai i latou mo tiute ma faiva fa’apisinisi i le lumana’i. O lo outou sao ma le Kolisi Tuufa’atasi, e matua fa’afetaia ma ia fa’amanuia atu le Atua ia te outou i mea uma lava.”

 

Na matagofie fo’i le ‘aiga sa laulauina e le fanau mo le latou aso ma matua ma le pulega a le Kolisi Tuufa’atasi ae maise o le latou fa’afetai tele i le susuga le pule o aoaoga Matata Eseese  Fred Suisala, aua o ia lea, sa ia fa’apipi’a fa’amae’a lelei le nofoaga o masini komipiuta mo lenei vasega a le BAOA i le Kolisi e fa’atino ai latou vasega fa’aso’ota’i fa’ainiteneti i le ZOOM ma ua mae’a fa’aaogaina ma le atoatoa e i latou i a latou aoaoga ma Polofesa Taua’i, lea o lo’o opea i Hawaii ona o fa’asa o le Covid-19.