Ads by Google Ads by Google

TALA I VAIFANUA


Aumua Amata, Faipule i le Konekeresi [ata: foa'i]

Pago Pago, AMERIKA SAMOA

 

FA’AFETAIA E AUMUA AMATA TUPE FA’ALELEIA AI APITAGALU O LE LIONS PARK

 

Ua fa’ailoa le agaga fiafia tele o le tatou Faipule i le Konekeresi ina ua mafai ona maua se vaega tupe mai le National Costal Resilience Fund [NCRF] ina ia faia se galuega toe fa’aleleia atili o le apitagalu o le Paka Liona i Nuuuli.

 

O le aofaiga o le tinoitupe ua toina mai e $337,037. ma o lea poloketi e ao ina fuafua lelei ia matua fa’aleleia ai le apitagalu fa’atasi ma le Pala o lo ua so’ofa’atasi atu i le isi ona itu.

 

O lo ua i ai fo’i se isi fa’atupega o lo ua talafeagai foi ma lea poloketi e toina mai e le NOAA ma le National Fish & Wildlife, lea o le a latou so’otau’au lava i le poloketi lea ina ia talafeagai le galuega fa’aleleia ma tulaga uma o le Pala ma nofoaga e toe fananau ai I’a mo le gataifale.

 

O le isi mea e ao ina mata’ina lelei i lea galuega, ia taumafai e le soloia atu le eleele i le sami, ae ia le avea fo’i le galuega ma mea e lamatia ai le ola o meaola o fa’apunafanau i le pala.

 

O lona uiga e ao ina fausia se pa e puipuimalu ai le eleele mai lo solo atu I sami ma aia fo’I le gataifale ona o le malolosi o galu. Ia le a’afia le ola o meaola o le sami, I’a, ‘Amu, Figota ma le Togo, o lo ua I ai i le Pala, ae ia faia se galuega e fa’atumau ai le ‘le toe aia’ mai o le eleele e le suasami, ma ia aoga e tutupu lauolaola ai sosia uma o le gataifale.

 

O lea galuega toe fa’aleleia o le Apitagalu o le Paka Liona o se tasi lea o Poloketi e 46 na fuafua e toe fa’aleleia ai le Talafatai o le Amerika atoa e le faigamalo o tula’i nei, ma o se vaega tupe o le $37milion na fa’atulaga mo galuega inivesi a le Malo atoa, ae filifilia mai le 300 o galuega na fa’aulu talosaga, le tatou galuega lenei i le Paka Liona e fa’atupe.

 

O le alagatupe o lo’o toina lea i le Iunivesite o Hawaii i Manoa, ae o le Poloketi e faia mai i le Paka Liona i Tutuila nei.

 

Fa’ailoa e Aumua Amata, “O lea ua matua fa’afetaia lenei seleni mo le tatou atunuu, fa’afetai i lea vaega o le Feterale, ona o le manatu i le talafatai o le tatou Paka Liona ia sefe ma saogalemu mai nei fa’afitauli faanatura, ma e fa’afetaia fo’i le NOAA mo le latou puipuigamalu o le tatou Gataifale ma sosia uma o I ai, ma le latou fesoasoani i le galuega lenei fa’atasi ai ma le National Fish & Wildlife Foundation mo le latou vaega fa’apea ma nisi uma o le a aofia i lenei galuega taua tele.”

 

O loo sapaia fa’atupega a le NCRF e sao mai le Shell Oil, TransRe, EPA, AT&T, ma le USDoD.

 

TALIA E HAWAII GALUEGA SOOTAU’AU MA ASDOH I SUEGA O LE COVID-19

 

Ua fa’ailoa mai e le Matagaluega o le Soifua Maloloina a le tatou malo [ASDOH] ua fa’amaonia pe pasia fo’i e le Setete o Hawaii le sao ma le agatonu o su’ega o le Covid-19 lea e fa’atautaia nei e tatou Potu Suesue o Fa’ama’i Eseese a le tatou matagaluega o le soifua Maloloina ma le Falema’i Tele i Faga’alu.

 

O le saunoaga a le afioga Kovana David Ige sa ia fa’alauiloa ai, ua aofia nei potu suesue ma latou su’ega o lo’o fa’atautaia ai, o nisi o potu suesue ua pasia lelei le agava’a o latou fa’aiuga e maua mai ai i lisi pasia a le setete o Hawaii,

 

O suega nei e fa’atautaia mo so’o se tagata femalaga’i i le va o Hawaii ma Amwerika Samoa, ma le va o Amerika Samoa ma nisi malo o feso’ota’i atu i ai latou femalaga’iga i le ala femalaga’iga i le ea ma va’a folau o so’o se ituaiga, va’a oloa, va’a fagota ma va’a la’u pasese ma uta.

 

E ese mai ia Amerika Samoa, ua lisia fo’I isi nofoaga i totonu lava o Hawaii lea ua fa’atulaga ai tuiga e suea ai so’o se tasi e malaga mai le isi itu ma atumotu o Hawaii lava ia e aga’i atu i le motu o lo’o fa’atula’ia ai le Laumua, ma gasolo atu ai i latou fafo atu o Hawaii.

 

O le susuga le Foma’i o Fa’ama’I Pipisi, Dr Aifili John Tufa sa ia saunoa e suia le latou Fa’atonu o le Soifua Maloloina, Motusa Tuileama Nua, ma ia fa’ailoa ai le agaga fa’afetai aua ua iloga nei, “O a lava faaiuga e tu’uina atu e i tatou mai o tatou Potu Suesue nei, o le a taualoaina lea e le Setete o Hawaii.”

 

O le a fa’apea fo’I ona latou taualoa a tatou fa’aiuga tau le nofo va’ava’aia o so’o se tasi e ulufale mai, ma ua iloga ai le galuelue fa’atasi o i tatou ma lea setetei le taua e tete’e atu pea i le Covid-19.

 

“Ua fa’ailoa lea galulue fa’atasi ina ua mafai ona fa’agafua e Hawaii le latou nofova’ava’aia o tagatanuu uma mai Amerika Samoa o lo’o malaga atu mo talavai, pe afai ua fa’ailoa atu i suega a le Covid-19 mai iinei, o lo’o maloloina i latou.”

 

Sei vagana ai I latou ua malaga atu ae le’i faia ni suega a le Covid o i latou la na e nofova’ava’aia mo le 14 fa’ato’a tatala e alu I lona aiga i Hawaii mai pasese uma o lo ua tu’uva’a atu mo talavai.

 

27 MASINA FALE PUIPUI TAMAITAI SAMOA I WASHINGTON

 

E 40 tausaga o se tamaitai Amerika Samoa, Iliganoa Theresa Lauofo, ua lauina lona faaiuga mai le Fa’amasinoga i Seattle, e nofosala mo le 27 masina i le falepuipui ona o le ave fa’agaoi o tupe i ala tau fa’anana.

 

I le umi e tusa ma le 7 tausaga ua avea faanana ai e Lauofo le aotelega e $276,000 ma ua fa’atulaga fo’I na te toe totogia lea aotelega o le seleni.

 

O le ali’i fa’amasino Richard A. Jones sa ia lauina le fa’aiuga a le fa’amasinoga mo lenei tamaitai, ma sa ia fa’ailoa ia te ia, “O lo’o to’atele aiga e to’atele o tausia ai, o lo’o fia a’ai ma tamafai i ala faigata e sailia le tausiga lelei o latou fanau, ae sau oe e taumafai ona fa’agaoia fa’apea tupe e tausia ai lona aiga. E matua leai se avanoa e te toe pelogia ai le fa’amasinoga i lena itu, ua iloga mai lou taumafai e pelogia le fa’amasinoga i so’o se auala e te mafaia ai.”

 

Fa’ailoa e le ali’i loia a le malo tele, Briam T. Morgan, “Ua tele ala ua taumafai ai Lauofo e fa’anana ona ia mauaina alamanuia eseese e agava’a ai fanauiti, ma ua ia gafatia ona o le vave ona ia teuina o siaki ma toe vave lava ona talaina i tua a’o le’i mautu atu se sailiga ma maua ai e le o se siaki e tatau ona ia talaina.”

 

E ala i suesuega ua mae’a fa’atalatalanoa ma Lauofo, ua iloga ai, o lo’o pelogia e Lauofo le fa’amasinoga i le aofaiga o lona aiga o lo’o ia tausia, ma le aofai tonu fo’I o lona totogi ma lana tupe maua fa’aletausaga. Ua tele nisi o mea ua fa’aaogaina fa’aletatau e ia, e aofia ai nisi o fanau e le o ia tausia, ae ua faila ai ana lafoga.Ua ia gaoia fo’i siaki mai lana galuega tufa meli i le setete o Uosigitone, ao faigaluega ai.

 

Mai ia Aperila 2011 se’ia oo mai ia Tesema 2018, na talosaga ai e Lauofo penefiti a le Welfare  lea e aofia ai mea’ai, le tausiga lelei o le fanauiti, le tinoitupe patino mo tagata e le o faigaluega ma ia ia fa’amauina ai, e le o nofo le tama o le aiga ma i latou, ma ua fa’apea fo’i ona ia fa’auia atu fa’amaumauga taufa’asese e fa’amautinoa ai lena tulaga.

 

I fa’amaumauga uma nei e pelogia ai nei Ofisa ina ia maua nei tautua lautele, ua ia fa’aaogaina ai le to’a 13 o fanauiti o loo ola lava i latou i Amerika Samoa ma Samoa i o latou aiga. I lona avea o nei fanau i lisi o i latou o ia tausia, ua ia maua ai isi alagamanuia fa’aopoopo mo lona aiga moni o tausia i Seattle Washington.

 

O le aotelega o alamanuia atoa ua ia mauaina ona o lona avea o nei fanau e maua ai le $222,294. mo nei penefiti mo le fanauiti ma le $35,000.totogia mo fanau tausi i lafoga maua. O le isi solitulafono tele, ona ua Ia fa’aaogaina fa’amaumauga a nei fanauiti e tatalaina ai teugatupe i faletupe e teuina i ai nei tinoitupe ma siaki na maua mo le fanau.

 

O le isi teugatupe na ia toe tatalaina mo lona to’alua sa la nonofo, ae ua atoa le tolu tausaga i lena taimi talu ona maliu le tama. Na te teuina i ai tupe i lana teugatupe lena ae vave lava ona ia toe talaina i tua tupe na a’o le’I maua e le faletupe se fa’aletonu i le teugatupe sa ia tatalaina.

 

E silia ma le $10,000. le tinoitupe maumau ona o lena soligatulafono sa ia faatinoa, ma ua tuuina mai loa lona fa’asalaga, 3 tausaga  i le falepuipui ua suia e nofo va’ava’aia ai, ma le toe totogia o le $276,000.