Pago Pago, AMERIKA SAMOA

MALAGA 3 FOMA’I MISIONA LDS - MANU’ATELE TALAVAI MA ASIASI I AOGA

Ua taliu mai i fanua le aumalaga a ali’i foma’i e to’atolu ma latou faletua, o ali’i foma’i, o misiona e galulue fua mo le LBJ Medical Center mo le ta’i lua tausaga. 

O le au malaga, Dr John Edwards o le foma’i fa’apitoa o ponaivi [Orthopedic] ma le faletua o Becky Edwards o lo’ofaia’oga i le Kosi Fa’a-tausima’i i le ASCC. O le foma’i Dr Gregory Patch o le foma’i fa’apitoa mo Fa’ata  [Radiologist], ma lona faletua o Janene Patch o le tamaitai LPN i le itu o Tina Fananau i le Labor ma le Delivery Room. Ma le foma’i o Bob Keddington o le Fomai Fa’apitoa mo le ER ma le faletua o Sue Keddington o se tasi e faufautua i le fanau a’oga, o lana lea matafaioi sa galue ai i Utah.

O nei uma foma’i faapitoa na auina mai o ni misiona galulue i le LBJ mai le Ekalesia a Iesu Keriso o le Au Pa’ia e Gata Ai. O lenei polokalama mo Amerika Samoa lava ia, sa fa’amati’e mai e President Vince Haleck a’o tula’i i le Peresetene o le LDS i le Pasefika i Saute.

I molimau a nei foma’i, e tusa o le latou malaga, lea sa ta’ita’i malaga ai le susuga Kalilimotu Hunt, o le sui mo faasalalauga a le LDS, “O se malaga ua matou le toe fia fo’i mai iinei, sa sili ai ona matou nonofo mau i so’o se nuu lava o le Manu’atele. O ituaiga nu’u nei ma nofoaga e fia nonofo mau ai tagata uma, e filemu, e leai se mea e popolevale ai, e fiafia tagata, e le so’ona mana’omia ni mea se tele e fa’alavelave i le to’afilemu o le soifuaga fa’anatura.”

Ua fesiligia i latou i le tulaga o talavai ma i latou na va’aia fa’apitoa i le Manu’atele. “O le olaga o tagata o lo ua iloga e i ai nisi e tatau lava ona toe va’aia fo’i. E tolu talavai na faia ma sa vaevae i vaega e tolu. O gasegase lautele, lea e agava’a tele ai Dr Keddington, o gasegase o le ponaivi ma gasegase i le Takiga , Isu ma le Ua.”

Ona o lea fo’i sa malaga le foma’i fa’apitoa mo suesuega tau Fa’ata, o lea sa tele ai se taimi e galulue fa’atasi ai ma le ali’ii foma’i o lo’o galue i le Manu’atele, Dr Collins. Ua fa’ailoa mai e le alii foma’i, “O lo’o aigata le galuega tau togafitia o gasegase i le Manu’atele, pe afai e oo i tulaga tau fa’ata. Ua le mafai ona maua le so’otaga o le foma’i ma le tulaga o le va’ai patino i fa’ata o lo ua faia mo gasegase pe a mana’omia ona faia sana fa’aiuga tatau mo le ma’i.”

Ua le gata la i talavai ua latou faia, ae  sa i ai se taimi taua na latou feso’ota’i ai ma fanau a’oga i Olosega ma Ofu, fa’apea ma  le Fale Ta’u. Ua faia ai e le tamaitai faufautua i fanau a’oga se tautalaga matagofie e una’ia malosi ai le ola fia iloa ma le sailiili o fanau i le atamai lautele. 

I taimi avanoa o i latou sa maua se taimi e maulu ai maimoa i alititai o le Manu’atele. E ui ina e le’i oo i latou e maimoa i le “amu ta’uta’ua i le fa’asao i Ofu, ae ua latou va’aia le anoanoa’i o ituaiga I’a eseese ua va’aia i le alititai, O se oa sili lea ua matou va’aia, o se mea e ofo ai, e le’i a’aia muamua nei ituaiga I’a e o matou mata. E felanulanua’i ma e tofu lava ma le igoa ua fa’ailoa mai e tagata Manu’a o na I’a.”

“O latou ata na tapu’ea i lalo o le sami, ua mafai ai ona iloa e tagata o le tatou Motusa, I’a ia e fa’amamai i ai le va’ai a i latou nei. O le laea, ole fugausi, o le poge ma le tifitifi lea e ofo ai le vaega lea,” o se tala lea a  Hunt.

O Dr John & Becky Edwards, ua mae’a nei le la’ua tautua ia Novema 2020. O Dr Gregory & Janene Patch toe ono masina le la’ua tautua. O foma’i nei e to’alua na litaea loa mai la’ua tofiga ae maua loa ma le avanoa e toe malaga fa’amisiona mai ai e tautua iinei. Peita’i o Dr Bob & Sue Keddington lea e tautua i le ER o lea fa’ato’a amata le la’ua auaunaga i le ER, e ima tausaga talu ona litaea le ali’I foma’I mai lana tatua lautele i Utah ae fa’ato’a maua lenei avanoa e malaga fa’amisiona mai ai i Amerika Samoa.

FA’AMANUIAGA & FA’AMALO KOVANA -SUI TAUVA O LE PALOTA 2020

Na muamua lava fa’auia mai le fa’amalo ma le feau fa’amanuia a le afioga Kovana Lolo Moliga ia i la’ua ua filifilia e le atunuu e ala i le Palota 2020 e ta’ita’ia le malo mo le isi fa tausaga, Lemanu Peleti Sialega Mauga ma Talauega Eleasaro Ale ona o le filifilia o i la’ua e le atunuu, e avea ma Kovana ma Lutena Kovana.

E le gata ia i la’ua nei, ae ua fa’apea fo’i le Faipule i le Konekeresi ua toe tula’i mai, Uifa’atali Aumua Amata, ma i latou uma o sui filiflia o le Maota o Sui o le Fono Faitulafono mo le isi nofoaiga fou.

“Ona o I tatou o tagata Kerisiano a’ia’i, ua talitonu ai o le finagalo o le Atua ua fa’aalia mo i tatou uma e ala i mea ua tatou manana’o ma fa’anaunau i ai ua mae’a fa’aalia mai i le fa’aiuga o le palota ua mae’a fitaituga ai le au palota o le atunuu. Lea ua mae’a lea filifiliga ma ua fa’ailoa mai le tali ua latou filifilia Lemanu Peleti Mauga ma Talauega Eleasalo Ale e avea ma Kovana ma le Sui Kovana e taita’ia lana faigamalo mo le isi fa tausaga.”

“Ia avea a’u o le ulua’I sui mai le Malo atoa e avatu ai le fa’amalo ma le fa’amanuia a le malo ma ona tagata ia te oulua ona ua tu mati’e la oulua taumafaiga, ma ua fa’ailoa ma le toto’a le taofi a le atunuu, o oulua e tau’avea faiva o ta’ita’i tofia mo le nofoaiga fou  e fa’atautaia le folauga a le tatou malo mo le isi fa tausaga o lumana’i.”

“O le fa’atautaiga filemu ma le saogalemu o le Palota 2020 ua iloga ai le agaga o le atunuu atoa fa’atasi ma sui tauva ina ia fa’atautaia mea uma e tusa o le ava fatafata ma le fa’aaloalo fa’atamalii e tusa o le tatou agaifanua. Ua i ai fo’i ma le mata’u tele i le Atua, i mea uma tatou te faia. Ona o lea ua momoli atu ai la’u fa’amalo ia te outou uma o sui na tauva, ona o lo outou agaga i le filemu moni ma ala o sailiga, aua e mautinoa sa outou tautiga i nei taumafaiga uma.”

“Ou te le fa’agaloina le taumafaiga na gapatia ai fo’i le afioga Gaoteote Palaie Tofau ma le afioga Faiivae Alexander Godinet, le afioga Nuanuaolefeagaiga Saoluaga Nua ma Tapumanaia Galu Satele, fa’apea fo’i I’aulualo Faiafetai Talia ma le susuga Tapa’au Danile Aga. O la outou taimi ma le malosi na fa’aalu mo le fa’amoemoe, ae maise fo’i o le tamaoaiga, ua le taofia se mea ae ua fa’aalu ina ia mafai ona fa’alauiloa fa’amoemoega, ma tautino fo’I folasaga o auaunaga e fia fa’ataunuu, peita’I, ua tali le atunuu, ua avatu ai le fa’amalo ma le fa’afetai fai o le faiva o tamali’i. O lo outou naunau e tautua le atunuu, e le o pa’u fua, o lo’o silasila lava le Atua na te tofia i tatou i ona lava taimi. O le talisapaia o le malolo o aga a le tamali’i.”

Ona o lea ua i ai le paega fou o tatou ta’ita’I ina ia tusa ma le finagalo fa’aalia o le Atua, ua alagatatau ia i tatou uma o tagatanuu o le tatou atunuu, ona ave i ai latou fa’amua, ia tatou lagolagosua i le latou nofoaiga i so’o se itu o le faigamalo ua tutula’I mai ai e tautua. O tatou ta’ita’i filifilia, Lemanu P. Mauga ma Talauega Eleasaro Ale, e ao ina tatou sapaia fa’atasi aua o i la’ua nei o le a taumafai e fa’atautaia le tatou folauga i taimi o le lutaluta ai o le tai i mea e ono tutupu mai i le lumana’i ae maise le feagai ai ma le Covid-19 I le taimi nei.”

“Fa’amanuia atu ia te oulua Lemanu ma Talauega i le sao i ama o la oulua folauga e ui ina fita ma si’isi’i le tai o la oulua taumafiaga, ae o lea ua taula mai i ata o taulelei. Malo le tauivi fa’atausala.O lua mama na! Ia fa’amanuia le Atua pulepule tetele i lo oulua tutula’I mai o ta’ita’i o le tatou faigamalo.”