Ads by Google Ads by Google

Tala I Vaifanua


O i latou nei sa faia’oga ma fesoasoani i le fa’atautaiga o a’oga a le fanau mo le lua vaiaso i aoaoga a le Sua County Coalition. [ata: Leua Aiono Frost]

Pago Pago, AMERIKA SAMOA

 

FA’AIU POLOKALAMA KOALISI SUA – TETE’E FUALA’AU FA’ASAINA 

 

O le aso Lulu o le vaiaso na te’a sa faia ai le toe tu’ufa’atasiga o le Fa’auluuluga o le Koalisi a Sua ina ia maimoaina fo’i le toe polokalama na fa’atautaia mo le tupulaga laiti i le afioaga o Lauli’i. O le maota o le tina, o se sui fo’i o lea Koalisi, Senovefa Pritt sa fa’atautaia mai ai lenei polokalama i le lua o vaiaso na atofa ai.

 

O le lona tolu ai lea o polokalama ua mae’a fa’atautaia i le Koalisi a Sua mo le fa’amoemoe e tete’e atu i fualaau fa’asaina. 

 

O isi polokalama muamua na amata mai ona fa’atino i le masina o Iulai 2020, ma sa amata mai i le polokalama na faa’tino i Avaio ma Amaua lea sa fa’asaga i le fanau talavou o lo’o aofia i le Aumaga ma ua faamoemoe ia i latou le leoina o afio’aga. 

 

“Ona o le fanau talavou lenei ua la’a atu ina ia avea ma leoleo o le Vavao a latou fo’i afio’aga, o se tasi lea o avanoa lelei e mafai ai ona latou matauina fevesia’iga e mafua mai ona ua i ai nisi i lotoifale o ni aiga ua tagofia le ava malosi ma fuala’au fa’asaina. O i latou ia mafai ona leoina le nuu ma fa’ailoa mai nei fa’afitauli pe a matauina ua tutupu. Peita’i o i latou fo’i nei e ono a’afia i le tele o omiga e mafua mai i le ulaula ma le tagofia o fuala’au fa’asaina ma vaila’au o’ona,” o se tala lea a le peresetene o le Koalisi ia Puni Vele.

 

Ona soso’o lea ma le polokalama na fa’atino i Sa’ilele ma Masausi ma sa faatino lea ina ia aofia ai aiga. Talanoaina le tulaga o le saogalemu o tina ma fanau i totonu o aiga, ae maise lava le sofa’ia o le saogalemu e soifua a’e ai le fanau mai totonu o latou lotoifale. O le amataga lea o le va’ai o le fanauiti o tagofia e latou matua o sikaleti, ava malosi ma vaila’au fa’asaina. 

 

O le vaega mulimuli la lea ale Koalisi a Sua ua faatino ai le aoaoga lea i le fanau mai le vasega Level 1 se’ia oo i le Level 8 sa faia i Laulii. I le amataga e to’a 25-30 i latou na fa’atasia ai, peita’i ina ua fa’atautaia le Tolauapi a le Ekalesia Katoliko, na o ai lea o le isi vaega o le fanau, ma ua to’ai taunu’u mai ai i latou i le toega o le mafutaga.

 

“O le vave lava ona tima’ia o le fanau a’o le’i tagofia fuala’au fa’asaina, o le lelei lea mo le latou lumana’i. I le polokalama i le afiafi o le aso Lulu, na tuu ai ni fesili i le fanau e tusa o mea ua latou a’oa’oina ai. E le gata la ina fa’afesiligia o i latou i mataupu sa tau’avea, ae o nisi fo’i o fesili sa tuuina atu i mataupu fa’aleaganuu i tu ma aga ua le toe usita’ia e le vasega o tupulaga talavou i lenei vaitau.”

 

E ese mai fesili ma tali sa fa’atino e i latou ni pese Rap fa’asamoa ua faia taga ma ua mata’ina i le fa’alogo ma le ituaiga o tu a fanau i lenei vaitau. Na faia fo’i siva mauluulu fa’asamoa a le fanau tamaitai uma sa aofia i le vasega a le Koalisi, o se latou tali fa’afetai lea i le Koalisi ma le vasega o faia’oga sa latou aoaoina i latou i le leaga o fuala’au fa’asaina ma vaila’au o’ona pe afai e latou te tagofia i lo latou olaga atoa.

 

O lea aso sa talia ai e le tamaitai faia’oga ma ana fesoasoani faapitoa meaalofa sa fa’aoo ane e matua ma fanau sa latou a’oa’oina, ae maise ai fo’i sona totogi na fa’atulaga e le Koalisi mo le fa’atautaia o le aoaoga a le fanau mo le lua vaiaso.

 

Na foa’i atu fo’i e le Koalisi a latou meaalofa e tusa o le nofoaga sa fa’aaogaina mo le lua vaiaso atoa, ae maise o le gapatia fo’i sa tautiga ai e tapena mea’ai ma va’aia le fanau a’oga a’o a’otauina i nei mataupu e aoga mo le latou olaga atoa.

 

UMUS FALEA’OGA FOGAFALELUA – MARIST ST. FRANCIS ELEMENTARY

 

O le aso Faraile na te’a na umusaina ai le Faleaoga Fou Fogafalelua o le A’oga Tulaga Muamua o le A’oga a Marist St. Francis i Lepua. O le mamalu sa fa’atasi atu i ai le to’atele o le aufaigaluega a le Vikaluatu, i latou sa galulue malosi ina ia mautu lea falea’oga mo le fanau ma le aga’i i luma o latou aoaoga.

 

E le gata la i a latou malo fa’aaloalogia, le mamalu o le pulega a le Ekalesia Katoliko o le Pule’aga Samoa Pago Pago, ae o le vasega fo’i o le aufaigaluega mai Fagatogo se’ia pa’ia Onenoa ma Sa’ilele. Sa auai le faletua o le Kovana e avea ma sui o le Malo, ma sa saunoa fo’i o ia e molita’i le fa’afetai ma le agaga fiafia o Kovana Lolo Moliga, ina ia mae’a le galuega e tapena ai mo le a’e o a’oga a le fanau.

 

I le polokalama fa’asolo sa tula’i ai le ali’i Patele tofia a le Marist St Francis, Patele Pio Afu ona soso’o lea ma le saunoaga a Moseniolo Viane Etuale, lea sa ia fa’ailoa ai le tala o le galuega ua tula’i nei.

 

O le Vikaliatu ua aofia ai nisi o sui tofia mai matagaluega ta’itasi o le falelima i sasa’e o le Puleaga Samoa Pago Pago ina ia galulue maumaua’i fa’aatasi,ia fa’atautaia o le a’oga a Marist St Francis. Lea ua tino mai se tasi o poloketi tele sa latou fa’atulaga mo lenei vaitau e a’e ai a’oga. O le fa’afetai ua tele i le vasega o pa’aga sa foa’i ma le loto i le taumafaiga.

 

Mai le amataga o le galuega sa taua’aoina mai ai e le afioga le Tei o le Ma’oputasi Fanene Morris Scanlan le $45,000 e amatalia ai le galuega. O lona sui na oo ane mo le tatalaga o lenei galuega mo lona fa’aaogaina o lona atali’i lea o Toaali’i Scanlan. Sa fa’apea fo’i ona fa’afetaia le fesoasoani tele mai le Lealaifuaneva Peter Reids Foundation lea e foa’i i taimi uma e le gata i lenei galuega, ae o isi uma galuega a le Ekalesia i so’o se taimi e mana’omia ai.

 

Ua faafetaia ai fo’i le tula’i mai o le Matuaofaiva, Sululoto Peter Wulf e fa’atautaia lenei galuega i se tau taugofie tele nai lo se isi kamupani latou e fausia ai. Ua faia e i latou le galuega ma ua fa’afetaia lo latou tomai i le latou faiva i le tula’i mai o lenei falea’oga. 

 

O le tau aofai o lenei fale’aiga ua tula’I mai lea I le $509,000.+ ma ua fa’aaogaina na’o pou tuai lava o le faletuai, ae o isi mea uma ua fausia i le fausaga fou.

 

Na tula’i fo’i le tamaitai fa’atonusili o Galuega, Faleosina Voigt ma taua’aoina le tusi pasi i le tamaitai pule a’oga, Christina Fuala’au, ina  ia fa’ataga ai ona fa’aaogaina lenei falea’oga mo a’oa’oga a le fanau, fa’atasi ai ma isi uma mea ua fa’atulaga e fa’atautaia ai, lea e aofia ai le Kukaina ma le tapenaga o mea’ai a le fanau a’oga, ma le potu suesue fa’apitoa Fa’asaeanisi a le A’oga.

 

Ina ua mae’a mea uma ona vala’auina fa’apitoa lea o le tina o le atunuu n ate ootia le lipine e tatala aloa’ia ai le falea’oga. Na tuuina le avanoa e maimoaina ai le falea’oga atoa e le ‘au valaaulia. 

 

O le fa’afetai sa fa’afofogaina e Moseniolo Viane Etuale, i le tapulega atoa o matagaluega ta’itasi uma i le falelima i sasa’e, “Aua sa faigofie ona tali e le manana’o e tapunia lenei laumua, ae ua mautinoa e le o faigofie ona fa’atupe ma fa’ataunuu lea mana’oga. O lenei galuega o se tasi lenei o poloketi sa tatau ona fa’ataunuu, ae o lo’o fa’asolo mai pea le isi vaega o galuega e fa’aauau ona galulue i ai le Vikaliatu.”