Pago Pago, AMERIKA SAMOA

FA’AILOA LAUFOU SUIGA AFEGA TA’AVALE LE LATOU FALEOLOA

O le pulega a le Kamupani a le Laufou ua latou taumafai ona fa’ato’a filemu mai i agaga o’otia o i latou uma ua faigata ona toe afea le latou faleoloa ma isi pisinisi uma o lo’o aofia ai i le Laufou Shopping Center.

Ua i ai le maliliega i le va o le Pulega o le Laufou ma le Ofisa o le Loia Sili, o le a tatala le afega o le faleoloa i ta’avale uma e aga’i mai Leone i Fagatogo, ae o ta’avale uma o le a aga’i mai Fagatogo e o atu aga’i i Leone o le a le mafai ona afe i le faleoloa, peita’i e fa’aauau pea ona malaga aga’i i Leone se’ia maua se latou afea ai le Laufou. 

O le mea lea e tupu pe a oo ina pisi tele le alatele i itula masani, ae a oo loa ona mama le fa’asologa o ta’avale ona mafai lea ona afe, peita’i o le a i ai lava fo’i ma le vasega o leoleo o le tatou Malo, lea e fa’amalosia lenei suiga fou o le tulafono tau feoa’iga i alatele.

Mai le Aso Gafua o le vaiaso ua te’a, ua mae’a ave’esea ai le Fale Fa’atalipasi i lumafale o le Laufou, ma lumafale o le Faletele Samoa i Utulei, ona o le taumafaiga lava e fa’afo’ia le poloka tele o le alatele i taimi e pisi ma to’atele ai le mamalu lautele e feoa’i ai latou taavale i le alatele.

O le ala masani o le tulafono e ao ina fa’alauiloa fa’apitoa i le mamalu lautele le suiga fou o le tulafono tau feoa’iga, ona fa’ato’a fa’amalosia ai lea, peita’i o lo ua faia fa’amalosia le fa’amamaluina o lea tulafono, ma fa’atonuina tagata ave ta’avale i le taimi lava ua manatu ai le ta’ita’i o le Malo e amata loa ona fa’amamalu nei suiga.

O le ala lea o le talanoa mai o le sui o le pulega a le Laufou, ina ia fa’ailoa i le mamalu lautele le iuga ua i ai nei feoa’iga i le alatele i lumafale o le latou faleoloa, ma suiga e mafai ai ona maua nisi e afea le latou faleoloa, ma le toe o ese mai fo’i o ta’avale.

I le aso Faraile na te’a nei, sa matauina ai le ese o le nofoaga na fa’atumutumu i ai le poloka, peita’i o lo’o ua le mafai fo’i ona afea e ta’avale le alatele e aga’i atu i le Malaeva’alele mai le itula e 3:30 se’ia oo i le 5:30 i le afiafi. O le matua tumutumu o le poloka o ta’avale ma ua afua ai lea suiga fou.  Na to’atele leoleo sa latou fa’amalosia lea faiga fou i le alatele i lea afiafi. I le suiga fou lea, ua matua leai lava ma se fa’aaliga mo le mamalu lautele fo’i, ae ua fa’amalosia lava.

MAI LE 820 TALOSAGA - 37 UA TALIA MO LE PUA/FPUCP: Mai le 820 o talosaga mo le fa’atupega a le Panfemic Umemployment Assistance (PUA) ma le Federal Pandemic Compnesastion Unemployment (FPCU) ua fa’ailoa i se fa’aaliga a Kovana Lolo Matalasi Moliga, ua na’o le 37 i latou ua mae’a pasia mo mo i polokalama e lua. 

O le aofaiga o le tinoitupe lea e ofoina mai mo lea fesoasoani  e $376,849 ma ua iloga ai o le a agava’a i latou nei i le siaki fesoasoani e $9,000 mo talosaga nei e 37. 

O lenei fesoasoani mo i latou sa aafia a latou galuega ona o le fa’asa o le COVID-19. O i latou e agava’a i lea polokalama ua na o Sitiseni o Amerika, Nasionale o Amerika, ma i latou e fa’ataga o nonofo i Amerika. 

O lona auiga e le agava’a i latou i tagata mai fafo, ae o lo’o fa’atagaina ona galulueg i Amerika Samoa ma totogi lafoga. 

 O le fa’atupega lea mo le masina o Fepuari ma Mati 2020, ma e fuafua fo’i le tinoitupe maua i vaitau na fa’aletonu ai latou galuega.

O lo ua fa’ailoa mai fo’i, o le a tauau e lusi le tinoitupe a le FDUC pe afai o le a le toe pasia e le Konekeresi  lona soso’oga o lo’o mo’omia nei.

Ua fa’ailoa e Lolo, “Ina ua maua mai aiaiga o le tinoitupe lea, sa ou fa’ailoa atu i le tatou Faipule i le Konekeresi Tali Aumua Amata mo lana fesoasoani ina ia fa’afaigofie ai ona agava’a le to’atele o i latou nei e talia e galulue i le tatou malo ma o lo’o totogi lafoga fo’i i latou i le tamaoaiga tausi o le atunuu. Peita’i ua taua’aoina mai e le Matagaluega o Tagata Faigaluega a le tatou Malo, ua na’o le 37 o talosaga na taua’aoina, ua talia e fa’atupe i lea alamanuia.”

Ua fa’afetaia e ia le galuega tele sa nafa ma le DHR ma le latou fa’atonu ina ia mafai ona maua i latou ua agava’a i lea alamanuia. 

ALAFOU MAI TASI STREET - OO ALATELE O LE PUBLIC WORKS & PISINISI:

Ua nei le alafou ua tapena e le malo ina ia fa’ateleina ai nisi ala e fa’aitiitia ai le tele o ta’avale i luga o le alatele i taimi e poloka ai feoaiga o ta’avale i le atunuu. Ua fa’ailoa mai ua tapena le malo se isi ala alo e amata mai le Tasi Street i le Paka Liona, ae tau atu i le ala o i ai le Public Works ma isi pisinisi i Tafuna lava.

O le auala tonu lava lea e oo atu i le NAPA i le alatele e aga’i atu i le Malae Va’alele.

Ua fa’ailoa mai i se lipoti a le Kovana i le fonotaga o le aso Faraile talu ai. Ua fa’ailoa mai ua amata le galueaina o lea ala alo ma ua fuafua fo’i e tau fesoasoani i le to’atuga o le atunuu i le tumutumu o le alatele ma ua fa’ailoa mai e le o toe mamao ae mafai loa ona fa’aaogaina lea ala alo.

Ua iloga mai, e leai lava se taimi atofaina mo se tauofoga, ae maise o se pemita fo’i e fa’atautaia ai lea galuega.

O le vaiaso talu ai sa amata le galuega ma ua fuafua e na o le lua vaiaso e faia ai ona ma’ea lea. E le’i fa’ailoa e le malo le kamupani ua mauaina lea konekarate.