Pago Pago, AMERIKA SAMOA

FA’AMAVAE “CPO”, DR. ORETA CRICHTON SEI TAUVA I LE PALOTA:

O le tamaitai sa avea ma CPO o le Matagaluega o Oloa a le Malo, Dr Oreta Mapu Crichton, ua fa’amavae mai lona tofiga lea na tofia i ai e le afioga le Kovana Sili, ona ua amata nei ona faia ana kemupeni mo le tofiga “Faipule i le Konekeresi o Amerika Samoa.”

I le toe fonotaga a le Kapeneta ma Kovana Lolo Moliga na auai ai o ia, sa ia fa’ailoa ai lona lea fanoga, fa’atasi ai ma lana fa’afetai tele i le fa’atuatuaina o ia e Kovana Lolo Moliga, e tula’i ma tau’ave tiute o le Chief Procurement Officer a le Malo, mo le 8 tausaga.

“Sa i ai le manatu ina ia fa’ao’o pea le auaunaga i le fa’aiuga o lenei nofoa’iga, peita’i ua toe tepa i tua ma manatua nisi o fautuaga a le afioga le Kovana Sili, aua le fefe e fai au fa’aiuga e fai lava mo oe ia, fai a’o maua le taimi,” o se fa’amatalaga lea a Crichton.

O se fautuaga taua tele e Kovana Lolo na fa’ailoa mai ia te a’u, “O le tofi lea mo Uosigitone e le o se tofi sailia mai ai ni tupe e tausia ai ala laupapa, ae o le mea taua o le fa’aleleia o le so’otaga ma le Laumua.”

“Ua matua talitonu lava le tama o le atunuu, o ta’ita’i ua tofia e le Atua ona e le o ni latou ofo ma polomisi o faia i le atunuu, ae o le latou alofa ma le agaga e fia tautua i le lautele o le atunuu.”

Ona o lea agaga ua manatu ai o ia e tula’i ma amata lana taumafaiga, aua ua mafai ona tutua’i ta’ita’i ona o le loto o tagata lautele o le atunuu.

Ua talitonu lava le kovana, “afai lava tatou te tu’u le fa’ataua i o tatou tagata, e fa’apena fo’i ona tali mai lava le atunuu mo oe, ma ua aluga tutusa ai uma i latou o tauva mo tofiga ta’ita’i o le atunuu, i le fautuaga a le fa’aao o Amerika Samoa.”

O lea fa’amavaega a Dr. Oreta Crichton na fa’alauiloa i le aso Faraile na te’a nei.

FAAILOA VAIFOFO FA’AITITIA LE POLOKA AUALA I LAUFOU

I le fonotaga a le kapineta i le aso Faraile ua te’a, na fa’ailoa ai e Kovana Lolo Matalasi Moliga lana fuafuaga ua fa’ataoto nei ina ia soloia le fa’afitauli o le poloka umi o le alatele i Laufou i taimi e gasolo ai tagata i galuega i le taeao, ae maise fo’i le taimi o le a toe taliu ai tagata uma i aiga.

A’o le’i oo ina toe a’e a’oga a le fanau ia Aukuso 31, ua tatau ona matua fa’agaoioia lea fuafuaga taua, ma ua mae’a fo’i ona ia taua’aoina lea fuafuaga i le Loia Sili ina ia fa’amalosia.

O lana fuafuaga ua fa’ailoa mai e afua i le itula e 7:00 i le taeao se’ia oo i le 8:30 i le taeao lava, ma le itula e 3:30 i le aoauli se’ia oo i le 4:30 i le afiafi, e le tatau ai ona toe ave se ta’avale i le faleoloa o le Laufou pe toe tu fo’i se pasi la’u pasese i na falefa’atali pasi e i lumafale o le Laufou ma le CBT.

Ua fa’atonuina fo’i e talu mai le aso Sa ua te’a nei, e ao ina ave’esea le fale fa’atalipasi i lumafale o le Laufou. Ua fa’asa ona toe piki ni pasese i luma o le CBT. 

Ua ia fa’ailoa fo’i, o fale fa’atali pasi nei e masani fo’i ona tumutumu i ai le fanau a’oga.

Saunoa le kovana, “O le 6 masina talu ai, na ou fa’akonekaratea ai se tasi na te faia se suesuega i le afuaga o le poloka soo o le alatele i le amataga o galuega ma le manava o galuega, ae maise lava i le nofoaga o le faleoloa o le Laufou.”

O le fa’aiuga o lea suesuega, ua tele na’ua le faleoloa o le Laufou, ua toeititi atoa le 20 o pisinisi  ae ua le lava ai le avanoa mo pakaga o ta’avale. Pe afai e tu’u i le fua fa’atatau o faleoloa ma pisinisi ma tetele o pakaga e tatau ona fa’aavanoa ai, e na’o le Carl’s JR lava ma le Bluesky Communications e lava ai le aotelega o pakaga ua fa’aavanoa mo ta’avale i le Laufou atoa.

O le fa’aiuga a Lolo ua tuu atu i le Fa’atonu o le Matagaluega o Fefa’ataua’iga ina ia fa’ao’o le fa’aiuga i le Pulega o le Laufou Shopping Center, ua tuuina atu le 60 aso e faia ai se fuafuaga e fa’atele atili ai le latou pakaga o ta’avale. Afai e le maua se vaifofo o lea mana’oga fa’apitoa i le taimi atofa, o le a tu atu le Malo e ave’esea uma isi pisinisi o i ai i le Laufou ae tuu ai na’o pisinisi a le Carl’s Jr ma le Bluesky.

“I le tasi le eka ale McDonald i Tafuna o lo’o lava ma totoe le pakaga o ta’avale aua o lo’o tasi lava pisinisi o lo’o fa’afoe mai ai.”

O isi fa’aiuga mai le suesuega ua fa’ailoa ai e tusa ma le 80% o le aufaigaluega i pisinisi ma le Malo olo’o alaala i le falelima i sisifo, ae tatau lava ona aga’i mai e faigaluega i le falelima i sasa’e i aso uma.

E afua mai le falelima i sisifo lea ia Nuuuli se’ia oo atu ma tala atu o Leone. Ua na’o le 20% o le aufaigaluega a le Malo ma pisinisi tumaoti e alaala i Fagatogo ma le faletlima i sasa’e. O le poloka lenei ua fai pea ma fa’anoi a tagata faigaluega a le Malo, ua pani latou pepa i le ta o le 8:30 e aga’i atu i le 9:00 i le taeao ae o le tala lava, o le poloka o le alatele.

Ona o le poloka o alatele i Laufou na talanoa ai i latou ma sui o le saofaiga a le afioaga o Nuuuli ina ua taua’aoina le fa’aiuga o lenei suesuega fa’apitoa, ona o se taumafaiga lava ina ia maua se vaifofo mo le poloka o alatele.

O lea ua mae’a lipotia lea alatele na talosagaina e Kovana Lolo, e afua atu i tuafale o Paea Tuai seia alia’i ane i lumafale o le falepuipui.

Afai ae loto i ai aiga e ona eleele nei o le a a’afia i le galuega lea, e lelei, ae afai e leai, ua pau la lea o se isi avanoa e fa’aleleia ai le poloka o alatele i taimi e pisi ai aiga e fela’ua’i tagata faigaluega faapea ma fanau a’oga. Ua ia fa’ailoa fo’i e mafai lava e le pisinisi ona maua ana tupe, ae le mafai ona fa’atigaina le atunuu e ala i feoa’iga.

Ua fa’atonuina e Lolo le Loia Sili ina ia amata tusia se aiaiga mo le Laufou  ina ia usita’ia le taumafaiga ua tuuina atu e tusa o avanoa mo pakaga o ta’avale, ae o le isi lea taumafaiga ua tu’u atu, ia le toe tuu avanoa i se ta’avale e afea ai lea faleoloa i taimi fa’atulagaina o aso faigaluega ta’itasi o le vaiaso.

O le avanoa lena e mafai ai ona le tuai fanau a’oga i latou aoga ma tagata faigaluega ia maua latou taimi amata i galuega. Ua fa’apena fo’i i le manava ai o galuega, o le a le tuai oo tagata i o latou aiga e malolo.