Ads by Google Ads by Google

Tala I Vaifanua


[ata: foa'i]

Pago Pago, AMERIKA SAMOA

 

POLOKALAMA ROCKY VOLLEYBALL- FA’AFO’I TA’ALOGA I LE AMATAGA

 

Ua amatalia le A’oga o le Fa’agatama a le Volleyball lea ua fa’aigoaina o le Rocky Volleyball Clinic, ua fa’atautaia i le vaitau o le tu’uaga umi o a’oga. 

 

O le isi mea sili ona lelei, o le a a’otauina ai le silafia lelei o tulafono e ta’a’alo ai i le ta’aloga e fiafia tele i ai fanau a Samoa, le volleyball. Ia lelei ona a’oa’oina i latou i ala e mafai ai ona pasi le polo ia ola lelei mo le sui e sipaika atu i le isi ‘au, ia maua se ‘ai. 

 

O le Rocky Volleyball na amata mai i le aso 15 Iulai, ae fa’ato’a fa’aiu i le aso 31 Iulai, 2020.

 

“O le ‘auga o le fa’amoemoe lenei, ina ia mafai ona fa’afiafia le fanau e soifua ta’a’alo i fa’agatama ua fa’atautaia i totonu o aiga i lenei vaitau, fa’amalosia o latou loto e ta’a’alo ma iloa ta’a’alo fa’atauva i le Volleyball ma ia fa’asosofia le naunau i taimi uma ia le motusia le fa’amoemoe e avea ma ala e fa’atupe ai a latou a’oa’oga maualuluga pe a tu’ua aiga ma le atunuu, ae masi’i atu i fafo e fa’aauau ai a’oa’oga maualuluga mo fa’ailoga maualuluga,” o se saunoaga lea a se tasi o tamaitai o lo’o ia fa’afoea ta’aloga a le fanau i le aso Faraile ua te’a.

 

O ta’aloga nei e faia lea i le Malae ma le faleta’alo a le South Pacific Academy i Tafuna. Ua le totogia se tupe e te auai ai.

 

Ua na’o aso Gafua seia oo i le aso Faraile e faia ai ta’aloga nei, ma ua talosagaina le fanau ia ulufale atu ma se’evae ta’alo ma lau fagu vai aua le fa’amalosia o lou tino a’o e ta’alo. O le itula e 7:30 i le taeao se’ia oo i le itula e 9:30 ua faia ai nei ta’aloga ma a’oga volleyball mo fanau aoga, 5 tausaga i le 18 tausaga le matutua ma ua avanoa,  ua maua le taimi e fia ta’a’alo fa’atasi ai ma isi.

 

“Fa’afiafia e ta’a’alo, fa’amalosia ia agava’a i lau ta’aloga ma fa’aosofia ia mautu lou silafia o le Voll;eyball ia aoga ia te oe i le totogia o au a’oga maualuluga i Iunivesite ma Kolisi i fafo. O le fa’amoemoe autu lava lea o lenei taumafaiga,” o se tala lea tamaitai faia’oga volleyball, e le fia fa’ailoa lona suafa.

 

TAPENAGA  MALAGA VAALELE TOGIPAU,  FA’ASOLOGA O SUEGA COVID-19

 

Aumalaga ua tapena mo le malaga togipau i Hawaii a le Hawaiian Airlines ia Iulai 21 e totogia e le Medicaid, ua tautau ona mae’a gasolo e faia suega o le COVID-19. E tatau ona fa’ailoa i lea suega e le o  maua oe i le Coronavirus, ona fa’ato’a Mafai lea ona talia e malaga. E aofia fa’atasi ai tagata matutua ma fanauiti.

 

O  Iulai 18 ma le 19 sa amata ai ona fa’atualga suega o tagata malaga, ma faauau mai ai i le aso lenei, Aso Gafua, Iulai 20 - mai le itula e 9am se’ia oo i le itula e 3:00 i le afiafi.

 

E na’o le ta’i 50 tagata e mafai ona faia suega i le aso  e fa’asolo lava i le sui na muamua atu, i le falemai i Faga’alu,. E fa’apena fo’i i le falema’i i Tafuna mo le Potu Suesue a kle Matagaluega o le Soifua Maloloina, e na’o le 50 i latou e  mafai ona faia suega.

 

Ona o Honolulu le ulua’i nofoaga o le a siakia ai le ‘au malaga, o iina o le a fa’amautu ai le 14 aso e nofo va’ava’aia mo suesuega uma  o le Covid-19.

 

E tatau ona e malaga ma ave fa’aiuga uma o au suega na faia, fa’atasi ai ma lisi o au talavai ua mae’a fa’atulaga. Ia silafia foi e tagata o le a suesuea toto’a oe e tusa o au fa’amaumauga ma mea na malaga i ai aua o le a fesiligia oe i le malae vaalele i nei mea uma. O le mafuaga fo’i o lau malaga atu, o le a fesiligia ai oe, ma o fa’amaoniga ia mafai ona folasia.

 

O le a aoina suega ma pepa fa’atumu o lou soifua maloloina i le malaeva’alele i Honolulu e i latou o e fa’atulaga e latou te taulimaina pe a to’ai taunuu ma mea’a fesiligia outou i le taimi e kilia ai.

 

Pe afai o oe e ao ina toe fa’aauau ese atu lau malaga mai Hawaii i nisi setete o le Iunaite Setete, e le tatau ona e toe alu ese atu mai le Malae Va’alele, e ao ina e nofo ai pea i le malae va’alele, ina ia le avea ai oe e nofova’ava’aia i Hawaii ma misia ai lau malaga ua fa’atulaga. Nofo pea oe i le malae va’alele e tatalia ai le toe malaga ese atu o lau va’alele fa’atulaga mo oe, ae ua le fesoota’i fo’i oe ma nisi o tagata i Hawaii.

 

O pasese uma lava ua tatau ona latou fa’aaogaina pupuni fofoga i le taimi o le malaga i louga o le va’alele ma lou tulaueleele fo’i i Honolulu. Afai ua leai sau pupuni fofoga o lo ua saunia fa’apitoa e oe lava ia, o le a tufaina atu pupuni fofoga i le malae vaalele.

 

Tusa lava poo le va’alele lenei o loo totogi pau le malaga mai  ae ua fa’ailoa mai o i latou uma lava o tagatanuu Samoa ma isi atunuu ua mae’a nofo mau i Amerika Samoa,  o le a fa’aalia lau pepa o le pasese toe fo’i mai pe a mae’a lau talavai i le Ofisaa o le va’alele Hawaiian Air. Ua le mafai ona ulufale so’o se pasese e tusi folau ese mai tusifolau Amerika, pe a leai sana pasese toe fo’i mai. O isi uma pasese o lo’o agava’a ie totogia e le Falema’i o outou pasese o le alu ma le toe fo’i mai, e fa’ataunuu lea tiute e le Falema’i LBJ Medical Center.

 

Pe a i ai nisi fa’afesili telefoni 699-4777.

 

TAPUNIA FAILAGA O LAFOGA IULAI 15

 

O Iulai 15 lea na tapunia ai le failaga o lafoga mo le tausaga 2019 peita’i e tatala lava le faitoto’a mo i latou ua tuai ona faila ae ua totogia fo’i le sala.

 

Na toe fa’aopoopo le isi 3 masina e tu’uina atu i tagata e oo mai ai e faila latou lafoga ona o le Coronavirus, ma ua ala ai ona oo mai ia Iulai 15, 2020 peita’i o tausaga ta’itasi uma lava e fa’atulaga lea aso ia Aperila 15.

 

Ua iloga mai i lenei tausaga, ua to’atele i latou ua aga’i atu a’o le’i tamau le taimi e muta ai le failaga o lafoga, ona o le oo mai o le faiga fou a le Stumulus. Ua fa’apea fo’i ona toe fa’amalosia ai nisi e faila atu latou lafoga, ae sa failaina tausaga ua tuana’i pe lua i le tolu.

 

Ua le mafai ona taua’aoina mai se faitauga aofai o e ua mae’a faila lafoga mo le tausaga ua te’a i le taimi nei e le sui o le Ofisa o Tupe, Keith Gebauer, ae ua ia fa’aalia, “O se matua fiafiaga o le to’atele le faila o latou lafoga i lenei tausaga, ua le fa’atuai fo’i.”

 

O le toe vaega o totoe nei e mafai ona taua’aoina a latou siaki Lafoga  o i latou sa taofia ona o lo’o i ai ni fa’aletonu i fa’amaumauga o lo’o faila mai i lafoga ma i latou o lo’o totoe e le’i maua atu i le vaega na mae’a taua’aoina atu latou siaki lafoga, ae o le to’atele o lo ua mae’a fa’ao’o atu latou siaki lafoga mo le tausaga 2019.

 

O Iulai 31, 2020 lea ua fa’atulaga lava e fa’auia atu ai siaki o stimulus o totoe nei, fa’atasi ai ma i latou fo’i o lo’o totoe lafoga o lea fa’ato’a faila mai e tau ia Iulai 15, 2020. E o atu fa’atasi lava nei siaki i le toe aso o Iulai.