Ads by Google Ads by Google

Tala I Vaifanua


[ata: foa'i]

Pago Pago, AMERIKA SAMOA - 

 

FA’ATULAGA LE MALAGA TOGIPAU ALE HAWAIIAN AIR - IULAI 21, 2020

 

O le malaga fuafua a le Hawaiian Air ina ia oo mai e avatu ai le pasese o e fia faia talavai i Hawaii ma le fanau a’oga e fia auina atu i fafo mo a latou a’oga, ua fa’atulaga nei e to’ai taunuu mai ia Iulai 21, 2020.

 

O se fa’asalalauga mai le Ofisa o le Kovana ua fa’ailoa ai lenei malaga togipau, sa talosgaina e le  LBJ Medical Referral Program ona o le tele o gasegase ua i ai nei i le falema’i tele i Faga’alu ua tatau ona auina atu i fafo e fa’aauau ai togafitiga.O togafitiga nei ua finagalo ina ia fa’aauau i Hawaii mo gasegase.

 

Ona o lea e sau le malaga fa’apitoa lenei mai Hawaii, e le o aumaia ai se pasese lava e tasi ma ua fa’atulaga fo’i e le Ofisa o le Kovana le pasese e malaga atu ma lea vaalele, e fa’amuamua lava i le vasega o gasegase e auina atu ma le vasega o fanau e a’e i Iunivesite ma Kolisi i fafo, e fa’aauau a’oga i le amataga o le tausaga aoga fou.

 

Ua i ai le fa’asologa ua fa’atulaga ai le nofoia e nisi o pasese fa’atagaina i lea malaga togipau. Afai o le a ma’ea faofale le pasese o gasegase uma ua pasia mai falema’i ma fomai i Hawaii e auina atu, ona ave lea o le fa’amuamua i avanoa o totoe i le Ofisa o le Loia sili mo le fanau a’oga e tatau lava ona a’e i le tausaga a’oga fou i Iunivesite ma Kolisi i fafo, a mae’a na avanoa e le uma lava nofoa o le va’alele, ona tuuina lea o le avanoa o soso’o mai i le Matagaluega o le Saogalemu fa’alotoifale mo le fanau ua tauto i le vaega au e tatau fo’i oNa malaga atu, fa’apea ma nisi o le vaega a le Militeri ma vaega au.

 

“Ona o lenei malaga o lo’o togipau e le AS Medicaid State Plan, ma e agava’a fo’i i le toe fa’atupega fa’afo’i a le Medicaid ua le mafai ai ona malaga atu ai nisi ua totogia o latou pasese i Hawaiian Air mo le malaga i Hawaii, ma o pasese na e le o mua’i fa’ataga mai e le Ofisa o le LBJ OIMR mo sona nofoa i lenei malaga togipau.

 

Afai o i ai nisi o lo’o tapena lava e o latou aiga a latou malaga mo togafitiga ma talavai i Hawaii e ao lava ona sailia mai  se fa’atagaga mai le LBJ OIMR mo se avanoa o lea ma’i ina ia maua ai lea fesoasoani pe afai o le gasegase ua mae’a maua le Medicare.

 

O fanau a’oga e maua mai le latou fesaosoani i nisi fa’afesili mai le Ofisa o le Loia Sili.

 

MEA E AO INA TAULIMAINA E GASEGASE & PASESE

 

Mo gasegase uma e foufou malaga e ao ina mua’i mautu uma latou pepa ua mae’a sainia e le LBJ OIMR, e aofia ai le falema’i ma foma’i ua mae’a fa’atulaga mai Hawaii e va’aia sa’o i latou i le taunu’u atu.

 

Ua tatau fo’i ona mautu mai pepa ua mae’a sainia ma saunia lelei mai e foma’i ma falema’i e ulufale i ai i le taunuu i Honolulu.

 

O gasegase uma e malaga atu ua mae’a ona fa’amautu le agava’a i le Medicare ma ua mae’a fo’i ona pasia mai e le Ofisa o le Medicaid e malaga mo togafitiga. E ao fo’i ina fa’amautu a’ia’i lea avanoa mulimuli lava a’o le’i tapena le gasegase e malaga ese atu, ua fa’atulaga fo’i sui iloga o le Medicaid i le falema’i i Fagaalu mo le tapenaga o gasegase i le taimi lea.

 

E tatau ona mae’a sainia e le Gasegase ma le sui o malaga ma i latou le  feagaiga o le totogia o le togafitiga ma le tausiga lelei o i latou i falema’i o le a togafitia ai. E faia tui puipuia o gasegase ma latou sui o malaga ma i latou i le 72itula ae le’i malaga ese atu i latou, ma e faia lea e le DOH.

 

O le aso e muta ai le talosagaina e se gasegase e va’aia foma’i fa’apitoa ina ia malaga i lea aso ma amata fa’agaoioia o latou pepa uma e malaga ai o Iulai 10, 2020, Aso Faraile ua te’a.  E muta talosagaina o se avanoa e fia auai ai i le pasese lea ia Iulai 15, 2020. A misia ua le toe talia.

 

O i latou e le o ni tagatanuu o Amerika Samoa ma Amerika e le agava’a i le toe totogia o pasese i lea malaga e le Medicaid, o lona uiga o latou pasese e  le falema’i LBJ Medical Center, ma ua fa’atulaga le mautu o le pasese o ia gasegase ia Iulai 10, 2020.

 

VAEGA LUA O PASESE AGAVA’A - FANAU AOGA FOU & FANAU AOGA TOE FOI:

 

O le ofisa o le loia sili ua latou nafa ma le taumafaiga e fa’atulaga lea vaega o le pasese mo fanau a’oga fou o le a’e i a’oga ma le fanau a’oga sa tafafao mai lea o le a toe taliu mo le amataga o tausaga a’oga fou.

 

Ua tatau ona mautu se fesoota’iga a le fanau a’oga uma lava ma le tamaita’i o Audreena Sualevai o le Ofisa o le Loia sili, ina ia mae’a iloa patino mea ua mae’a saunia e oe le tamaiti aoga o fia malaga.

 

O le emeli a lea sui  audreena@la.as.gov  poo le vala’au i le telefoni 633-4163 o le a maua ai se feso’ota’iga lelei ma ia mo le fa’ailoa patino ia te oe o au tapenaga.

 

Ua fa’atulaga ua na’o fanau a’oga mo lea malaga togipau. Ua tatau ona taua’aoina e fanau a’oga i fafo le tusi ua fa’ataga ai o ia ona a’e i le Iunivesite poo le Kolisi i fafo. Ua tatau ona mautu i ai ma le tusi ua fa’ataga ai ona a’e ma ua auai lona suafa i le lisi o fanau e a’e i le a’oga lea.

 

O lo ua mana’omia fo’i se tusi e fa’amautu atili ai ua fa’amoemoe le a’oga lea e fa’atautaia latou a’oa’oga i potu a’oga e aofia ai ma le tatou alo lea i a latou vasega. Pe afai ua pasia uma le vaega muamua lenei o mea e ao ina taua’aoina e fanau a’oga, ona fa’asolo lea o le suesuega a le Au Ofisa galulue i le paketi atoa a le fanau a’oga, pe ua agavaa lelei mo le a’e i a’oga nei ua fia ulufale i ai. 

 

Pe a mae’a pasia ona va’aia loa lea e le vaega suesue lea mea uma mo le fanau a’oga, ona va’aia loa lea e le fanau a’oga le Ofisa o le Medicaid e kilia mai ai  lana pepa fa’atumu  e totogia ai le latou pasese mo le malaga atu, ae leai se pasese e toe fo’i mai ai. O le peimeni lea e totogia mai e le Ofisa o le Tupe a le Malo o Amerika Samoa. E tatau ona i ai se kopi o le lisiti o lea peimeni i le tamaititi aoga ma e tatau ona fa’ao’o lea lisipiti i le Ofisa o le Medicaid e kilia ai lona malaga ese atu aua ua totogia lona pasese. O le faamautu fo’i lea o lona nofoa e malaga atu ai. E tatau fo’i ona mautu mai le DOH se suega a le Covid-19 e le o e maua ai, 3 aso a’o le’i malaga ese atu.

 

AUMALAGA MILITERI MA TAGATANUU TOE FA’AFO’I I AMERIKA:

 

O isi uma sui ua agavaa e fa’atumu ai le pasese lenei mo Hawaii o i latou o fanau ua fuafua e ulufale i le vaega au a le malo tele e aofia atu ai ma tagatanuu o Amerika ua leva ona tatau ona toe taliu, peita’i e le o mafai ona toe fo’i ona o le fa’asa lenei o le covid-19, ma o le lisi lea e tapena e le Matagaluega o le Homeland Security.

 

O lo ua mae’a fa’atulaga lea matagaluega latou te siakia atoa lea vaega o le pasese, e le o nisi o le VA o lo’o malaga mo talavai ma le fanau a’oga o lo’o toe fo’i i a latou a’oga e amatalia pe fa’aauau. E tatau ona maitauina ua mae’a faia tui o le Coronavirus i totonu o le 3 aso ae le’i malaga.

 

Ua mae’a taua’aoina le pepa kilia mai le Ofisa o le DOH e fa’ailoa ai lea tulaga. Ua totogia lava e le sui lona pasese  pe a oo ina mae’a pasia o ia e avea ma se tasi e malaga i lea fo’i malaga fa’apitoa a le Hawaiian Air.

 

Ia mautu i le sui malaga kopi uma o nei aiaiga ma e i ai lava le tamau e ao ina latou va’aia le Ofisa o le Medicaid  e taulima ane ai le latou pepa fa’atumu  e fa’auia ai le latou peimeni o le pasese i le Ofisa o le Tupe a le Malo o Amerika Samoa mo le malaga atu ae le toe fo’i mai.

 

Pe a uma ona totogia lea vaega o le pasese ona toe fa’aoo lea o le lisiti i le Ofisa o le Medicaid mo le fa’amaoniga ma fa’amaumauga. Pe afai e le’i totogia lou pasese lea i le Ofisa o le Medicaid Cost Share, a’o le’i mae’a Iulai 17, 2020, e le mautinoa lou malaga ai i lea va’alele.