Pago Pago, AMERIKA SAMOA - 

MOMOLI AFIOGA UIFA’ATALI AUMUA AMATA AFIO’AGA I PAGO PAGO 

Ua mae’a ona fa’atino le o’o o le afioga le Tei o Ma’oputasi Uifa’atali Aumua Amata i lona afioaga o Pago Pago ma ua fa’amauina ai lona tautua i lona aiga fa’apea ma le afio’aga e tauavea lea suafa o lona aiga.

Peita’i ua ia fa’ailoa, “O se aso patino mo le itumalo o le a fa’ataunuu mulimuli mai ae tatau lava ona fa’afetaia le pa’ia o aiga, ona o le fa’atuatuaina o a’u mo lenei suafa, ae o se fiafiaga ua mautu i lou agaga, ona o le suafa fo’i sa tau’avea e le tama, Tali Peter Coleman, ae o lea ua soo’ula  mo a’u, ma ua fa’afetaia ai le alofa o le Atua, tainane fo’i le finagalo o le pa’ia maualuga o aiga, ua saunia fo’i e le Atua taimi ma aso ma mea e tutupu ai, e faailoa ai lona finagalo.”

I lea fa’atasiga i le aso Toona’i na auai ai le toatele o le saofaiga mamalu a le afio’aga o Pago Pago i le Maota i Gagamoe.  Na mua’i tapena fo’i le ava o feiloa’iga a le afio’aga mo le fa’amoemoe, ma na tapa ipu ai Tali Aumua Amata i lona suafa fou, o le afioga le Tei o Ma’oputasi.

Na tapaipu le afioga le Ma’oputasi, le afioga le Aliioaiga Asuega Fa’amamata, faapea fo’i le afioga Fanene, afioga le Matua Pulu Ae Ae Jr. ma le tofa Tuaolo E. Fruean ma isi uma na sasao i le maota.

Ona ua fa’atinoina lea fa’amoemoe o aiga i le aso tonu e fa’ailogaina ai le Fu’a a le Iunaite Setete o Amerika, o se isi lea mea ua tula’i mai fa’afiafiaga ua fa’aluaina lea i le afio’aga o lo’o tu mati’e ai le fa’ailo a le Aeto i luma maota i Gagamoe ae o le afi’oaga fo’i e fa’ailo le latou manulauti o le Aeto.

AMATALIA TAUTUA PRES. FRANK BARRON - KALAPU A LE ROTARY

O le aso Faraile na te’a nei, Iulai 03, 2020 na fa’atautaia ai se faatasiga na fa’atasi i ai totino uma o le Rotary fa’atasi ma latou sui na vala’aulia faapitoa ina ia auai e molimauina le fa’aiuga o le nofoaiga a Peter Tinitali ae fa’ae’e le tofi Peresetene e amatalia ai le nofoaiga a Frank Barron.

O le polokalama fa’asolo sa fa’atautaia lea e John Raynar ma o ia lea sa fa’alauiloaina le avanoa matagofie o le ali’i Peresetene sa tula’i mai ia Iulai 2019 se’ia oo mai ia Iulai 2, 2020.

Mo le fa’amoemoe o Barron o le peresitene fou o le kalapu, sa ia la’eia ai le la’ei o le Aquaman ma sa ia taulimaina fo’i le tui o le malosi’aga o le ali’i, o lona fa’amoemoe ina ia avea lana nofoa’iga o se tasi o nofoaiga e fa’atautaia ni galuega lelei ma le aoga mo le to’atele o tagata lautele o Amerika Samoa.

I le sauniga, sa auai le Sui i le Konekeresi o le tatou Malo, Aumua Amata Radewagen, ma nisi o lona ofisa, fa’apea ma nisi o uo mamae a totino o le Rotary. 

I le lana saunoaga fa’amavae, sa saunoa ai Tinitali ma sa ia fa’afetaia ai le mamalu o totino o le Rotary ona o le galulue faatasi ma le limalima fo’i I galuega sa fa’atino a le Rotary i lona tula’i mai.

“Sa mafai ona fa’aauau le foa’i mo le Hope House i Fatuoaiga. O le isi vaega o le tatou foa’i tupe na fa’ao’o atu lea e fesoasoani i le Kalapu a le Nukualofa -Tonga Rotary, ona o a’afiaga o le afa na laveia ai lena atunuu.”

“O nisi o galuega na fuafua a le Rotary ua taofia nei uma, ona o le fa’asa a le COVID-19, peita’i o le mea e ao ina usita’ia aua ua aluga tutusa ai uma ma isi o tatou uso a Rotary i isi fo’i malo uma o le atuvasa.”

Na faalauiloa fo’i, ua misia e lana nofoaiga se tasi o sui totino aoga tele fo’i i le Rotary, le susuga le alii Loia o Steve Watson, ma ua fa’atasi mai pea lona faletua, Leilua Willis Watson e avea ma sui o lona ali’i i le mafutaga a le Kalapu a le Rotary.

O lana fa’afetai o le agaga o totino uma o le Rotary ina ia galulue fa’atasi e limalima i so’o se galuega e fia fa’atino. O le auga o nei mea uma, o le tautua e aoga mo isi. Ma ua fa’ailoa mai nei le latou sui fou ua tula’i mai nei, Roy Hall Jr.

O Barron o se tasi ua atoa le tolu tausaga talu ona avea ma totino o le Rotary. Na avea o ia ma failautusi  mo le lua tausaga ona soso’o lea ma Sui Peresetene mo le tausaga ua te’a. Ua faigaluega o ia mo le Purse Seine Samoa Inc. O ia lea sa ia fa’alauiloa le meaalofa taua mo Tinitali.

O nisi na taua’aoina latou fa’ailoga fa’apitoa e le ali’i Peresetene ua tu’ua le nofoa ta’ita’i, na ia tofia ai le tamaita’i o Margie Lefiti e avea ma sui e sili galue malosi a le Kalapu o le Rotary. O ia lea e moni ai le auau a le Rotary, ua ia fa’ataua atu lana tautua nai lo le manatu mo ia lava! E i ai ma le isi soa o le fesoasoani malosi ia te ia i ona tiute ma mea uma na fa/atautaia a le Rotary i lona tula’i mai, ma o ia fo’i lea sa taua’aoina lana fa’ailoga.

MALAGA A LE SAMOA AIRWAYS I LE MANU’ATELE

Ua fa’ailoa mai e le sui o le Kamupani Vaalele a le Sasmoa Airways, ua mafai ona fa’atulaga latou pasese mo le Manu’atele e pei ona masani ai e amata ia Iulai 4, 2020.

“O se fa’amanatuga sili fo’i lea o le Posiulai i le Manu’atele ona ua tatala ai le feoa’iga o va’alele e mafai ai ona oo atu i laufanua ma aiga, ma toe o mai e fai talavai pe a mana’omia,” o se tala lea a si loomatua Manu’a. Na amata fa’atulaga pasese mo le Manu’atele i le aso 2 Iulai 2020.

Na taofia mai lava nei femalaga’iga i le va o Tafuna ma malae va’alele o le Manu’atele ia Mati 2020. Peita’i sa i ai lava malaga na fa’atautaia i le Manu’atele, na faia ia mafai ona fesoasoani i nisi o mea na alia’i mai e le ma’alofia. 

O ia malaga sa fa’atulaga ma fa’atonuina mai e le Ofisa o le Kovana sili ma e le mafai ona ai tagata lautele, ae ua fa’atulaga ia malaga ai tagata faigaluega a le Malo ae maise ia i latou o foma’i ma tagata faigaluega a le malo ae maise o fa’alavelave tupu fa’afuase’i. 

O Toe Loia, le pule o le Samoa Airways i Tafuna, sa ia fa’amaonia mai i le aso Faraile, ua ia mauaina le fa’atagaga mai le Malo o Amerika Samoa ina ia toe fa’aauau ai latou malaga i le Manu’atele, i malae va’alele i Ofu ma Fitiuta. Telefoni i le Samoa Airways mo se fesili.