FA’ATAGA LE VA’A E MALAGA I SAMOA MA UTA O FAGU EA

O se tasi o va’a o le ituaiga “Double Barrel” o se va’a o se tasi ua mae’a fa’atulaga ina ia avatua i Samoa se uta o tane kesi Nitrous Oxide e masani lava ona talosaga mai ai Samoa pea oo ina le lava le latou sapalai ina ia maua le okesene mo le togafitiga o gasegase i le falema’i tele i Motootua.

O lea ituaiga kasa e matele ina fa’aaogaina lea i fa’atautaiga o taotoga ma galuega fo’i a le au foma’i fainifo i taimi uma lava o latou galuega.

Ua fa’aalia fo’i e Kovana Lolo Moliga i le fonotaga o le aso Gafua na te’a nei, “E i ai lava mea e tatau ona fa’atino e ui ina o loo tatou a’afia i lenei fa’asa i feoa’iga i le va o tatou malo ma isi malo tulata pe mamao mai ia i tatou. Ma o nisi mea e le gata ai i le Komiti Fa’afoe o le Coronavirus ona faia se fa’aiuga, ae oo mai lava ia te a’u mo se tonu lelei e ao ina faia. O lea talosaa na fa’auia sa’o mai lava e le afioga le Palemia i se tasi o sui o le Komiti Fa’afoe, sa ia fa’auia mai i le fonotaga. E tatau ia i tatou ona fesoasoani ia Samoa i lenei talosaga mai, ae maise fo’i o le tulaga ootia o i ai i latou ona o gasegase e ao ina togafitia. E taua lava ona malumalu puipuia le soifua o tatou tagata uma lava.”

Ua fa’ailoa mai ua mae’a malaga lea va’a mo Samoa e auina atu le 6 tane o le Nitrous Oxide ma isi fo’i tane ea o le Okesene mo Samoa. O le Double Barrel o le va’a o le Pago Pago Marine Charters. E na’o le avatu lava o tane ea nei i Samoa ma toe fo’i mai lea va’a.

AGAVA’A TOTOGI LAFOGA I AMERIKA SAMOA TUPE MAI FETARALE

Ua fa’amonia e le taitai fono o le komiti fa’afoe o le Coronavirus a Amerika Samoa, le tofa Iulogologo Joseph Pereira, le agava’a ai o tagata totogi lafoga i le teritori mo tupe mai le fetarale i lalo le tulaono a le malo tele, le CARES Act.

O i latou agava’a e aofia ai sitiseni ma nationale o Amerika, fa’apea i latou e nofomau i Amerika Samoa. E $1,200 le siaki a le tagata e maua fuafua lava i le tupe maua i le tausaga i le lafoga faila o le 2018 ma le 2019.

Mo fanau iti e agava’a e maua ai le tupe fa’aopoopo e $500 mo le tamaititi e to’atasi.

Fa’ailoa e Iulogologo ua ma’ea tuuina atu i le US Treasury le lipoti a Amerika Samoa mo le fa’atulagaina o le tufatufaina o lea vaega mai le malo tele. Ma o lo’o fa’atalia o le aso Faraile nei e maua mai ai le tali mai le US Treasury.

O le tupe mai le US Treasury e tuuina sa’o i le faigamalo a Amerika Samoa ona latou faia lea o siaki mo i latou e agava’a ma tufatufaina. E aofia ai ma le vaega tupe mo fanauiti e agava’a.