Ads by Google Ads by Google

Tala I Vaifanua


Aso Tona’i, Aperila 11, sa fa’atasi atu ai le Faletua o le Sui Kovana Afioga Ella Gaea Perefoti Mauga fa’atasi ai ma i latou sa fesoasoani fo’i lenei fa’amoemoe i le laumua i Chaminade University i Honolulu ma UH Manoa e tau’a’aoina ina atu le fesoasoani (care packages) mo alo o le atunu’u o lo’o nofo a’oga i Chaminade University i Honolulu. [ata foa’i]

Pago Pago, AMERICAN SAMOA -

FESOASOANI MO FANAU AOGA CHAMINADE MA UH

 

Ua fa’ailoa le agaga fa’afetai O fanau a’oga mai le atunuu o loo alaala ma saili fa’ailoga maualuluga i le Iunivesite i Chaminade, Hawaii;

 

“O le aso Tona’i, Aperila 11, 2020, na fa’atasi mai ai Ella Gaea Perefoti Mauga, o le Faletua o le Afioga i le Sui Kovana o le Malo o Amerika Samoa, Afioga Lemanu Sialega Peleti Mauga ma ni isi o sui, e momoli aloa'ia mai le fesoasoani mo alo o le atunu'u o lo'o nofo a'oga i Chaminade University ma UH Manoa. O lenei fa'amoemoe sa faia e fesoasoani atu ai i alo o le atunu'u o lo'o a'oga i Hawaii a'o feagai ai ma taimi faigata i le fa'ama'i o le Coronavirus.”

 

Fa’aalia e Kiso Skelton, sa avea ma sui o i latou uma o lo’o i ai, “E fa’agaeetia le loto ma e oge upu e momoli ai le agaga o le fa’afetai ona o alofa’aga mo tama fanau a Amerika Samoa o lo’o nofo a’oga i Hawaii.”

 

E momoli atu ai le fa’afetai tele i le Faletua o le Kovana o Amerika Samoa Cynthia Malala Moliga ma le Faletua o le Sui Kovana o Amerika Samoa Ella Gaea Perefoti Mauga ona o alofa’aga ma le fesoasoani e ala lea i care packages mo fanau a’oga a le atunu’u i Hawaii a’o feagai ai ma le Coronavirus.”

 

Ona o lenei vaitau i le fa’asa o lo’o feagai ai ma atunuu uma, sa ia faailoa ai, “A’o feagai ai le lalolagi ma le fa’ama’i o le Coronavirus, o le tatalo, ia malutia ma saogalemu pea Amerika Samoa i ‘a’ao alofa o le Tapa’au Sili i le lagi. Ia fa'amanuia le Atua i o outou faiva alofilima aea le feagai ai ma le tautuaina o le atunu'u pele o Amerika Samoa.”

 

VA’ALELE TOGIPAU LDS -AVATU MISIONARE I AMERIKA

 

O le aso Gafua, sa taunu’u ai le va’alele a le Delta Air Lines, na totogipau e le Ekalesia a Iesu o le Au Pa’ia o Aso e Gata Ai [LDS] ina ia auina atu a latou misionare e 29 i le teritori e toe fo’i atu i Amerika.

 

Sa fa’atagaina e le kovana sili le malaga mai o lea va’alele togipau. O le va’alele 767 na latou tulaueleele ma toe malaga ese atu i le tasi le itula.

 

Ua fa’ailoa o malaga fa’apitoa a le Fiji Air mo Apia, Samoa sa fa’atautaia lea i le aso 6 Aperila, 2020 ma agai atu i Sydney Ausetalia ae na’o misionare lava a le LDS na auina atu i lea malaga. O le faitau aofai o ia misionare e 99 sitiseni Amerika ma le 27 sitiseni Ausetalia na malaga ai.

 

I le masina ua te’a nei, e tusa ma le 1,600 misionare uma a le Ekalesia ua toe fo’i atu nei i Slat Lake City, Utah mai Filipaina a’o le’i tapunia le toe femalaga’i i lea malo.

 

FOAI KALAPU ROTARY AIGA NA MU ATOA FALENOFO

 

Ua faia e le Kalapu a le Rotary o Amerika Samoa se meaalofa taua mo le aiga atoa i Mesepa na fa’atama’ia atoa le latou fale nofo i le afi i le lua vaiaso talu ai.

 

Na tuufatasia e le Rotary foa’i tupe ina ia mafai ona totogia ai se fale mautotogi mo le aiga lea e alaalata’i ai a’o taumafai ona toe fa’aleleia se nofoaga tumau mo i latou. Mai le tinoitupe ua mafai ona latou tuufaatasia ua mafai ai ona totogia le nonofo ai o lea aiga i le fale mautotogi.

 

O le sui totino o le Rotary Cherith Lober-Soliai sa ia fa’ailoa, “Ua talia nei e le Rotary so’o se ala ua e fia foa’i ai, tupe, meaafale o so’o se ituaiga, mea uma e fa’aaoga i le gaosiga o mea taumafa ma le umukuka, mea uma e faaaoga mo moega ma faleta’ele, lavalava mo le fanauiti, aua o lenei aiga e 7 le fanauiti e i lalo ane o le 12 tausaga le matutua.”

 

O le foa’i ua taua’aoina nei e totino e to’atele o le Rotary e matua matagofie tele ma ua fa’afetaia fo’i ma le agaga faia’e ona o lo ua mautinoa le agaga fo’ai ma le alofa o i latou i lea aiga puapuagatia fa’afuase’i.

 

Pe afai o le a i ai pea ni foa’i mo lea aiga, telefoni i le Rotary 262-4266 poo le feso’ota’i ane i le facebook a le Rotary Club.