MALIU ALIIVA’A JERUSALEM TUIPELEHAKE LUGA MV PAGO PAGO

O le ali’iva’a mai le Matagaluega o Uafu ma Malaeva’alele, Jerusalem Tuipelehake mai Amaua na maliu o ia i le vasa, a’o malaga le va’a MV Pago Pago i lana ulua’i malaga mai i Amerika Samoa mai Honolulu lea sa taula ai.

O Tuipelehake, 38 tausaga o le olaga, ua atoa le tolu tausaga talu ona avea ma aliiva’a o lea matagaluega i lona itu o feoa’iga i le va’afolau ma tautua i luga o le vasaloloa. Sa avea livi o ali’iva’a e to’aono mai le matagaluega e o i Hawaii e aumaia le MV Pago Pago sa fa’atauina e le Papali’itele Lauli’i Alofa o le Paramount Builder Inc. mai Honolulu.

O le toe taimi na fa’alogoina ai e Israel Tuipelehake, le uso matua o Jerusalem Tuipelehake i Amaua, o le aso Faraile Mati 6, 2020 a’o loma le tu’uva’a ese mai o le latou faigamalaga. “E leai lava se fa’alogoina o se mea o sui i le fa’alogo atu fo’i i le talanoa mai a le uso ia te a’u, Na ona fai mai lava poo a mai le fa’amuli, ua ia iloa ua latalata tu’uva’a ese mai i latou, ma ua fiafia lava o le a o mai.”

“Peita’i o le aso Toona’i loa fa’ato’a ou toe maua le isi ana fe’au na auina mai sootaga o le messenger ma ua fa’ailoa mai ai o i latou lea ua tu’ua le uafu i Honolulu, ma ua latalata fo’i la ona o’o mai aua o la ua latou o ese mai Hawaii.”

“E le’i toe maua mai lava la se isi tala, se’ia oo loa ona fa’ailoa mai ia te a’u e se tasi o aliiva’a, ua maliu o ia i le aso Lulu lava lea, Mati 11, 2020. Ua fa’ailoa mai ua fiu e fafagu Jerusalem mai lana moe ua oo i le taimi o lana sifi, ae ua le toe ala mai,” o se tala lea a Israel Tuipelehake, lona uso matua.

“A’o le’i avea Jerusalem ma tagata faigaluega a le Port Administration sa mua’i avea o ia ma tagata fagota a va’a fagota perseiners talu mai le 2007. O se galuega e fiafia lava i ai o ia e alu ai, ma sa aoga tele ai fo’i i le tausiga o nai o matou matua, lea ua maliliu uma,” o se tali lea a Israel i le fa’afesili pe mata e le aoga ia Jerusalem lea matata o le folau i va’a ua mafua ai fo’i ona maliu a’o folau mai lea faigamalaga.

I lo latou aiga i Amaua, ua mae’a saunia lona oliolisaga tumau e le Kamupani a le Paramount Builders e tapena ai mo ona toe taimi, ae o lo ua fa’agasolo nei le suesuega a ali’i foma’i i lona tino ina ia taumafai e maua se mafuaga tonu o lona tu’umalo fa’afuase’i a’o i ai i ona faiva faa-aliiva’a.

O Aperila 03, 2020 na fa’ato’a to’ai taunuu mai ai lenei malaga, ma ua fa’ailoa mai ua suesueina uma fo’i e le vaega o foma’i e sailia so’o se tasi e malaga mai i totonu o Amerika Samoa lea auva’a ina ne’i i ai se isi o a’afia mai i le coronavirus.

Na fesiligia Israel Tuipelehake pe i ai se gasegase ua togafitia ai Jerusalem i lenei vaitau o lona soifua ae fa’ailoa mai, e leai lava se gasegase ua tumau i lona uso pe o inuvai ai foi, pau o le mea e lapo’a atu lona tino ia e ia, ma e matua lelei lava le ta’agulu a le tagata pe a moe.

“Ou te lagona o le vaitau tonu lea ua maua ai Hawaii i le Coronavirus, ae ua ou iloa fo’i o lea ua mae’a faia ni suesuega ia te ia tau lea gasegase, ina ia mautinoa lea tulaga,” o sana tala lea.

O Jerusalem o le lona fa lea o alo e fa’asino ia Molimaufou Frost ma Aila Tuipelehake o Amaua, ma sa nonofo fa’atasi lava i la’ua ma lona uso matua o Israel Tuipelehake ma lona aiga i le latou fale i Amaua lava.

O le MV Pago Pago sa malaga i Manu’a i le aso Toona’i ma le uta o sapalai e mana’omia e le ASTCA ona fa’aaogaina i a latou galuega toe fa’aleleia o fesootaiga tau telefoni ma satelite i Ofu.

TO’A 5 MALILIU I HAWAII ONA O LE CORONAVIRUS

I se lipoti mai Honolulu e fa’apea, o le aso Toona’i ua te’a ua atoa i ai le to’afa o tagata i Hawaii ua maliliu i le Coronavirus. E ese mai lea ae ua faitauina fo’i le 32 o i latou ua fa’aopoopo i le faitau aofai o i latou ua fa’amauina ua maua i le Coronavirus i lea setete atoa lea ua maua mai le faitauga ua maua i le Coronavirus i le 351.

O le maliu lona fa o se tama matua e nofo i le itu i sasa’e o Oahu. O lea tama sa amata ona taofia i le falema’i ma maliu mai ai i le aso Toona’i.

O le aso Toona’i lava fou na fa’atonuina ai e le Kovana o Hawaii, David Ige, le 250 fitafita o le National Guard e tatau ona fesoasoani ile vasega o galuega e ta’imua mai e tau togafitia le lautele o le setete mai le Coronavirus.

“Ua pau lava le mea ua augani atu ai ia te outou uma le mamalu lautele o le atunuu, ia alofagia tatou galulue fa’atasi ina ia vave fa’afo’ia lenei fa’ama’i pipisi tele,” o se tala lea a Ige.

Ua mae’a fo’i ona fa’afeso’ota’i aiga o i latou ua maliliu ma ua aofia ai i le to’afa lenei o se tasi o foma’i lauiloa i le pasefika ona o lana tautua i le Peace Corp a’o talavou o ia. O ia lea o Dr. Art Whistler, lea sa faia’oga o ia i le Kolisi o Samoa i Apia, Samoa, ma ua iloga i lana auaunaga e suesueina fa’apitoa la’au e aoga i togafitiga o gasegase o tagata soifua.