Ads by Google Ads by Google

Tala I Vaifanua

TUPE TAGATA FAIGALUEGA LE GALUEGA ONA O LE COVID-19

 

Ua fa’ailoa e le faipule o Amerika Samoa i le Konekeresi Aumua Amata ulua’i tinoitupe mo Amerika Samoa e fesoasoani mo le fa’atinoga ua faia nei e tete’e atu i le Coronavirus.

 

“E $800,000+ le vaega tupe amata mo  Amerika Samoa ina ia fesoasoani atu ai i le totogia o tagata faigaluega uma lava ua te’ena mai latou galuega sa faigaluega fa’amaoni ai, ona o le a’afia o pisinisi ma le malo o Amerika Samoa i le fa’amamaluina o fa’asa ina ia le oo mai le Coronavirus,” o se tala lea a Amumua.

 

O le susuga Ben Carson, lea ua ia pulea nei le USHUD, lea ua faamatuu mai ai lea vaega tupe tele.

 

I le taimi na sainia ai le CARES Act i le aso Faraile talu ai e Pres. Trump ma ua avea ma tulafono, na amata loa ona fa’asoa e Carson vaega tupe atofa mo setete ma teritori a Amerika.

 

Fa’ailoa fo’i le agaga fa’afetai tele o Aumua ona o lea vaega tupetele mo le Amerika Samoa. Ua maua foi mai le HUD po’o le vaega o fale ma nofoaga e alaala ai i latou ua a’afia ma ua toina mai ai le tinoitupe e $532,457 mo lena fa’amoemoe. O le vaega tupe lona lua ua aumai le CBDG e $269,228 mai le Emergency Shelter Program.

 

Ua i ai nisi fa’atupega o lo ua aga’i mai lava ina ia mafai e Amerika Samoa ona maua fesoasoani e tali atu i e Coronavirus.

 

TE’ENA VA’A FAGOTA TAIWAN FIA TAULA I AMERIKA SAMOA

 

O le va’a fagota na talosaga mai e fia ulufale mai i Amerika Samoa ona o lo’o i ai se tasi o le latou auva’a o lo’o ua tigaina i ni ona manuaga ua te’ena lea talosaga e Kovana Lolo Matalasi Moliga.

 

O le aoauli o le aso Gafua na fa’auia ane ai lea fa’aiuga a le Kovana i le ali’i faipisinisi Herman Thomsen.

 

E uia ina teena le talosga a le va’a, ae o lo’o fuafua le Matagaluega a le Soifua Maloloia e auina atu sa latou fesoasoani, ae fuafua lava i se ala o feaoaiga.

 

4 SUESUEGA O LE CORONAVIRUS FIA AUINA ATU I FAFO

 

Ua atoa le fa o suesuega o lo ua tatalia le auina atu i fafo mo le fa’amaoniga e le o maua i latou pe o maua fo’i i latou i le Coronavirus, o se lipoti mulimuli lea a le ali’i foma’i o Fa’amai Pipisi, Dr. Aifili John Tufa. Ua fa’ailoa mai fo’i e auina atu nei suesuega i le nofoaga o suesuega fa’apitoa ua mae’a fa’atulaga i Hawaii mo nei fa’amaoniga.

 

O le to’atolu o i latou na faia ai nei suesuega ona ua masalomia lava e le vasega o foma’i o le tatou malo, ona sa malaga mai i latou i atunuu ma setete ua mae’a i ai le coronavirus. A’o le isi fo’i ona ua feso’ota’i o ia ma nisi o loo masalomia, lea ua mafua ai ona avea i fafo le latou suesuega.

 

O isi uma faamaumauga i nei sui ua avea latou suesuega i fafo, ua taofia lea ua le fa’alauiloaina, ina ia le mafai ona silafia e le mamalu lautele i latou nei. O se aia tatau a i latou ia taofia ai le fa’alauiloa o tulaga o i ai le latou soifua maloloina.

 

Fa’ailoa e Dr. Tufa, “Ona ua va’aia ai nisi o auga e iloga ai ua a’afia le sui i le Coronavirus, o le isi lea ala ua mafua ai ona faia e i latou suega nei ma auina atu loa i Hawaii mo le fa’amaoniga.”

 

Ona o lo ua taofia nei faigamalaga a le Hawaiian Air, ae ua fa’ailoa mai ua na’o le Va’alele Cargo lava lea e mafai ona talia le tulaueleele i le atunuu, o lona uiga ua pau lea o le ala ua mafai ai ona auina atu i fafo tatou nei suesuega ma ia vave fo’i ona toe maua mai le tali e ala i feso’ota’iga tau initeneti ma emeli feavea’i.

 

Ua toe fautuaina mai lava le mamalu lautele, “E mafai e lenei fa’amai ona pesia le tasi mai le tasi i le nao le pa’i atu i lona ofu, ma e umi foi se taimi o mau lea siama ia te oe, ma e a’afia atu ai nisi uma o le a e papa’i atu i ai.”

 

“Pe afai ua e mautinoa ua amata ona e fa’alogoina auga o lenei ma’i, ia e alofagia oo mai e faia le suega lea ia te oe, ona e nofo va’ava’aia lea mo le 14 aso ae se’i ave fo’i au suega i fafo e va’aia toto’a ai ma faamaonia mai lou maua i le coronavirus pe leai.”

 

“Pe afai fo’i e feso’ota’i oe ma fomai, ae va’aia e i latou e le o malu puipuia oe ma lou aiga i lou nofo pea i lou aiga e tatalia ai le fa’aiuga o au suesuega, e mafai lava ona e nofo fo’i i nofoaga nei ua saunia lelei e alaala ai ae fa’atautaia suesuega uma,” o le  fautuaga a Dr. Tufa i le atunu’u.

 

FAIGALUEGA MO LE 20 ITULA - TOTOGI PEA 40 ITULA - ASG

 

Ua aga’i atu nei le Malo ina latou fa’amamaluina fo’i le isi la’asaga o le fa’asa mo le taua e tete’e atu i le Coronavirus. O tagata faigaluega uma o le a faigaluega na’o le 20 itula i le vaiaso, ae o le a totogia lava i latou i o latou itula e 40 i le vaiaso e tasi e pei ona masani ai.

 

Ua mae’a nei la le faiga sa i ai muamua, ua na’o le afa o le aufaigaluega e faia tiute, ua toe me’i nei lea suiga i le lanu samasama, ae toe me’i mai le fa’atulagaga sa i le Lanu moana i le mea sa i ai, faigaluega tagata faigaluega a le malo i le nao le 20 itula i le vaiaso ae totogia pea i le 40 itula e pei ona i ai.

 

O le faiga fou lenei ua fa’amanino atili lea i le tusi faalauiloa a le Kovana i ana Matagaluega ma Ofisa uma o le Malo ma sa fa’aoo atu uma i ona matagaluega ta’itasi i le aso Gafua.

 

Ua tuuina atu fo’i i fa’auluuluga o matagaluega ta’itasi o le Malo ina ia latou fa’atinoa le fa’atulaga o latou aufaigaluega ina ia le taofia ai le fa’atinoga o galuega ma tiute fai o tautua o latou ofoina i tagata lautele ona o lenei suiga i taimi faigaluega o tagata faigaluega uma.

 

O nisi o tagata faigaluega e faigaluega i le aso Gafua ma le aso Lulu, ae o nisi e faigaluega i le aso Lua ma le aso Tofi. O le a tofia lava e le Fa’atonu nisi e tatau lava ona faigluega i le aso Faraile ona mae’a ai lea o le galuega fa’atino a matagaluega ta’itasi i le vaiaso.

 

O Tautua uma fo’i e ao ina fa’ataunuuina ia le poloka ai i le suiga lenei, ma o le faiva lea o le a mautinoa ai le agava’a fo’i o fa’atonu ta’itasi i o latou tofi o tutula’i ai e fa’atino i lana matagaluega.

 

O i latou uma lava o lo’o aofia i le vasega o e taimua mai i le tautuaina o le puipuiga o le atunuu, e faigaluega i latou 24/7 e leai ni o latou aso malolo.

 

O le faiga foi lenei ua fa’atinoa lea i setete ma teritori uma o Amerika ua mae’a i ai le Coronavirus, ma ua tatau fo’i ona tatou amata fa’amasani i ai a’o le’i po’ia i tatou i le coronavirus.