Ads by Google Ads by Google

Tala I Vaifanua


Lolo Matalasi Moliga, Kovana A.S. [ata: SN]

VA’AIA TOTO’A TAGATA FAIGALUEGA A LE MALO O FAIGALUEGA I TUA I AIGA

 

O tagata faigaluega a le Malo ua 60 tausaga e aga’i i luga le matutua ua fa’atonuina i latou ina ia faigaluega mai le fale i latou uma, peita’i o lo ua mae’a fo’i ona fa’ailoa ia i latou nei, ia fa’amaoni i taimi faigaluega, aua o loo nofo va’ava’ia fo’i i latou i lena taimi pe o fa’amaoni e faia o latou tiute.

 

Ua fa’ailoa e Kovana Lolo Moliga i lana kapeneta atoa i le fonotaga o le aso Gafua, sa ia fa’atonuina ai le matagaluega o le Puipuiga o le Saogalemu Lautele, Puipuiga o le Saogalemu Fa’alotoifale ma le Matagaluega o Tagata Faigaluega a le Malo, ina ia nafa i latou ma le va’aiga toto’a o i latou o lo’o nonofo ma faigaluega mai aiga.

 

Ua ia toe fa’amanatu atili atu ia i latou ua tofia, ia mautinoa lava o lo’o usita’ia e le vasega lea o le aufaigaluega a le malo, le nonofo mai i aiga ma faigaluega mai ai. O lea taumafaiga, ia fa’aitiitia atili i latou e auai mai i le Ofisa i aso ta’itasi e faigaluega.

 

Fa’ailoa e le kovana “E pau lava mea e tatau ona toe malaga ese atu ai i latou nei mai o latou aiga, o le alu i le falema’i pe alu fo’i e fa’atau, ae ua tatau la ona nonofo lelei i aiga ma fai a latou galuega e pei ona mana’omia ai.” Ua fa’atonuina toto’a nei la matagaluega nei e tolu o le Malo, ina ia latou va’aia toto’a sui nei, o lo’o mana’omia ona nonofo mau i le malu o latou aiga ma faia mai ai o latou tiute, ma ia le so’ona feoa’i fua ina ne’i mama’i mai ai.

 

“E tatau ona fa’amau mai o latou taimi faigaluega, ma o le a totogia lava le fa vaiaso ua fa’atulaga e fa’atino ai lenei fa’asa, e ta’i 40 itula fo’i i le vaiaso e tasi, e pei ona masani ai.”

 

TALOSAGA KOVANA LE CDC MASINI SUESUE O LE CORONAVIRUS

 

Ua fa’ailoa atu se taofi o le tatou Kovana i le vaega a le CDC, “O Amerika Samoa o se atunuu e vavalalata nofoaga o ona tagata fa’apea foi ma latou agaifanua e feso’ota’i lava o latou tagata i taimi uma. Afai ae ulufale mai le Coronavirus ma a’afia ai le soifua o nisi, e vave tele le pepesi o lea faama’i, e mautinoa e le taitai gafatia e matou falema’i o i ai nei, ona taofia uma nisi ua a’afia ma e ao ina taofia mo togafitiga.”

 

O le mafuaga lea ua ia avatu ai ma lona mana’oga tupito, ia faao’o mai le masini e suesuea ai tagata uma pe o maua i le Coronavirus pe leai. O lana tusi ua tusia sa’o ia Dr Robert Redfield o le Fa’atonu o le CDC. Afai ae maua mai lena masini, o le a fa’afaigofie le fa’atinoga o suesuega o tagata uma e ulufale mai, fa’apea ma le mamalu lautele o le atunuu pe a oo ina a’afia mai se tasi i lenei fa’amai pipisi.

 

O le popolega lava o le ta’ita’i o le tatou Malo, o lo’o i ai nisi o lo’o maua i lenei ma’i i totonu lava o le atunuu, ae peita’i ona e le’o i ai ala e suesuea lelei ai, ua le mafai ai ona maua a’ia’i i latou ua a’afia ma e tatau ona togafitia loa.

 

Ua fa’ailoa atu e ia i le fa’atonu o le CDC e lua fo’i suega ua mae’a meli atu i fafo mo le faamaoniga, ma o loo tatalia pea nei fa’aiuga mai na suesuega. Ua le gata i lea, ae ua ia fa’ailoa atu fo’i, ua na’o le tasi lava le malaga a le Hawaiian  Air lea e fa’ataga e sau i Amerika Samoa i le taimi nei, ma o le a fa’atuai atili ai fo’i ma le toe fo’i mai o faaiuga o nei suega, ae maise fo’i o le auina atu o nei suesuega e faia iinei e avatu mo le fa’amaoniga mai i latou ofisa autu.