Ads by Google Ads by Google

Tala I Vaifanua

TAUMAFAI ASOSI PISINISI SAILIA LAFIAGA MO PISINISI VAITAU COVID-19

 

Ua fono le Asosi a Pisinisi i le teritori ma ua latou taumafai e fia maua se alofaga mai le fa’afitauli ua feagai mai ma i latou, ua lusi le tele o latou fefa’ataua’iga ma ua latou fa’aalia fo’i po’o a’afia i latou ma latou pisinisi i lenei vaitau o le fa’ama’i pepesi o le Covid-19.

 

“O lenei faiga ua oo i ai le fa’atautaiga o pisinisi ina ia usita’ia le tamau ua le gafatia ai e pisinisi ona totogi latou aufaigaluega ma toe totogi ma latou pili o fefa’ataua’iga, o se mea e le tatau ona tupu pe afai e fa’amoemoe mai le tausiga o le atunuu i pisinisi o tautuaina i latou i aso ta’itasi,” o se tasi lea o vaega ole tusi ua taua’oina e le Taitaifono o le Asosi a le Aufaipisinisi.

 

“E ui foi ona o lenei fa’amalosiga o aiaiga o le tamau mo le tete’e atu i le Covid-19 ua na’o sina vaitau e fa’atino ai, ae o le a’afiaga e sili atu ona umi mo le tamaoaiga tausi o pisinisi.”

 

O le vaifofo fo’i lea ua fa’ailoa mai, ua mafai ona fa’amamaina mai lafoga totogi i pisinisi, mafai ona fa’aititia tupe fa’asili e totogia mo nogatupe i faletupe a pisinisi ma nisi fo’i o ala e mafai ona fesoasoani fa’aletupe mai ai le malo i aiga o e ua le toe faigaluega ona o lenei a’afiaga o pisinisi i le vaitau ole fa’amai pepesi. O fuafuaga lea ua feoasoani mai ai le tatou Malo ma le Malo tele.

 

FOA’I P.I.D MO LE MASAGA TAMAITAI 4

 

Ua tutu fa’atasi le Pacific International Distributors (PID) ma lana Kamupani fa’apa’aga e ala i fefa’ataua’iga, le Kimberly-Clark mai Ausetalia, ina ia latou foa’i ma le agaga fesoasoani ma le alofa i le aiga o Filomena ma Sokimi Jr Sokimi o Iliili ma Fagaima.

 

O i la’ua lea na soifua mai ai le masaga fa o tamaita’i uma i latou ma le aulelei. Na soifua mai fo’i i latou nei i le aso 7 o Ianuari, 2020 ma ua misia ai i te’i latou meaalofa e masani ona taua’oina atu mo pepe e soifua mai i le tausaga fou ma le Kerisimasi  ta’itasi e tapena fo’i e le PID ma ana pa’aga.

 

Peita’i, ona o lea fo’i se fa’amauga i le tala fa’asolopito o Amerika Samoa ua fa’ato’a maua ai se masaga fa ua soifua mai i Amerika Samoa, ua matua fa’afiafiaina ai i latou e faia lenei foa’i.

 

I le atoaga o le lua masina o pepe tama’ita’i e to’afa ua manatu ai le PID ma le Kimberly-Clark Ausetalia o le a taua’aoina sa’o le foa’i o pusa diapers ma solofafano mo pepe ia i latou i lo latou fale, ma o le a sapalaia lava nei oloa mo pepe mo le tausaga atoa o i latou.

 

O se foa’i ua talia ma le fiafia tele e le Aiga o Sokimi ma ua faailoa mai se lagona o le tina o Filomena, “Fa’afetai tele i le agalelei, ma ua fa’aalia fo’i le alofa o le Atua e ala i lenei Kamupani ma ana pa’aga, fa’afetai le alofa ua aoga lenei fo’i tele mo i matou ma si a ma fanau.”

 

TAPUNIA ASIASIGA I LAUFANUA FA’ASAO

 

Ona o le fa’asa ua fa’amamaluina nei, ua fa’ailoa mai e le Pulega o le Laufanua Fa’asao a Amerika Samoa, o le a taofia uma ni asiasiga e fia maimoa i le Laufanua Fa’asao ma o le a tolopoina fo’i asiasiga a A’oga sa fa’atulaga.

 

O nei mea uma ua fa’atulaga mai ina ia le feso’ota’i tele tagata ma le fanau a’oga ae maise fo’i o le a to’atele na’ua ai nisi e fa’apotopoto ma malaga fa’atasi, ina ia le pipisi le fa’ama’i o le Covid-19. Mai ia Mati 17, 2020 o le a tapunia fo’i le nofoaga autu o le National Park i Pago Pago se’ia toe fa’ailoa atu i le mamalu lautele.

 

Pe afai e fia faaaogaina lava le Paka mo savaliga ta’ito’atasi ma isi mea fa’apena, ua mafai lava ona fa’aaoga ai, ae ia usita’ia e le fa’aaogaina e le to’atele i le taimi e tasi, poo ni fa’atasiga e sili atu i le 10 tagata.

 

Fa’ailoa fo’i e le pulega a le Laufanua Fa’asao o Amerika Samoa, “E auai fo’i le National Park Service ina ia latou fa’amamaluina mea uma e fa’amautinoa ai le saogalemu o le atunuu ma ona tagata lautele. E le gata i lea ae ua auau fa’atasi nei fo’i le National Park Service ma le Iunaite Setete ma le tatou fo’i malo ina ia mafai ona tete’e malosi atu i le pesia o le toatele i le Coronavirus.”