GALULUE FA’ATASI TAUSIA SAOGALEMU AIAI MAI LE COVID-19

Ua fa’atulagae e le malo se fa’ata’ita’iga e aofia fa’atasi i ai le Matagaluega o le Soifua Maloloina, le falema’i LBJ Medical Center, le VA Clinic, le US Army Reserve ma isi matagaluega Malo, ina ia mautu a’ia’i le galuega fai pe a o’o ina maua se tasi ua mautinoa ua maua i le Coronavirus i le atunuu.

O lenei fa’amoemoe o le a fa’atautaia lea i le Tafuna Helath Center ma e aofia ai uma i latou ua tofia fa’apitoa ina ia galulue fa’atasi, ia leai se sasi i le taimi e to’ai taunuu ai le Coronavirus i o tatou laufanua.

Ua tuuina atu le fa’amoemoe i matagaluega ua lisia, ina ia latou tofia mai nisi ua agava’a mo le fa’amoemoe e avea ma ta’imua mai o latou matagaluega mo le galuega tele e ao ina fa’ataunuu e leai se sasi, mai lenei fuafuaga fa’ataoto o le a fa’atinoa fa’ata’ita’i mo le ulua’i taimi.

O le a fa’ataitai ai le aumaiga o lea tagata mai le malae va’alele i le Nofoaga i Leone mo suesuega atili ma togafitiga. O le taumafaiga fo’i ina ia le a’afia i latou o le a fa’atautaia nei galuega fa’apea ma le mamalu lautele e ono a’afia mai i lenei lava gasegase.

“O le fa’ata’ita’iga ia mafai ona oso tatau, ma nofouta le mamalu o e faigaluega uma i le tautuaina o lea gasegase, ia le sasi lava se mea ma a’afia ai se isi ao latou aumaia lea sui mai le malaeva’alele i Leone, ma tausia ai fo’i iina, ma toe avatu i se isi nofoaga e mauto’atasi ai, ia mautinoa ua malamalama lelei fo’i i latou o le a tausia o ia, i mea e ao ina faia e i latou i taimi uma o le a ma’i ai lea sui,” o le tala lea a le fa’atonu o le Soifua Maloloina Motusa Tuileama Nua. O le vaiaso lenei e faia ai lea fa’ataitaiga ma ua mae’a pasia mai fo’i e Kovana Lolo Moliga.

SUIGA FA’APOTOPOTOGA EKALESIA KATOLIKO ONA O LE COVID-19

Ua fa’ailoa e Bishop Peter Brown o le Ekalesia Katoliko, Pule’aga a Samoa Pago Pago ni suiga ua aga atu i ai le Pulega a le latou ekalesia e fa’amamaluina pe afai o le a ulufale mai le Coronavirus i le atunuu.

Ona o lenei fa’ama’i ua le gata ai ia Amerika Samoa le nonofo atugalu i ai, ae ua fa’asolo atoa i le lalolagi atoa.

“E tatau ona nofo sauni ma tapena i nei taimi faigata, e le’i oo muamua mai ni fa’ama’i pepesi fa’apea i le atunuu ma e le’i i ai fo’i se fuafuaga o le a tatou lutia i ni fa’afitauli fa’aolioli mai fa’apea, ae ia nofo sauni i tatou uma i ai,” o se saunoaga lea a Bishop Brown. 

O le suiga a amata mai ia Mati 22, i le taimi o le misisa:

• O le tufaina le areto i a’ao o tagata, e le toe tuu sa’o i le fofoga.

• O le uaina lea inumia fa’atasi i le ipu e tasi, o le a le toe faia.

• O paipa uma ua tuuina i ai le vaisa, o le a le toe i ai lea, aveesea mai malumalu.

• O le a le fa’atalofa pe fusi mai e se tasi le isi i taimi o fa’afeiloa’iga, ae o le a na’o na ifo.

• E tatau ona fafano uma lima o e fa’afoe le fa’amanatuga, i latou e tufatufaina atu le areto.

• I latou uma e ta’ita’ia sauniga e oo i tagata lolotu, afai lava ua fa’alogoina se fa’aletonu tau le soifua maloloina, ua fa’atonuina ina ia nonofo i aiga ma ia tausia lelei lou soifua maloloina ia e malosi fa’ato’a sau ai i le lotu.

Ia tatalo e loto fa’atasi ai i nei sauniga fai i le Atua.

Ua le gata i lea a e ua fautuaina tagata uma, ia to’aga e fufulu lima i fasimoli ma le vai, ia mautinoa ua fa’amamaina mea uma i totonu o le lotoifale o le tou aiga. Ua fautuaina tagata uma ina ia galulue fa’atasi e mafai ai ona mautinoa ua fa’aitiitia pe leai lava fo’i se isi o le tatou atunuu e maumau se soifua i lenei fa’ama’i pipisi.

ATUGALU NISI SUIGA GATAIFALE O UTULEI MA FAGA’ALU

 O le sosooga o le fale’aiga a le DDW i Utulei lea ua va’aia ua amata ma ua toetoe foi ina mae’a lelei, na fesiligia ai nisi na vala’auina e le Maota o Sui i nei fuafuaga.

O le ali’i Faipule Vailoata Amituana’i sa ia fesiligia le tamaita’i fa’atonu o galuega lautele, Faleosina Voigt e tusa o lea galuega ua va’aia ua fa’asima fa’atasi ai ma le apitagalu o Utulei, ae o le paka lea sa le mafai ona fa’atuina ai le fale’aiga o le McDonalds ona o lea tamau.

Sa tali le fa’atonu o le Matagaluega o Fefa’atauaiga, Keniseli Lafaele, “O le naunauta’iga lea o lo’o ua manatu Kovana Lolo Moliga e fa’ataunuu. E le gata i lea galuega, ae o le fa’amoemoe e ave uma faleva’a o afio’aga ta’itasi o lo’o i le apitagalu o Faga’alu ma Utulei, e fa’atutu lea i le avanoa o lo’o ua i ai nei i Pago Pago.”

“Ua mae’a usita’ia e le afio’aga o Vailoatai le mana’oga lea, ae o le faleva’a o le Manulele Tausala o Nuuuli, o lo ua fai lava si faafaigata, ona o lo’o finau malosi mai fo’i i latou i le latou aia mo lea nofoaga, ma ua tutula’i ai pea lea faleva’a i Utulei i le taimi nei.”

Ua soso’o ma le faleva’a o Vailoatai e ave’esea mai Faga’alu, o le faleva’a lea o le Manu’atele, ma ua fa’ailoa mai fo’i ua mae’a taua’aoina tinoitupe i nei afio’aga e toe fa’atula’ia ai latou faleva’a i Pago Pago.

E ui la e le o mafai ona ave’esea mai le faleva’a o Nuuuli mai le nofoaga o i ai nei i Utulei, ae fa’ailoa e Lafaele, “O le mea mautinoa, e toe talanoaina lava lea tulaga ma le saofaiga a lea afio’aga i se taimi o i luma.”

E ese mai galuega nei i Utulei ma Faga’alu, ua fa’atulaga ai fo’i e uma ma le galuega i Fagatogo lea ua fa’aigoaina o le “Sogelau Monument” lea e fa’akonekarate ai le Paramount Builders i le nofoaga sa i ai le Faletinei Afi a le tatou Matagaluega o le Puipuiga o le Saogalemu Lautele.

Ua fausia nei falesamoa i lea nofoaga e fa’amautu ane i ai le tautuaina o Turisi e gasolo mai i le atunuu ae maise i taimi o Meli Tetele lea e malaga mai ai le faitau afe o turisi i le taimi e tasi.

O poloketi uma nei o galuega ua fa’atula’ia e tusa o le mana’oga fa’apitoa o le Kovana ina ia fa’aleleia le va’aiga lautele o le taulaga ma nofoaga faitele e tautuaina ai e malaga maimoa mai fafo.

TOLOPO FA’AALIGA TU MA AGANUU PASEFIKA I LE 2021

O le Fa’aaliga o Tu ma Aganuu a le Pasefika lea sa tuu e talimalo ai le Setete o Hawaii i le tausaga lenei, ua o le a tolopoina i le tausaga fou, 2021.

Ua mafua lenei tulaga le ma’alofia, ona o lea ua lutia Hawaii i le Coronavirus, ae maise ua taofia mai le fa’atasitasi o ni tagata se to’atele i se nofoaga e tasi i lenei vaitau, ia tau fa’aitiitia ai le a’afiaga o nisi i le fa’ama’i pepesi o le Coronavirus.

O le fa’amoemoe le sa tuu e fa’ataunuuina i le masina o Iuni 2020 ma sa latou fa’atulagaina ai le latou nofoaga o le PICC e fa’atino ai lea fa’amoemoe atoa. O lea la ua mae’a tali mai le Komiti ua talia le fanoga o Hawaii ina

ia tolopoina mo le isi tausaga o soso’o mai e fa’atino ai.