NOFO PUIPUIA LE KOVANA MAOTA O LE MALO I MAUGAOALII

Ua le o alofia le fa’amamafaina o tulafono o feoa’iga i lenei vaitau o le taumafaiga e tete’e malosi atu i le ulufale mai o le Coronavirus mai le taofia fo’i o le Kovana Sili ma le faletua, ina ia fa’aauau ona nofo puipuia i la’ua i le maota o le kovana i Maugaoali’i, e faia ai suesuega po’o maua i la’ua i le coronavirus, mo le fitu aso.

I se lipoti a le Radio New Zealand Pacific, sa fa’amaonia ai e le Kovana i le vaega fa’asalalau o le 93KHJ o lo’o ua nofo puipuia i la’ua ma le faletua i le Maota o le Kovana i Maugaoali’i ma e na’o le to’alua lava sui ua fa’ataga ona la’ua feso’ota’i i lea taimi umi, o lana leoleo ma le ali’i ave ta’avale, lea na aumaia o ia i le fale mai le malaeva’alele.

Ina ua taliu mai i la’ua i le atunuu ma le faletua, sa siakia leleia i la’ua a’o le’i oo ane i le Potu VIP o le malae va’alele. Na siakia i la’ua ma fa’ailoa atoa ai setete sa i ai i la’ua mo le masina ua tuana’i ma ua fa’ailoa ai, sa i ai i la’ua i aso me 4 i Seattle Washington mo ana talavai i le falema’i o le Sweedish Hospital. O iina na siakia lelei ai o ia po’o a’afia i le Coronavirus, ma e tele taimi o le aso e tasi e siakia ai i la’ua, ma ua maua ane le fa’ai’uga, e leai o lo’o kilia lava o ia, fa’apea fo’i le faletua.

“O lea lava ua usitaia aiaiga uma o lo’o fa’amalosi mo le puipuiga o le tatou atunuu mai le Coronavirus,” o se tala lea a le kovana.

Mo ona tiute uma na fa’atulaga i lona fa’ato’ai mai i le atunuu, ua mae’a taua’aoina le faila o le Fuafuaga Fa’ataoto a le Komiti Fa’afoe o le Coronavirus ia te ia e fa’aaogaina ai le so’otaga ma lana leoleo fa’apitoa, ma ua feso’ota’i fo’i ma lana aufaigaluega mamalu e ala i Video Teleconferencing, e talanoa ai ma feso’ota’i ona o tiute e le tatau ona tuu umia e le fa’ataunuu.

O lea fo’i le ala sa ia feso’ota’i ai ma le Komiti Fa’afoe fa’apitoa mo le Coronavirus ma ua pasia ma sainia ai e ia le fuafuaga fa’ataoto ua mae’a tapena e fa’aoo i le CDC e fa’atautaia ai taumafaiga uma lava mo lea fa’ama’i pepesi ia le ulufale mai ma fa’atamaia ai le soifua lautele o le atunuu.

E le gata i le kopi lea ua fa’ao’o i le CDC ae ua fa’apea fo’i ona fa’aoo i le DOI ma le matagaluega o le Soifua Maloloina ma le ofisa o le tatou sui i le Konekeresi Aumua Amata Radewagen.

TALI KOVANA LOLO MOLIGA - FA’AFESILI A LE FCC:

Ua maea fa’ao’o atu se tali a Kovana Lolo Moliga i le fa’afesili a le Federal Communications Commission, le ali’i o Mike O’Reilly, e tusa ai o pili e totogia e le malo ma tagata lautele i lo latou fa’aaogaina o le laina a le 911, lea sa tatau ona fa’auia i le tausaga ua te’a, ae le’i faia lava e le Malo o Amerika Samoa.

O lea lipoti e ao ina fa’auia mo le silafaga a le Konekeresi.

I lana tusi ia Feb. 13, 2020, na fa’ailoa ai e le Kovana ia O’Reilly “O le tulaga o lo’o fa’aaogaina ai lava le 911 i le tautuaina o le Malo o Amerika Samoa ma ona tagata, e le’i suia lava mai le amataga. E le o aoina e Amerika Samoa ni totogi mai tagata lautele i le fa’aaogaina o le laina 911. O lo’o fa’atupea a’ia’i nei laina o feso’ota’iga fa’afuase’i e le Matagaluega o le Puipuiga o le Saogalemu Lautele o le Malo o Amerika Samoa. O lea fa’atupega o lo’o fa’auia mai lava i tupe ua teuina mo galuega lautele a le malo, ma ua fa’amatuu atu i le Matagaluega o le Puipuiga o le Saogalemu e fa’atupe ai lea tautua. O lona uiga e leai ni tupe e mafai ona toe fa’auia atu i le FCC.”

E tusa ai ma le lipoti na taua’aoina atu mai ia Ianuari mo telefoni uma na faia ia Ianuari 1, 2018 seia oo ia Tesema 31, 2018 ua fa’ailoa ai le aotelega e 24,618 mo laina uma na fa’aaoga ai le 911, ae o isi e 31,656 sa faia mai telefoni fe’aveai.

Ua fa’ailoa fo’i e Lewis Wolman le CEO o le ASTCA, i le Maota o Sui “O laina 911ua tuuina atu lea e fa’agaoioia e le DPS. O vala’au uma fo’i e fa’aaogaina ai le 911, ua leai se totogi mai le amataga lava o lea tautua, ina ia mafai ona vala’au ai so’o se tasi i so’o se ala o feso’ota’iga, poo laina telefoni masani i fale po’o laina fo’i i telefoni fe’avea’i. Ua totogia lava e le DPS na’o laina masani e pei ona totogia laina o telefoni a aiga ta’itasi i pili fa’alemasina.”

Ua fa’aalia e Wolman, “O le tamau lea e i ai ua tatau ona fa’amae’a e le ASTCA le FirstNet Network a’o le’i oo mai le aso 31 o Mati 2020, o le a maua lava lea taimi.”

O lea so’otaga tau fesoota’iga, e ao ina soota’atasia ai laina uma o feso’ota’iga i le va o le DPS, Tinei Afi ma le EMS, o i latou e ta’imua atu i soo se fesoasoani mo’omia i fa’alavelave fa’afuase’i.

Taua e Wolman “E maua e i matou lea taimi atofa, ae ua fai si taugata o nei laina o feso’ota’iga soofa’atasi i masini ma mea uma e fa’atula’ia ai le FirtNet Network, aua e faitau miliona na fa’aalu ai, aua e aofia ai ma polokalam fa’apitoa e fa’agaoioia ai, peita’i ae toe fa’aola mai uma lea paketi na fa’aalu e le AT&T.”

AFA O LE PASESE HAWAIIAN AIR  NOFO PUIPUIA I AIGA

E to’a 187 le pasese atoa a le va’alele Hawaiian Air ua mae’a taofia i latou uma i latou aiga, ae na’o le to’alua e taofia i latou mo suesuega auiliili i le falema’i i Leone.

O i latou nei sa malaga mai i le po o le aso Tofi ua te’a i le Hawaiian Air, lea fo’i sa malaga mai ai ma Kovana Lolo Matalasi Moliga ma lona faletua.

O le pasese atoa na ulufale mai na taua’aoina i ai le tusi o lo’o ua i ai fa’amaumauga uma tau lenei fa’ama’i pepesi, ma ua fa’ailoa fo’i ia i latou, “Ona ua malaga mai i latou mai le setete o lo’o ua mae’a i ai le Coronavirus, o lea e ao ai ona nofo va’ava’aia i latou mo lea fa’ama’i pepesi ma le faigata aua e le’i i ai sona vaifofo i le taimi nei.

O lo ua fa’ailoa mai, “E ui lava ina taumafai atu le tulafono ia fa’amalosia, ae le mafai lava se mea lelei ona fa’atino pe afai e matua una’ia mai le fa’asagatau a le mamalu o e maualuluga o le tatou malo e taumafai ona soloia nei aiaiga lelei uma ua taumafai atu i ai, ia le ulufale mai le Coronavirus. Ua tatala fo’i i tua i aiga le vasega o i latou uma na malaga mai mo le saofai i le aso Faraile, ae o loo malaga mai fo’i Seattle nisi.”

“Ua fa’afetaia lava le mamalu lautele o le atunuu, a fai atu lava e talia gofie e i latou le fautuaga ma le taumafaiga o faia nei, ae le o se mea na matou pasia ma aiaia, ae aua fo’i le toe tau solomua i e na latou tuuina mai lenei galuega ia fa’atino, ona tete’e mai i le taumafaiga.” O se isi lea fanoga sa fa’afofogaina mai sui o lo’o leoina lea fa’amoemoe maualuga i le Malae Va’alele fa’avaomalo i Tafuna.