TASI ISI AIGA FA’AMAU FALE FA’ALEAGAINA MATAGI MALOLOSI

Ua i ai nisi o aiga ua fa’ato’ai atu a latou talosaga mo se fesoasoani i le EOC lea na fa’atula’ia e fa’aulu i ai mafatiaga ma ni fa’aletonu fa’amaumau i lotoifale o aiga afaina o latou fale i matagi malolosi i le lua vaiaso talu ai.

I se lipoti a le malo ua fa’ailoa ai e to’atasi se isi aiga ua fa’ato’a fa’ato’ai atu a latou meatotino ua fa’aleagaina,  ae maise ai o le latou falenofo ua fa’aleagaina e Matagi Malolosi. Ua iloga e matua tetele afaina o le falenofo o lea aiga, ae le’i asia muamua fo’i i latou e le aufaigaluega a le tatou malo na asiasi atu i aiga na fa’amautu i nofoaga fa’apitoa, ina ia fa’amauina a latou mea ua fa’aleagaina.

Ua fa’ailoa e le ali’i fa’atonu o le Homeland Security, o le a latou auina atu i ai se vaega suesue a le latou matagaluega mo fa’amaumauga o mea ua fa’aleagaina.

O se tau aofai ua tuu fa’atasia i mea uma ua fa’aleagaina e matagi malolosi timuga tetele ma lologa e afua mai ai, fa’atasi ai ma sologa, e le’i mae’a ona tu’ufa’atasia, peita’i lea ua oso mai le talosaga lenei, ma o le lelei la lea o le fa’atuai, o le a aofia ai fo’i.

Fa’ailoa e le ali’i fa’atonu o le Holemand Security Samana Veavea, “Afai e i ai se foa’i e maua mai le FEMA, o le a maua lea mo mea ua fa’aleagaina a le malo, ae ua faigata ona maua ni mea mo aiga nei, aua e le’i taia i tatou i le Afa o Vickie ma Wasi.”

TASI GASEGASE FA’ATALIA PE MAUA I LE MISELA

Ua i ai se isi ua toe oo ane mo ni togafitiga i le falema’i tele i Faga’alu, ae o auga va’aia ia te ia, e foliga mai ai ua maua fo’i i le Misela. O le tamaititi e 7 masina sa vaaia e fomai i le aso 22 o Fepuari i le Falema’i o le LBJ. Ma ua auina atu ni fa’amaumauga i Hawaii e suesueina pe ua maua lea alo i le misela.

O le tagata mulimuli na fa’amauina ua maua i le misela sa vaaia i le LBJ i le aso 27 Ianuari.  I le taimi nei o lo’o tumau pea i le 16 i latou fa’amonia maua i le misela.

I Samoa lea ua fa’amauina ai le to’a 83 maliu ona o le misela ma o le toatele o i latou o fanauiti.

O le galuega tele na feagai ai ma le ASDOH na mafai ai ona tuia atoa le 99.6% o le aotelega o tagata uma o le atunuu. O le fanau lava ia e na’o le 12 masina le matutua, e na’o le tasi le tui Misela MMR e ao ina tuia ai, ae ua fa’ailoa mai e toe 16% o le aotelega o fanau nei e lei faia o latou tui puipuia, ae o le 99.5% e ta’i 4 tausaga ma lalo ane, ua mae’a faia o latou tui MMR lona lua. E toa 62 i latou i le matutua lea, e le’i faia o latou tui Misela, ae o lea ua aumaia tonu lava lea alo i le matua lea i le falema’i ma auga ua va’aia e foma’i e masalomia ai o le misela ua maua ai o ia.