Ads by Google Ads by Google

Tala I Vaifanua


Le taimi ua to’ai taunuu ane ai le sui o le Ofisa o le Mint poo le fale gaosi tupe a le Feterale i le faataligava’a a le tatou Sui i le Konekeresi ma lana aufaigaluega. Ua fiafia fa’atasi fo’i aua e le’i manatu i la’ua ua faatalia faapea i la’ua i le tatou malae va’alele. [ata: Leua Aiono Frost]

TAUNU’U FAATONU FALEGAOSI TUPE FETARALE

 

Ua taunu’u i le atunuu le fa’atonu o le Ofisa Gaosi Tupe (US Mint) a le malo tele, David J. Ryder ma lana aumalaga, e tapena le taua’aoina aloaia o le seleni ua mae’a lomia ai le ata o le Pe’a lea e ta’atele nei i Amerika Samoa. O lea seleni e aloaia ai le Paka Fa’asao a Amerika Samoa, o lo’o maua ai le Pe’a.

 

O le au malaga e aofia ai sui o lea ofisa fetarale, ma le ali’i sa ia tusia le ata o le Pe’a. E fa’alauiloa aloaia le seleni i se sauniga i le Malae o le Suigaula a le Atuvasa i Utulei i le aso Tofi nei, Fepuari 13. O iina fo’i o le a tatala ai ma le fa’atauga o nei seleni.

 

Ua matua sauni lava Ryder i le sauniga ua sau ina ia auai ai, ae o le a i ai ana asiasiga i si vaega uma o le Laufanua Fa’asao o Amerika Samoa ua fa’atulaga e le National Park Office e malaga ai i le aso Lua ma le aso Lulu o le vaiaso lenei.

 

O lo’o fa’amoemoe e asiasi ai i le Ofisa o le Kovana, i le aso ananafi, mo se feiloaiga.

 

E le o se taimi muamua lea ua malaga mai ai Ryder i Ameirka Samoa. Sa malaga muamua mai ma le Sui Peresetene o Amerika i le vaitau o le 1970s ma toe malaga mai fo’i i le vaitau o le 1980s.

 

I lana malaga lea ua taunu’u nei, sa ia fa’ailoa, ina ua mae’a lana tautua i le malo tele lea na ala ai ona malaga mai, e 25 isi tausaga sa toe fo’i ai o ia fa’atula’ia lana pisinisi, ma sa femalaga’i ai lo ia i le tele o atunuu o le lalolagi i lana lea pisinisi ona sa tupu ma lauolaola.

 

Ina ua toe nofo ma fuafua lona soifuaga, na litaea o ia ma fa’atau ese mai lana lea pisinisi, ae soso’o ai ma le vala’auina o ia e toe fo’i ane e avea ma Fa’atonu o le Fale Gaosi Tupe a le Feterale.

 

Ua masani o ia i le femalaga’i solo ona o tiute fa’atino e pei ona o’o mai ai nei, peita’i e le avea le filemu ma le saogalemu fa’amasani vave o tagata o Amerika Samoa, e te le popole vale fua e tau puipuia oe mai ni fa’aletonu.

 

“O iina e te fia malolo mai i ai i le vevesi solo o lo’o faia i fafo, i aso ta’itasi, aua e mautinoa lava lou saogalemu ma le to’afilemu,” o lana tala lea.

 

GALUEGA O LE VAI & FA’ATAOTO FIRE HYDRANTS - TAUESE NUUULI

 

E ui ina ua va’aia le motumotu ma le palapala fo’i o le alatele sa laulelei o Tauese i Nuuuli i lenei vaitau, ae ua fa’afetaia e maualuga atu le aoga o le a fotua’i mai ai i na fa’aletonu, aua o le maua a’ia’i ai le suavai mama mai le puna i atumauga o Tauese lava ia, e fa’aaoga e i latou, a’o le’i mae’a lenei masina o le tausaga.

 

Ua oo nei le galuega o fa’atautaia e le Happy Construction, i le fa’atulagaina o Fire Hydrants po’o paipa tetele nei e fa’aaogaina e le au tinei afi pe afai o le a tutupu ni fa’aletonu, mu falenofo ma pisinisi o aiga i lea pitonuu o Nuuuli. O le galuega o loo fa’atupea e le USEPA.

 

O le alapaipa uma lea ua taoto nei ma ua mae’a elia e tau i le alatele, e tolu Paipa e Fa’aaoga e Tinei Afi ua fa’atulaga ai, pito lava i uta e tulata lea i aiga o faamautu ai, ma o le paipa lona lua lea ua fa’ataoto nei, ma e ogatotonugalemu o le alatele lea, ua aoga mo aiga i ituvai e lua o le vaitafe, ae mulimuli ai lava i le paipa tele e tulata mai i aiga o lo’o i le 300 futu mai le alatele.

 

O le vaega mulimuli lava o le galuega lenei mae’a ai, o le soso’oga lea o le atugapaipa fou i le laina taoto i le alatele a le malo, lea e sapalaia sa’o atu ai le suavai manino lea i le sapalai fa’apitoa a le ASPA.

 

“I le suavai lea e fa’aaoga e Tauese Nuuuli pe a mae’a le poloketi lenei, e le toe afaina ai outou i ni suavai le mama ma fa’asalalauga fa’alaua’itele a le ASPA ua palapala le suavai,” o se tala fiafia lea a le ali’i Inisinia, Andre Milford.

 

Ona o lo’o pito lava i atumauga le Pamu ua taoto nei e sapalaia mai le suavai mai le puna ua mae’a elia, o le a le toe i ai la se suavai mai se isi fa’atanoa a le ASPA e fa’auia mai i aiga uma o lo’o alaala i Tauese, Nuuuli.