Ads by Google Ads by Google

Tala I Vaifanua

TAGA’I TOTOA SOIFUA MALOLOINA FA’AMA’I FOU - CORONIVIRUS

 

O le aso Lua o lenei vaiaso sa fa’ailoa ai  e le fa’ataonu o le Matagaluega o le Soifua Maloloina Motusa Tuileama Nua, ua i ai se tasi i le setete o Washington ua masalomia ua tau atagia mai ua tau maua i le verusi fou o le Coronavirus, lea na mua’i tula’i mai i le malo o Saina.

 

“Ona o le to’atele o tagata Samoa o lo’o alaala i lea fo’i setete ua taumafai ai ina ua maeaea mai ona tu’ufa’atasia fa’amaumauga e tusa o lea fo’i ma’i, ina ia fa’aaogaina mo i tatou iinei. Ua i ai fo’i ma le fa’amoemoe e faia se fonotaga tu’ufa’atasia a nisi o foma’i mai Uosigitone ma le tatou Matagaluega o le Soifua Maloloina ina ia aluga lelei lea so’otaga,” o se tala lea a Motusa.

 

I le taimi nei e le’o maua iinei ni vaila’au mo ni tui e togafitia ai le mamalu lautele i le coronavirus. Ae o auga o lea ma’i e aofia ai le fiva, tale, ma le fufusi fo’i lau fa’alogo i lou fatafata ma e tau le au fo’i lau manava.

 

I se lipoti mai Samoa, o lo’o fa’ailoa ai o lo’o i ai fanau faasikolasipi a Samoa o loo a’o’oga i Wuhan i Saina - lea na amata pepese ai lea fa’ama’i - ma e to’atele fo’i tagata mai Saina o lo’o malaga i Samoa.

 

Fa’ailoa e le Palemia Tuilaepa Sailele Malielegaoi, “E leai se mea e popole ai Samoa i lenei fa’ama’i, o lo ua mae’a saunia lelei le tatou Matagaluega o le Soifua Maloloina e feagai ma le Coronavirus.”

 

Ua fa’ailoa fo’i se taofi o Kovana Lolo Moliga e tusa o lea faafitauli, “E tatau ia Samoa ona va’ai toto’a i ala e mafai ai ona puipuimalu Samoa mai le tele o fa’ama’i pepesi e pei o le Misela ma le Conovarius. E tatau ona latou va’ai toto’a i le faiga lea e faia e Amerika Samoa ina ia le oo mai fo’i lea fa’ama’i i Samoa, ma fa’asolo mai ai fo’i i le tatou nei malo aua e latalata lava le so’otaga” o Samoa e lua.

 

“O le so’otaga lava ma isi malo o lo’o a’afia i gasegase pepesi e ao ina mua’i va’aia toto’a, e aofia ai malae va’alele ma Uafu, aua o ala ia e vave ai ona pesia le atunu’u i nei fa’ama’i pepesi, ae ua matauina e tatala lava feoa’iga i le va o Samoa ma isi malo o lo’o i ai nei fa’afitauli.

 

LUA NISI GASEGASE MISELA UA MASALOMIA

 

I se lipoti mai le Matagaluega a le Soifua Maloloina ma le falema’i a le LBJ sa tuuina atu i le kovana ma lana kapineta i se fonotaga i le afiafi o le aso Sa ua te’a, sa fa’ailoa ae e lua nisi gasegase o lo’o masalomia ua maua i le misela.

 

O i la’ua o le teineitiiti e 4 tauasga mai Pavaiai na va’aia i Tafuna Community Health Care i le aso 13 o Ianuari, ma le tamaititi e 12 tausaga na vaaia i le LBJ i le aso 13 o Ianuari, 2020.

 

Ua auina atu toto na tuia mai nei gasegase e to’alua mo suesuega i le Hawaii state laboratory i Honolulu.

 

Fa’ailoa e le ali’i foma’i Dr. Tuatoo Reese, ua mae’a faia le tui muamua o le fa tausaga mai Pavaiai, ae o le tamaititi mai Fagaitua ua mae’a faia fo’i ona tui puipuia e lua o le misela.

 

O le isi lea e tatalia fo’i lana suesuega pe misela na avatua i Hawaii, o le tama’ia’i e 27 tausaga mai Aoa, lea e toatolu ai suesuega o loo fa’atalia i le taimi nei.

 

I le lipoti a le DoH ma le LBJ o lo’o fa’ailoa ai le tumau pea i le 12 o gasegase ua fa’amaonia i le misela i Amerika Samoa. I lea lava lipoti, ua fa’ailoa ai ua o’o atu i le 95% le faitau aofai o i latou ua mae’a tuia i ai le MMR e puipuia ai le Misela

 

Ua fa’ailoa mai o lo’o i ai pea le 125 o le to’atele o fanau o lo’o mana’omia pea o latou tui MMR ma le 525 fo’i o le fanau o lo’o mana’omia ona faia latou tui puipuia.