Ads by Google Ads by Google

Tala I Vaifanua

TU’UA LE MALO PULEFA’ASISINA PALAUNI TUIASOSOPO:

 

Ua lagia le itulagi o le Alataua, aua ua fa’ia se tasi o ona fofoga fetalai iloga, le tofa Pulefa’asisina Palauni Tuiasosopo, ua fa’apea fo’i ona taia le tafu’e o se poutu i lana Ekalesia sa ia tautua ai i le afioaga o Fagatogo, le Fa’apotopotoga Kerisiano a Iesu peita’i ua fa’ia ai fo’i le tatou malo lea sa tautua ai e ala i ona tomai i tu ma aga a Samoa i le atuvasa.

 

O ia fo’i o se tasi sa avea ma fa’aaa’oa’o i le potu a’oga i le tele o Laumua o le atunu’u sa utuvai i ai alo ma fanau ua iloga ona tutula’i mai i tofi ma tiute e pei ona i ai nei i le tatou Malo.

 

Sa avea o i ma Senatoa o lona Itumalo o le Alataua, a’o se tama fo’i i le li’o o lona aiga ma le faletua Fa’atupuagaatamali’ioalosina Cecilia.

 

Ua fa’alauiloa mai na maliu o ia i le vaiaso lenei i Hillsboro, Oregon a’o i ai uma nai ona alo ma le tina o le aiga i ona autafa, fa’atasi ai ma nisi fo’i o alo o lona tuafafine pele, Mere Betham. Ua atoa fo’i 82 tausaga o lona soifua.

 

Ona e tupuga mai Pulefa’asisina Palauni i se aiga e fiafia lona tua’a i mataupu fa’afaigamalo, Tuiasosopo Mariota Tiumalu, o le ala fo’i lea o le tele o le taimi o lenei tama e faaalu i le tu’ufa’atasia o pesega ma fa’aevagelia, o fa’afiafiaga  fa’asamoa ma e tele fo’i lona taimi sa avea ai o ia ma ta’ita’i o fiafiaga na fa’aalia e Amerika Samoa i Faaaliga o Tu ma Agaifanua a le Atuvasa.

 

O lona tua’a Tuiasosopo Mariota Tiumalu, o se tasi o ulua’i ta’ita’i o Amerika Samoa sa lalamua i le taumafaiga ona fa’atula’ia le tatou Fono Faitulafono e pei ona i ai nei, ma se’e ese mai ai le tatou Faigamalo Fa’ateritori o Amerika i le aluga o i ai nei, mai le Malo Tele.

 

O le isi lava tofiga sa matua lauiloa ai lona faiva fa’ata’ita’ipese i lana lea taleni, o le vaitau na avea ai o ia ma Ta’ita’i Pese mo le Aufaipese Tu’ufa’atasi a le Amerika Samoa Arts Council, lea sa tele tausaga o feoa’i solo e fa’aalia Tu ma Agaifanua a Samoa i le atuvasa, le setete o Hawaii fa’apea le tele o a’ai tetele o Amerika i lona itu i sisifo.

 

O le aufaipese lea a le Arts Council sa amatalia e Pulefa’asisina i le tausaga e 1972 ma e mafai ona molimauina e le to’atele o sui o le aufaipese, e aofia ai Lewis Wolman ma Maluafiti Posala.

 

O ana ta’ita’iga sa a’otau ai nisi ua iloga i le musika e pei o Flo Wendt, Julia Foifua, Larry Purcell ma Sina Solomona Tilo, ae maise lona alo o Kuki Tuiasosopo lea ua avea nei ma ta’ita’i o Musika po’o le Fine Arts i le ASCC i le taimi nei.

 

Fa’amaise le Atua i le pa’ia o aiga nofo fa’avauvau ona o le amia o se poutu i le pa’ia o Aiga ae maise ai le lotoifale o le tina o Tupu ma le fanau ma latou aiga pele.

 

TAOFIA FA’AFUASE’I AFEA O I TATOU E MELI LA’U PASESE TETELE

 

Ua fa’ailoa mai o Ianuari 06, 2020, ua fa’ate’ia le Ofisa o le Meli Seven Seas Navigator i le tatou Malo, ua vala’au mai le Ofisa autu o lea Meli, o le a le afea e lea meli tele le tatou Uafu i Amerika Samoa nei. Peita’i, e leai se mafuaga na fa’ailoa mai ua afua ai lea tulaga.

 

Na taumafai fo’i e maua mai se fa’amatalaga aloa’ia mai le Harbor Maritime, o i latou nei e tautuaina lea Meli pe a o’o ina taula mai i le tatou Uafu tele i Fagatogo. Na fa’ailoa mai e i latou, na fa’ato’a maua mai fo’i le vala’au e i latou i le itula e 3:00 i le afiafi, ua le afea i tatou e le Meli lenei.

 

O lea malaga a le Meli tele lea, sa tatau ona afea i tatou, ona soso’o ai lea ma Samoa fa’atasi ai ma nisi ana tafaoga i si motu e lua o le pasefika ona toe taliu ai lea i Ausetalia, lea sa amata mai ai le malaga. O le ulufale mai i Amerika Samoa sa sau mai Tahiti.

 

O le toe Meli fo’i o le tausaga e 2019, na mua’i fa’ailoa atu i ai e le tatou Matagaluega o le Soifua Maloloina, o le a le mafai ona taula mai ona o le Misela o lo’o Pepesi iinei. O le Meli lea o le “Costa Atlantica”, peita’i e le’i i ai se fa’aaliga fa’apea na fa’ao’o atu i le meli o lenei masina, ae o lea ua latou faia mai le fa’aiuga.