TUPE A AMERIKA SAMOA MO SAMOA

O le aso Lulu sa amatalia ai le sailiga tupe a le malo o Amerika Samoa aua se fesoasoani e auina atu mo Samoa, lea o lo’o mafatia i le pepesi o le misela, ma ua silia ma le 60 i latou ua maliliu ai, o le toatele o e ua maliliu o fanauiti.

O lea sailiga tupe, “Fesoasoani e Alofa mo Samoa”, o lo’ fa’amautu i le Fale Samoa i le Malae o Suigaula a le Atuvasa i Utulei. O le telefoni 633-0581 ma e talia foi foa’i i le aso Toanai.

O le komiti tofia o le sailiga tupe e aofia ai taitai komiti,  Failautusi o le Ofisa o Mataupu Tau Samoa, afioga le Maoputasi Mauga Tasiaeafe Asuega ma le Teutupe a le Malo, Ueligitone Tonumaipe’a.

Ua fa’ailoa mai, e afua i tupe se’ia o’o i mea’ai tu’u apa ma mea’ai fo’i e tu’upepa, ua talia fa’asolo atoa i le taimi nei, ina ia tu’ufa’atasia ma fa’ao’o atu ai i Samoa.

Ua vala’auina so’o se tasi ta’ito’atasi, fa’alapotopotoga, Sosaiete, Au Ta’a’alo, Ekalesia, Pisinisi ma Kamupani eseese, Nu’u ma Afioaga eseese, ae maise o Aiga fo’i i Amerika Samoa nei, fa’ao’o mai a latou foa’i ina ia tu’ufa’atasia i Utulei.

Ua fa’ailoa fo’i e le Fofoga Fetalai o le Maota o Sui, Savali Talavou Ale e fa’apea o le a fesoasoani mai le Fono Faitulafono, e aofia ai tagata faigaluega.

Na fa’asalalauina le autu o lea fa’amoemoe e le afioga le Ma’oputasi ina ia utagia mai e le mamalu lautele le nei fa’amoemoe, ua fa’amaumauina uma nei foa’i uma e i latou ua lautogia mo fa’amaumauga i le Fale Samoa i le Malae o le Suigaula o le Atuvasa.

“O Samoa lava e tasi, afai e a’afia le tasi, e lagona uma e i tatou le tiga ma le o’otia. E tatau lava ona tatou tula’i atu ma se foa’i e fesoasoani i le o’otia ua i ai nei Samoa, aua o le usoga i latou ia i tatou,” o se tasi lea o ona manatu autu e tusa o lenei fesoasoani e tu’ufa’atasia.

Ua mae’a fa’atulaga mai e le afioga le Kovana le foa’i a le aufaigaluega uma ta’ito’atasi a le Malo, e ta’i $10; sui fa’atonusili e ta’i $100; ma o fa’atonusili ma sui o le kapineta e ta’i $300.

MAUA PEMENI LONA LUA A LE MALO - AFA O GITA

I le fonotaga a le kapineta i le aso Gafua, sa fa’ailoa ai e Kovana Lolo Moliga, ua maua mai le peimeni lona lua a le Malo mai le latou Inisiua o latou Meatotino na fa’aleagaina ona o le afa o Gita ia Fepuari 2018. O lea pemeni e $3.2 miliona.

O le aofaiga o meatotino a le malo sa fa’aleagaina i le taimi o Gita e $15 miliona ma o le talosaga foi lea a Amerika Samoa i le kamupani inisuia, Lloyds of London. O le pemeni muamua e $5 miliona ma o lo’o fa’atalia nei e le malo se isi tupe mau.

A o i ai le kovana i Honolulu i le vaitaimi lata mai sa fono ai Lolo ma sui o le kamupani inisiua e fa’atalanoaina lenei mataupu.  Ua ia fa’aonutina sui o le malo ina ia tagai totoa i lenei mataupu ina ia mafai ona maua le paleni o lo’o totogi.

O i ai le kovana i Honolulu, na fono ai ma nisi mai le kamupani o le Marisco shipyard, ma ua afua ai ona fa’atulaga mai se aumalaga fa’apitoa e malaga mai ia Tesema 16 ina ia latou va’ava’ia toto’a le a’afiaga o lo’o fa’aletonu ai pea le Mea Toso Va’a a le tatou Malo i Satala.

Talu mai ia Oketopa o lo’o taofia pea ni galuega e ao ina faia i le Mea Toso Va’a ona ua fa’aletonu le filifili e fa’ao’o atu va’a i luga i nofoaga e mafai ona fa’amautu i ai ae faia galuega lipea. O lea le afaina e ao ina faaleleia atoatoa a’o le’i toe fa’aauau galuega i le Mea Toso Va’a, lea fo’i e matua tele tupe a le Malo e maua mai ai.

“Pe afai e to’ai taunu’u mai nei ali’i e i ai tomai fa’apitoa fa’ainisinia i nei matata, o le a fa’afaigofie ai galuega toe fa’aleleia o lea aseta a le tatou malo,” o se fa’amoemoega lea o i ai o le afioga le Kovana sili.