Ads by Google Ads by Google

Tala I Vaifanua


O nisi o sui ilona o le tatou malo ma le atunu’u ua auai fa’atasi i le fa’amoemoe na talotaloa fa’apitoa e taualoa ai le gasegae Alzheimers i Amerika Samoa i le taeao po o le aso Gafua na te’a nei, Novema 4, 2019. Na paau ane le afioga le Kovana Sili Lolo Moliga, ona o lona fiafia e fa’ailoa lona sapaia o taumafaiga uma ma tima’iga tau lea gasegase, ma o le afioga le Aloali’i Afoa Moega Lutu o se tasi fo’i ona uo mamae. [ata: foa’i]

TALOTALOGA - ULUA’I TAUALOA GASEGASE ALZHEIMERS AMERIKA SAMOA

 

O le taeao po o le aso Gafua na te’a nei, sa amata ai le talotalosaga i Utulei, la’ei ai ma le lanu Viole ina ia fa’ailoa, e sapaia taumafaiga uma ina ia tausia lelei, alofaina ma e taumafai e soifua feso’ota’i pea ma outou pelega ua maua i le gasegase lenei o le Alzheimers.

 

O lenei fo’i taumafaiga na fa’amati’e mai e alo uma o i latou ua maua i lea gasegase ma o nisi o nei alo e aofia ai alo tama’ita’i lalelei o le afioga le Aloali’i Afoa Moega Lutu; ona o lo ua finau nei lea tama iloga o le atunu’u ma lea gasegase i lona tino matua ai nei.

 

I le va’aiga lautele i lea taeao ia i latou na auai uma i le talotaloga, ma ua la’eia e i latou uma le lanu viole pa’auli, na matua to’atele i latou ua sapaia le fa’amoemoe lea.

 

Na aofia ai i le laina na tutula’i ma latou talotalo, le afioga le Kovana Sili, Lolo Moliga ma le faletua Cynthia Moliga. Na auai fo’i le afioga le Sui Kovana Lemanu Peleti Mauga.

 

O le to’atele o ali’i ma tama’ita’i foma’i, o fa’auluuluga o matagaluega eseese o le Malo, o nisi o tausima’i pasi ma o latou ta’ita’i o lo’o galulue e fa’afailele le mamalu o le atunu’u e saili togaifitiga i le Maota Gasegase i Faga’alu.

 

Na aofia ai fo’i ma nisi o le aufailotu Rev. Elder Ioane Evagelia ma le faletua o le EFKAS i Utulei. Le tama’ita’i Faipule Andra Samoa mai le Itumalo o Fofo. O le to’atele o i latou o fanau a i latou ua maua pe sa maua ai matua i lenei gasegase faigata, sa auai uma lava e fa’aalia lo latou sapasapaia o lenei ulua’i fa’atasiga e taualoa le Alzheimers i Amerika Samoa, lea ua avea le masina o Novema ma masina o le tausaga e taualoa ai.

 

O le a toe fa’ailo mai se isi taumafaiga i le lumana’i a’o le’i mae’a lenei masina

 

SUIGA O LE A FA’ATULA’IA I LE PAKA LIONA

 

Ua fa’ailoa mai ni suiga lelei o le a va’aia ua fa’atulaia i le Paka Liona i se taimi e le o toe mamao, talu mai ona maua le latou fa’atupega mai le Land & Water Conservation a le National Park, ina ia fa’aleleia atili ai lea paka faitele mo le atunuu.

 

Ua fa’atulaga e le Matagaluega o Paka ma Malae Taalo o le a fa’atuina se isi Malae Volleyball Oneone e pei fo’i o le malae o lo’o i ai nei fo’i, o le a lua ai malae o lea ituaiga, ina ia mafai ona fa’aaoga i ta’amilosaga Beach Volleyball pe a manaomia.

 

O le malae Basketball fo’i o le a toe fa’aleleia atili ma o lea fo’i se tasi o poloketi ua mae’a ona fa’alagi e le afioga le Kovana Sili, e ao ina vave amatalia i le tausaga nei, ia mae’a lelei ma tatala e fa’aaogaina, a’o le’i mae’a lana nofoaiga i le tauaga 2020.

 

Na vaaia i lenei vaitau le fa’alauteleina o le Malae Beach Volleyball i le Paka ina ua amata galuega a le Matagaluega o Paka ma Malae Ta’alo, lea e tula’i mai ai le susuga Ken Tupua e avea ma latou fa’atonu.

 

“O le toe suaina lelei o le Malae Oneone mo le Beach Volleyball e ao ina fa’alautele ma fa’aloloto teisi ina ia mautinoa o lava le oneone mo lea fa’agatama. Lona lua e ao ina suaina fo’i ia lava malae ta’aalo e lua mo lea ituaiga o ta’aloga, aua o lo’o tula’i mai fo’i, na maua ni pine a le fanau talavou i le ta’amilosaga o lea fo’i fa’agatama.”

 

E ese mai lea sa ia toe fa’amanino se isi fo’i aoga o lea lava malae, “O le toe faia o le isi malae, e ao ina mautinoa ua suaina ia mafai ona fa’aaogaina fo’i i tauvaga a le Beach Handball lea fo’i ua vave lava ona fiafia i ai tupulaga ma ua maua fo’i pine i tauvaga fa’avaomalo o loo tauva ai tatou fanau,” o se saunoaga fa’apitoa lea a Tupua.

 

E le gata ina fuafua fo’i le fa’aleleia atili o le Malae Basketball, ae ua fa’ailoa mai, o le a fa’amautu ma fa’aleleia atili faleuia e le mamalu o le atunu’u i lea fo’i paka a le atunuu.

 

“I le taimi nei ua tatalia le o’o mai o le ASPA ina ia latou tosoa mai se laina o le Moli e mafai ona fa’amumu ai le moli i totonu o le faleta’ele lea, pe a o’o i le vaitau o le a tatala ai mo le mamalu lautele e fa’aaogaina.”

 

E le gata la i le Paka Liona lea ua galueaina nei galuega a le Paka ma Malae Ta’alo ae ua mae’a fo’i ona fa’aleleia mai nisi o mea o lo’o fa’atutuina e tautuaina ai le mamalu lautele i le Paka i Oneasosopo. O nisi o mea na fa’aleagaina i le afa o Gita ia Fepuari 2018, ua mae’a toe fa’aleleia uma. Ua toe lipea nofoa e alaala ai tagata ma maimoa fanau ta’a’alo ma ua toe vali lelei fo’i. O mea uma nei ua toe gafatia ona fa’afouina ona o lea lava alagatupe ua toina mai e le Lands & Water Conservtion a le National Park Services a le Initeria.